തിരുവനന്തപുരം: വിഴിഞ്ഞം തുറമുഖ പദ്ധതിയെ ചൊല്ലിയുള്ള വിവാദത്തില് മുഖ്യമന്ത്രി വി.ഡി. സതീശനെതിരെ രൂക്ഷ വിമർശനവുമായി സി.പി.എം കേന്ദ്ര കമ്മിറ്റി അംഗവും മുൻ ധനമന്ത്രിയുമായ തോമസ് ഐസക്. വിഷയത്തില് മുഖ്യമന്ത്രി ഒളിച്ചുകളിക്കുകയാണെന്നും പദ്ധതിയുമായി ബന്ധപ്പെട്ട കാര്യങ്ങളില് വ്യക്തമായ വിശദീകരണം നല്കാന് സർക്കാർ തയ്യാറാകുന്നില്ലെന്നും അദ്ദേഹം ആരോപിച്ചു.
വിഴിഞ്ഞം പദ്ധതിയുമായി ബന്ധപ്പെട്ട് അഭിപ്രായവ്യത്യാസമുള്ളത് കോണ്ഗ്രസിനുള്ളിലാണെന്നും തോമസ് ഐസക് പറഞ്ഞു. കെ.സി. വേണുഗോപാലിനും രാഹുല് ഗാന്ധിക്കും അദാനി വിഷയത്തില് ഒരേ നിലപാടാണുള്ളതെങ്കിലും, യു.ഡി.എഫില് പോലും ചര്ച്ച ചെയ്യാതെയാണ് ഓഹരി കൈമാറ്റം നടന്നതെന്നും അദ്ദേഹം വിമര്ശിച്ചു.
2014-ല് ഉമ്മൻചാണ്ടി സര്ക്കാരിന്റെ കാലത്താണ് വിഴിഞ്ഞം കരാര് ഒപ്പിട്ടതെന്നും അന്നുതന്നെ എല്.ഡി.എഫ് നിലപാട് വ്യക്തമാക്കിയിരുന്നുവെന്നും അദ്ദേഹം പറഞ്ഞു. 2016-ലെ പ്രകടനപത്രികയിലും അതേ നിലപാട് ആവര്ത്തിച്ചിരുന്നുവെന്നും ഐസക് കൂട്ടിച്ചേര്ത്തു.
വിഴിഞ്ഞം കരാറിന് പിന്നിലെ ക്രമക്കേടുകളുടെ വ്യാപ്തി ഈ സർക്കാർ അധികാരത്തിലെത്തിയ ശേഷമാണ് വ്യക്തമായതെന്നും തോമസ് ഐസക് ആരോപിച്ചു. എം.എസ്.സിയുമായുള്ള കരാര് ചര്ച്ചകളില്ലാതെയാണ് പ്രഖ്യാപിച്ചതെന്നും എം.എസ്.സി കമ്പനിയെ എതിര്ക്കുന്നില്ലെന്നും അദ്ദേഹം വ്യക്തമാക്കി. എന്നാല് വിഷയവുമായി ബന്ധപ്പെട്ട് മുഖ്യമന്ത്രി ചാര്ട്ടേഡ് വിമാനത്തില് യാത്ര നടത്തിയതില് ദുരൂഹതയുണ്ടെന്നും ഐസക് വിമര്ശിച്ചു.
