പറവൂർ: പ്രായപൂർത്തിയാകാത്ത രണ്ട് പെണ്കുട്ടികള്ക്കും ഒരു ആണ്കുട്ടിക്കും കള്ള് നല്കിയ സംഭവത്തില് ഷാപ്പ് ലൈസൻസിക്കും തൊഴിലാളിക്കുമെതിരെ പറവൂർ പോലീസ് കേസെടുത്തു.
കള്ള് കുടിച്ച് മടങ്ങിയ കുട്ടികള്ക്ക് ദേഹാസ്വാസ്ഥ്യം അനുഭവപ്പെട്ടതിനെ തുടർന്ന് ബന്ധുക്കള് നല്കിയ പരാതിയുടെ അടിസ്ഥാനത്തിലാണ് നടപടി.
ശനിയാഴ്ചയാണ് മൂവർസംഘം പറവൂർ-ചെറായി റോഡില് പാടത്ത് പ്രവർത്തിക്കുന്ന കള്ള് ഷാപ്പിലെത്തിയത്. 16 വയസ്സുള്ള രണ്ട് പെണ്കുട്ടികള്ക്കൊപ്പം പ്രായപൂർത്തിയാകാത്ത ആണ്കുട്ടിയുമുണ്ടായിരുന്നു. ഷാപ്പില്നിന്ന് കള്ള് കുടിച്ച ശേഷം മൂവരും ബസില് യാത്ര ചെയ്യുന്നതിനിടെ പെണ്കുട്ടികളിലൊരാള് അമിതമായി ഛർദിച്ചു. മുനമ്പം ഭാഗത്ത് ബസ് ഇറങ്ങിയതോടെ പെണ്കുട്ടി തളർന്നുവീഴുകയും ചെയ്തു.
വിവരമറിഞ്ഞ് മുനമ്പം പോലീസ് സ്ഥലത്തെത്തി കുട്ടികളെ ബന്ധുക്കള്ക്കൊപ്പം ആശുപത്രിയില് പ്രവേശിപ്പിച്ചു. അമിതമായി കള്ള് കഴിച്ചതാണ് ഛർദിയും മറ്റ് അസ്വസ്ഥതകളും ഉണ്ടാകാൻ കാരണമെന്ന് പരിശോധനയില് വ്യക്തമായി. തുടർന്ന് കുട്ടികളുടെ ബന്ധുക്കള് പറവൂർ പോലീസില് പരാതി നല്കി. ഇതിന്റെ അടിസ്ഥാനത്തിലാണ് ഷാപ്പ് ലൈസൻസിക്കും ജീവനക്കാരനുമെതിരെ കേസെടുത്തത്.
