ചെന്നൈ: ആകാശ ഇന്ധനമായ ഏവിയേഷൻ ടർബൈൻ ഫ്യൂവലിന്‍റെ മൂല്യവർദ്ധിത നികുതി വൻതോതില്‍ വെട്ടിക്കുറച്ച തമിഴ്‌നാട് സർക്കാരിന് കേന്ദ്ര സർക്കാരിന്‍റെ അപൂർവ്വ പ്രശംസ.
ക്രൂഡ് ഓയില്‍ വില കുതിച്ചുയരുന്ന സാഹചര്യത്തില്‍ വിമാനക്കമ്പനികള്‍ക്ക് ആശ്വാസമേകുന്നതാണ് തമിഴ്‌നാട് സർക്കാരിന്‍റെ ഈ തീരുമാനം.
ചെന്നൈയില്‍ എടിഎഫ് നികുതി 29 ശതമാനത്തില്‍ നിന്ന് 16 ശതമാനമായും, സംസ്ഥാനത്തെ മറ്റ് വിമാനത്താവളങ്ങളില്‍ ഇത് വെറും ഒരു ശതമാനമായും കുറച്ചു. സിവിലിയൻ വ്യോമയാന മന്ത്രി റാം മോഹൻ നായിഡുവാണ് തമിഴ്‌നാട് മുഖ്യമന്ത്രി വിജയ്‍യുടെ ഈ നടപടിയെ പ്രശംസിച്ച്‌ രംഗത്തെത്തിയത്.
വിമാന യാത്ര കൂടുതല്‍ ജനകീയമാക്കുന്നതില്‍ കേന്ദ്ര-സംസ്ഥാന സർക്കാരുകള്‍ തമ്മിലുള്ള ഇത്തരം ഏകോപനം നിർണായകമാണെന്ന് റാം മോഹൻ നായിഡു എക്സില്‍ കുറിച്ചു. ജിഎസ്ടി പരിധിക്ക് പുറത്തുള്ള എടിഎഫിന് സ്വന്തം നിലയില്‍ നികുതി നിശ്ചയിക്കാൻ സംസ്ഥാനങ്ങള്‍ക്ക് സ്വാതന്ത്ര്യമുണ്ട്.
ഒരു വിമാനക്കമ്പനിയുടെ പ്രവർത്തനച്ചെലവിന്‍റെ 30 മുതല്‍ 40 ശതമാനം വരെ സാധാരണയായി ഇന്ധനവിലയാണ്. എന്നാല്‍ നിലവിലെ സാഹചര്യത്തില്‍ ഇത് 55 മുതല്‍ 60 ശതമാനം വരെയായി വർദ്ധിച്ചിരിക്കുകയാണ്.
ഈ ഫെബ്രുവരിയില്‍ യുഎസ്-ഇറാൻ യുദ്ധം പൊട്ടിപ്പുറപ്പെട്ടതുമുതല്‍ ജെറ്റ് ഇന്ധന വില തുടർച്ചയായി ഉയരുകയാണ്. യുദ്ധം അവസാന ലക്ഷണങ്ങള്‍ കാണിക്കാത്തതിനാല്‍ എടിഎഫ് വിലക്കയറ്റവും വ്യോമാതിർത്തി അടച്ചിടലുകളും കാരണം ലോകമെമ്പാടുമുള്ള വിമാനക്കമ്പനികള്‍ പ്രതിസന്ധിയിലാണ്.
