തൃശൂര്: പെരിഞ്ഞനത്ത് ദേശീയപാത 66ല് സ്വകാര്യ ബസ് ബോര്വെല് ഡ്രില്ലിങ് വാഹനത്തില് ഇടിച്ച് അപകടം.
രാവിലെ 6.45ഓടെയാണ് അപകടം ഉണ്ടായത്.
ബസ്സിന് കാര്യമായ കേടുപാടുകള് സംഭവിച്ചെങ്കിലും യാത്രക്കാര് പരിക്കേല്കാതെ രക്ഷപ്പെട്ടു.
ഗുരുവായൂരില് നിന്ന് കൊടുങ്ങല്ലൂരിലേക്ക് പോകുകയായിരുന്ന ബസ്സാണ് അപകടത്തില്പ്പെട്ടത്.
ഇതേ ദിശയില് സഞ്ചരിച്ചിരുന്ന ബോര്വെല് ഡ്രില്ലിങ് വാഹനത്തെ മറികടക്കുന്നതിനിടെയാണ് കൂട്ടിയിടിച്ചത്.
അപകടത്തെ തുടര്ന്ന് ദേശീയപാതയില് ഗതാഗതം തടസപ്പെട്ടു.
പിന്നാലെ പെരിഞ്ഞനം പൊലീസ് സ്ഥലത്തെത്തി വാഹനങ്ങള് നീക്കം ചെയ്ത് ഗതാഗതം പുനഃസ്ഥാപിച്ചു.
