കോട്ടയം : റോഡിലെ വെള്ളക്കെട്ട് മൂലം എംസി റോഡിലുണ്ടായ ഗതാഗതക്കുരുക്ക് യാത്രക്കാരെ വലച്ചു. കഴിഞ്ഞ തിങ്കളാഴ്ച വൈകുന്നേരത്തോടെ എംസി റോഡിൽ ചെമ്പരത്തിമൂട്ടിലും നാഗമ്പടത്തും വെള്ളം കയറി തുടങ്ങിയിരുന്നു. വെള്ളം ഇറങ്ങാതായതോടെ ഗതാഗതക്കുരുക്കും രൂക്ഷമായി.
വെള്ളത്തിലൂടെ വാഹനങ്ങൾ സാവകാശം കടന്നുപോകുന്നതാണ് കുരുക്കിനു കാരണം. വെള്ളം കുറഞ്ഞ വശത്തേക്ക് വാഹനങ്ങൾ നീങ്ങുന്നതും കുരുക്ക് വർധിപ്പിച്ചു. ഇന്നലെ രാവിലെ വെള്ളം കൂടുതൽ കയറി തുടങ്ങി. ഇതോടെ എംസി റോഡിലെ കുരുക്ക് കോട്ടയം നഗരം മുതൽ സംക്രാന്തി വരെ നീണ്ടു. വാഹന യാത്രക്കാർ കോട്ടയം നഗരം കടന്നുകിട്ടാൻ നന്നേ പാടുപെട്ടു. മണിക്കൂറുകൾ സമയമെടുത്താണ് ഓരോ വാഹനവും കോട്ടയം നഗരം കടന്നുപോയത്.
ദീർഘദൂര കെഎസ്ആര്ടിസി ബസുകൾ മണിക്കൂറുകളോളം കുരുക്കിൽ കിടന്നു വൈകി. പോലീസുകാരുടെ സേവനമുണ്ടെങ്കിലും തിരക്ക് നിയന്ത്രിക്കാൻ സാധിച്ചില്ല. മഴ മാറി അല്പം തെളിവു കണ്ടതോടെ കൂടുതൽ ആളുകൾ വാഹനവുമായി നിരത്തിലിറങ്ങിയതും വീടുകളിൽ വെള്ളം കയറിയതിനാൽ റോഡുകളുടെ ഇരവശങ്ങളിലും സ്വകാര്യ വാഹനങ്ങൾ പാർക്ക് ചെയ്തിരുന്നതിനാൽ റോഡിലെ കുരുക്ക് കിലോമീറ്ററോളം നീണ്ടു.
