തിരുവനന്തപുരം: ട്രെയിനില്‍ യാത്ര ചെയ്യുന്നവരെല്ലാം അഭിമുഖീകരിക്കുന്ന പ്രധാന പ്രശ്നങ്ങളിലൊന്നാണ് യാത്രാ സമയത്ത് ടിക്കറ്റ് കിട്ടാത്തത്.
യാത്രയുടെ എത്ര നാള്‍ മുന്നേ നോക്കിയാലും ടിക്കറ്റ് ലഭിക്കാത്ത അവസ്ഥയാകും ഉണ്ടാകുക. പിന്നീട് അതിനുള്ള ഒരു പരിഹാരമാണ് തത്കാല്‍ ടിക്കറ്റുകള്‍. പക്ഷെ ഇത് ബുക്ക് ചെയ്യുകയെന്നത് വളരെ ബുദ്ധിമുട്ടുള്ളതും ഒരു ഭാഗ്യ പരീക്ഷണവുമാണ്.
കൃത്യസമയം നോക്കി ടിക്കറ്റ് എടുത്ത് കഴിഞ്ഞാലും ചിലപ്പോള്‍ അത് കണ്‍ഫോം ആകണമെന്നില്ല. ചിലപ്പോഴൊക്കെ പണം പോയിട്ടും ടിക്കറ്റ് കിട്ടാത്ത അവസ്ഥയുമുണ്ടാകും.
എന്നാല്‍ അതിന് പരിഹാരമുണ്ട്. ട്രെയിൻ യാത്രക്കാരായ മിക്ക ആളുകള്‍ക്കും അറിയാത്ത ഈ സംവിധാനം ഉപയോഗപ്പെടുത്തുകയാണെങ്കില്‍ ടിക്കറ്റ് കിട്ടാതിരിക്കാനുള്ള സാധ്യത കുറയും.
എന്താണ് കറൻ്റ് അവൈലബിലിറ്റി ടിക്ക്റ്റ് ബുക്കിങ്
ആദ്യ റിസർവേഷൻ ചാർട്ട് തയ്യാറാക്കി കഴിഞ്ഞ ശേഷം ഒഴിവുള്ള സീറ്റിലേക്ക് ടിക്കറ്റ് ബുക്ക് ചെയ്യാനുള്ള സൗകര്യമാണിത്. നിലവിലെ റെയില്‍വേ നിർദേശപ്രകാരം ഉച്ചയ്ക്ക് 2 മണി മുതല്‍ പുലർച്ചെ 5 മണിവരെ പുറപ്പെടുന്ന ട്രെയിനുകളുടെ ആദ്യ ചാർട്ട് സാധാരണയായി 8 മണിക്കൂർ മുമ്പും, രാവിലെ 5 മണി മുതല്‍ ഉച്ചയ്ക്ക് 2 മണിവരെ പുറപ്പെടുന്ന ട്രെയിനുകളുടെ ആദ്യ ചാർട്ട് തലേദിവസം രാത്രി 9 മണിയോടെയും തയ്യാറാക്കും.
ഇതിന് ശേഷം കറൻ്റ് അവൈലബിലിറ്റി വഴി ടിക്കറ്റ് ബുക്ക് ചെയ്യാവുന്നതാണ്. ട്രെയിൻ യാത്ര ആരംഭിക്കുന്നതിന് അര മണിക്കൂർ മുന്നെയാണ് രണ്ടാമത്തെ ചാർട്ട് തയ്യാറാക്കുക. അതുവരെയാണ് ഇതിനുള്ള സൗകര്യവുമുണ്ടാകുക.
റെയില്‍ വേ സ്റ്റേഷൻ കൗണ്ടറില്‍ നിന്നോ ഓണ്‍ലൈനായോ ടിക്കറ്റ് ബുക്ക് ചെയ്യാവുന്നതാണ്. ഇതിന് അധിക നിരക്ക് റെയില്‍ വേ ഈടാക്കുന്നില്ലെങ്കില്‍ ഓരോ ട്രെയിനുകള്‍ അനുസരിച്ച്‌ ഇത് വ്യത്യസ്ഥമാണ്.
കണ്‍ഫോം ടിക്കറ്റ് മാത്രമാണ് ഇതിലൂടെ ലഭിക്കുകയെന്നതും ഇത്തരം ബുക്കിങ്ങുകളുടെ മറ്റൊരു പ്രധാന ഗുണമാണ്. അതു കൊണ്ട് തന്നെ കണ്‍ഫോം ടിക്കറ്റ് ലഭിക്കാത്തവർക്കും റിസവർവേഷൻ ലഭിക്കാത്തവർക്കും ഈ സാധ്യത ഉപയോഗിക്കാം.
