തിരുവനന്തപുരം: റെയില്‍വേ സ്റ്റേഷൻ യാർഡില്‍ നിർത്തിയിട്ടിരുന്ന ട്രെയിനില്‍ നിന്ന് 55000 രൂപ വിലവരുന്ന മൊബൈല്‍ ഫോണ്‍ മോഷ്ടിച്ച കേസില്‍ ബീഹാർ സ്വദേശി പിടിയില്‍.
ബിഹാർ സ്വദേശിയായ മിഥുൻ ധാലി (32)യെയാണ് ആർപിഎഫും റെയില്‍വേ പൊലീസും ചേർന്ന് പിടികൂടിയത്.
തിരുവനന്തപുരം സെൻട്രല്‍ റെയില്‍വേ സ്റ്റേഷനില്‍ നിർത്തിയിട്ടിരുന്ന ശബരി എക്സ്പ്രസിലെ എസ്-3 കോച്ചില്‍ നിന്നാണ് ഫോണ്‍ മോഷണം പോയത്. കരാർ ജീവനക്കാരനായ നെയ്യാറ്റിൻകര സ്വദേശി അമല്‍ പ്രകാശിന്‍റെ 55,000 രൂപ വിലവരുന്ന 'Realme GT 7' എന്ന മൊബൈല്‍ ഫോണാണ് പ്രതി കവർന്നത്.
അമലിന്‍റെ പരാതിയില്‍ തിരുവനന്തപുരം റെയില്‍വേ പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിക്കുകയായിരുന്നു.
ആർപിഎഫ് സീനിയർ ഡിവിഷണല്‍ സെക്യൂരിറ്റി കമ്മീഷണർ മുഹമ്മദ് ഹനീഫ്, റെയില്‍വേ പൊലീസ് എസ്.പി കൃഷ്ണകുമാർ എന്നിവരുടെ നിർദേശപ്രകാരം നടത്തിയ അന്വേഷണത്തിലാണ് പ്രതി വലയിലായത്. മോഷ്ടിച്ച മൊബൈല്‍ ഫോണ്‍ പ്രതിയില്‍ നിന്ന് കണ്ടെടുത്തു.
