തിരുവനന്തപുരം: സംസ്ഥാനത്ത് ശനിയാഴ്ച വരെ കനത്ത മഴ തുടരുമെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഇരട്ടചക്രവാതച്ചുഴിയും പടിഞ്ഞാറൻകാറ്റ് ശക്തമായതും മഴയുടെ ശക്തികൂട്ടും. തെക്കൻ കർണാടകയ്ക്കും സമീപ പ്രദേശങ്ങള്ക്കും മുകളിലായി 5.8 കിലോമീറ്റർ ഉയരത്തിലും മദ്ധ്യപടിഞ്ഞാറൻ ബംഗാള് ഉള്ക്കടലിനും സമീപമുള്ള ആന്ധ്രാപ്രദേശ് തീരപ്രദേശങ്ങള്ക്കും മുകളിലായി 4.5 കിലോമീറ്റർ ഉയരത്തിലും ചക്രവാത ചുഴികളുണ്ട്.
അതേസമയം ഇന്ന് പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, കോഴിക്കോട്, വയനാട്, കണ്ണൂർ, കാസർകോട് ജില്ലകളില് ഓറഞ്ച് അലർട്ടാണ്. തിരുവനന്തപുരം, കൊല്ലം, തൃശൂർ, പാലക്കാട്, മലപ്പുറം ജില്ലകളില് യെല്ലോ അലർട്ടും. ഒറ്റപ്പെട്ടയിടങ്ങളില് വ്യാഴാഴ്ച വരെ മണിക്കൂറില് 40- 50 കിലോമീറ്റർ വേഗതയില് കാറ്റിനും സാദ്ധ്യതയുണ്ട്. കേരളം - കർണാടക - ലക്ഷദ്വീപ് തീരങ്ങളില് വ്യാഴാഴ്ചവരെ മത്സ്യബന്ധനം ഒഴിവാക്കണം.
മഴ തുടരുന്ന സാഹചര്യത്തിൽ കാസർകോട്, കണ്ണൂർ, വയനാട്, കോഴിക്കോട്, തൃശൂർ, എറണാകുളം, ഇടുക്കി, കോട്ടയം, ആലപ്പുഴ, പത്തനംതിട്ട എന്നീ ജില്ലകളിലെ വിദ്യാഭ്യാസ സ്ഥാപനങ്ങള്ക്ക് ഇന്ന് അവധി പ്രഖ്യാപിച്ചു. എന്നാല് കണ്ണൂർ, കോഴിക്കോട് ജില്ലകളിലെ പ്രൊഫഷണല് കോളേജുകള്ക്ക് അവധിയില്ല.
