കോഴിക്കോട്: വിവാഹം മുടക്കിയെന്ന തെറ്റിദ്ധാരണയില്‍ പേരാമ്പ്ര ചേനോളിയില്‍ യുവാവിനെയും ഭാര്യയെയും ഭീഷണിപ്പെടുത്തുകയും ആക്രമണം നടത്തുകയും ചെയ്ത രണ്ടു ഗുണ്ടകളെ തേടി പേരാമ്പ്ര പൊലീസിന്റെ അന്വേഷണം തുടരുന്നു.
ചേനോളി കുണ്ടുങ്ങല്‍ താഴെ മണ്ണച്ചാംകണ്ടി റഷീദിന് (45) ആണ് വ്യാഴാഴ്ച രാത്രി ഒൻപതരയോടെ ക്രൂരമർദനമേറ്റത്. കാറിലെ പെട്രോള്‍ തീർന്നെന്നും പേരാമ്പ്രയില്‍ പോയി പെട്രോള്‍ വാങ്ങാൻ ഓട്ടോറിക്ഷയുമായി വരാമോയെന്നും ചോദിച്ചാണ് പ്രതികള്‍ റഷീദിനെ വീട്ടിലെത്തി കണ്ടത്.
പെട്രോള്‍ വാങ്ങാൻ ഒരു കാൻ കിട്ടുമോ എന്നു ചോദിച്ചതു പ്രകാരം അതുമെടുത്താണ് റഷീദ് ഓട്ടോയുമായി റോഡിലെത്തിയത്. ഇതിനു പിന്നാലെ അയല്‍വാസി ഏല്‍പിച്ച ക്വട്ടേഷൻ ആണെന്നു പറഞ്ഞ് റഷീദിനെ മുളകുപൊടി എറിഞ്ഞ ശേഷം ആക്രമിച്ചുവെന്നാണ് പരാതി. കാഴ്ച മറഞ്ഞ റഷീദിനെ അക്രമി സംഘം ഇരുമ്പു കട്ട ഉപയോഗിച്ച് നെറ്റിയില്‍ ഇടിച്ചു പരുക്കേല്‍പിക്കുകയും ചവിട്ടി വീഴ്ത്തുകയും ചെയ്തു.
ഇതിനു പിന്നാലെ റഷീദിന്റെ വീടിന്റെ വരാന്തയിലേക്ക് അതിക്രമിച്ചു കയറിയ സംഘം ഭാര്യ ഷംനയെ കൊലപ്പെടുത്തുമെന്ന് ഭീഷണിപ്പെടുത്തി. റഷീദിന്റെ നിലവിളി കേട്ട് നാട്ടുകാർ ഓടിവരുമ്പോഴേക്കും അക്രമികള്‍ കടന്നുകളയുകയായിരുന്നു. സാരമായി പരുക്കേറ്റ റഷീദ് പേരാമ്പ്ര താലൂക്ക് ആശുപത്രിയില്‍ ചികിത്സ തേടി. റഷീദിന്റെ നെറ്റിയിലെ മുറിവില്‍ നാലു തുന്നലുണ്ട്. ഒരു മാസം മുൻപ് അയല്‍വാസി ഫോണില്‍ വിളിച്ച്‌ കൊല്ലുമെന്നും തന്നെയും ഭാര്യയെയും വീല്‍ചെയറില്‍ കിടത്തുമെന്നു ഭീഷണിപ്പെടുത്തിയതായാണ് റഷീദ് ആരോപിക്കുന്നത്.
