കൊച്ചി : തൃക്കാക്കര ഭാരത് മാതാ കോളേജിലെ മോര്ഫിങ് കേസില് മുഖ്യപ്രതി സനീഷിനെ കസ്റ്റഡിയില് വാങ്ങാന് അന്വേഷണ സംഘം ഇന്ന് കോടതിയില് അപേക്ഷ നല്കും. അനീഷ് ആരംഭിച്ച പ്രീമിയം ഗ്രൂപ്പിന്റെയടക്കം കൂടുതല് വിശദാംശങ്ങള് പൊലീസിന് ലഭിച്ചു. ഗ്രൂപ്പ് അഡ്മിന്മാര്, അംഗങ്ങള് എന്നിവരെ സംബന്ധിക്കുന്ന സുപ്രധാന വിവരങ്ങളാണ് പൊലീസിന് ലഭിച്ചിരിക്കുന്നത്.
പണത്തിനായി മോര്ഫ് ചെയ്ത ചിത്രങ്ങള് സനീഷ് പങ്കുവെച്ചെന്ന് പറയപ്പെടുന്ന ടെലഗ്രാം ഗ്രൂപ്പിലെ അംഗങ്ങളെ കുറിച്ചുള്ള വിവരങ്ങളടക്കം കണ്ടെത്താനുള്ള ശ്രമത്തിന്റെ ഭാഗമായാണ് പൊലീസ് ടെലഗ്രാമിനെ സമീപിച്ചത്. ടെലഗ്രാം ഗ്രൂപ്പില് നിന്നും ഒരു ജാര്ഖണ്ഡ് നമ്പറും ലഭിച്ചിട്ടുണ്ട്. മലയാളികള് ജാര്ഖണ്ഡില് നിന്നും സംഘടിപ്പിച്ച നമ്പരാണോ ഇതെന്നും പരിശോധിക്കുന്നുണ്ട്.
കൂടുതല് വിവരങ്ങള് തേടി വീണ്ടും പൊലീസ് ടെലഗ്രാമിന് കത്ത് നല്കിയിട്ടുണ്ട്. 4 ടെലഗ്രാം ഗ്രൂപ്പുകളില് പൊലീസ് നിര്ണായകമായ അന്വേഷണം നടത്തുന്നുണ്ട്. വിശദമായ പരിശോധനക്ക് ശേഷം കൂടുതല് പേരെ ചോദ്യം ചെയ്യും. ആലപ്പുഴ സ്വദേശിയായ സനീഷിനെ കസ്റ്റഡിയില് ലഭിച്ചാല് കൂടുതല് വിവരങ്ങള് ലഭിക്കുമെന്നാണ് പൊലീസിന്റെ വിലയിരുത്തല്. സംഭവത്തില് കൂടുതല് പ്രതികളിലെത്താനും ഇയാളെ ചോദ്യം ചെയ്യുന്നതിലൂടെ കഴിയും.
നിലവിൽ പോക്സോ കേസ് അടക്കം സനീഷിനെതിരെ ചുമത്തിയിട്ടുണ്ട്. കേസുമായി ബന്ധപ്പെട്ട് അറസ്റ്റിലായ സനീഷിന്റെയും ശ്രീഹരിയുടെയും ഫോണുകള്, ലാപ്ടോപ്പുകള് എന്നിവയുടെ പരിശോധനാ ഫലവും പുറത്തുവരാനുണ്ട്. ഇത് അന്വേഷണത്തില് നിര്ണായകമാകുമെന്നും അന്വേഷണ സംഘം പറയുന്നു. കേരളത്തിലെ മറ്റ് കോളേജുകളില് നടന്ന മോര്ഫിങ് കേസുകളുമായി തൃക്കാക്കര സംഭവത്തെ ബന്ധിപ്പിക്കുന്ന കണ്ണികള് ഉണ്ടോയെന്നും പരിശോധിക്കുന്നുണ്ട്.
