കൊച്ചി: മലയാള സിനിമയിലെ എവർഗ്രീൻ ക്ലാസിക്കുകളിലൊന്നായ തേന്മാവിന്‍ കൊമ്പത്ത് വീണ്ടും തിയറ്ററുകളിലേക്ക് എത്താന്‍ ഒരുങ്ങുകയാണ്.
മോഹൻലാല്‍- പ്രിയദർശൻ കൂട്ടുകെട്ടില്‍ 1994 ല്‍ പുറത്തെത്തിയ ചിത്രം പുതിയ സാങ്കേതിക മികവോടെ ഒക്ടോബർ 8 ന് ആഗോളതലത്തില്‍ വീണ്ടും തിയറ്ററുകളിലെത്തുകയാണ്. അതിന് മുന്നോടിയായി ചിത്രത്തിന്റെ റീ റിലീസ് ട്രെയ്‍ലറും അണിയറക്കാര്‍ പുറത്ത് വിട്ടിട്ടുണ്ട്. പ്രിയദർശൻ്റെ സോഷ്യല്‍ മീഡിയ പേജിലൂടെയാണ് ട്രെയ്‌ലർ റിലീസ് ചെയ്തത്. മോഹൻലാല്‍, ശോഭന, നെടുമുടി വേണു എന്നിവർ പ്രധാന വേഷങ്ങളിലെത്തിയ ചിത്രം പ്രിയദർശൻ രചനയും സംവിധാനവും നിർവ്വഹിച്ച സിനിമയാണ്. പ്രസിദ്ധി ക്രിയേഷൻസിന്റെയും സൂര്യ സിനി ആർട്സിന്റെയും ബാനറില്‍ എൻ ഗോപാലകൃഷ്ണനാണ് ചിത്രം നിർമ്മിച്ചത്. റീ റിലീസിനായി ചിത്രം 4K യില്‍ റീമാസ്റ്റർ ചെയ്തത് മാറ്റിനി നൗവും ഇ ഫോർ എന്റർടെയ്ൻമെന്റ്സും ചേർന്നാണ്.
മൂന്ന് പതിറ്റാണ്ടിലേറെ പഴക്കമുള്ള ചിത്രത്തിന്റെ പഴയ ഓർമ്മകളിലേക്ക് വീണ്ടും കൂട്ടിക്കൊണ്ടുപോകുന്നതിനൊപ്പം പുതിയൊരു തിയറ്റർ അനുഭവത്തിന്റെ പ്രതീക്ഷയും നല്‍കുന്നതാണ് പുറത്തുവന്ന ട്രെയ്‌ലർ. മാണിക്യൻ, കാർത്തുമ്പി, ശ്രീകൃഷ്ണൻ തമ്പുരാൻ തുടങ്ങിയ കഥാപാത്രങ്ങളെയും ചിത്രത്തിന്റെ ഗ്രാമീണ പശ്ചാത്തലത്തെയും പ്രണയവും നർമ്മവും നിറഞ്ഞ മുഹൂർത്തങ്ങളെയും വീണ്ടും ബിഗ് സ്ക്രീനിലേക്ക് കൊണ്ടുവരുന്ന ട്രെയ്‌ലർ ചിത്രത്തിന്റെ ഗൃഹാതുരത്വം നിലനിർത്തുന്നുണ്ട്. 4K ദൃശ്യ മികവിലാണ് ഓരോ ഫ്രെയിമും പുതിയ രൂപത്തില്‍ എത്തുന്നത്. ചിത്രത്തിന്റെ ഒറിജിനല്‍ 35എംഎം നെഗറ്റീവ് 4Kയില്‍ സ്കാൻ ചെയ്ത് സൂപ്പർ 4K നിലവാരത്തിലേക്ക് ഡിജിറ്റല്‍ റീസ്റ്റോർ ചെയ്താണ് പുതിയ പതിപ്പ് ഒരുക്കിയിരിക്കുന്നത്. കെ വി ആനന്ദിന്റെ ഛായാഗ്രഹണ മികവ് പുതിയ ദൃശ്യ നിലവാരത്തില്‍ വീണ്ടും ബിഗ് സ്ക്രീനില്‍ കാണാനാകുമെന്ന പ്രത്യേകതയും റീ റിലീസിനുണ്ട്. ഒറിജിനല്‍ ചിത്രത്തിന്റെ ഭാവവും ദൃശ്യസ്വഭാവവും നിലനിർത്തിക്കൊണ്ടാണ് റീമാസ്റ്ററിംഗ് പൂർത്തിയാക്കിയിരിക്കുന്നത്.
ദൃശ്യമികവിനൊപ്പം ഡോള്‍ബി അറ്റ്‌മോസ് ശബ്ദ സാങ്കേതികവിദ്യയും പുതിയ പതിപ്പിന്റെ പ്രധാന ആകർഷണമാണ്. ചിത്രത്തിലെ ഗാനങ്ങള്‍ക്കും പശ്ചാത്തല സംഗീതത്തിനും ശബ്ദങ്ങള്‍ക്കും കൂടുതല്‍ തിയറ്റർ അനുഭവം നല്‍കുന്ന തരത്തിലാണ് പുതിയ സൗണ്ട് മിക്സ് ഒരുക്കിയിരിക്കുന്നത്. ബേണി- ഇഗ്നേഷ്യസിന്റെ സംഗീതവും ഗിരീഷ് പുത്തഞ്ചേരിയുടെ ഗാനങ്ങളും ഇന്നും പ്രേക്ഷകരുടെ പ്രിയപ്പെട്ടവയാണ്. 4K ദൃശ്യങ്ങളും ഡോള്‍ബി അറ്റ്‌മോസ് ശബ്ദവും ഒരുമിക്കുന്നതോടെ 'തേന്മാവിൻ കൊമ്പത്ത്' വീണ്ടും ബിഗ് സ്ക്രീനില്‍ കാണാനുള്ള ആകാംക്ഷ വർധിപ്പിക്കുന്നതാണ് ട്രെയ്‌ലർ.
മാണിക്യനും കാർത്തുമ്പിയും വീണ്ടും തിയറ്ററുകളിലെത്തുമ്പോള്‍ മലയാള സിനിമയുടെ പ്രിയപ്പെട്ടൊരു കാലഘട്ടത്തിലേക്കുള്ള തിരിച്ചുവരവ് കൂടിയാകും ഈ റീ റിലീസ്. മോഹൻലാല്‍, ശോഭന, നെടുമുടി വേണു, ശ്രീനിവാസൻ, കവിയൂർ പൊന്നമ്മ, കെപിഎസി ലളിത, സുകുമാരി, കുതിരവട്ടം പപ്പു, ശങ്കരാടി, ഗീത വിജയൻ, സോണിയ തുടങ്ങിയവരാണ് ചിത്രത്തിലെ പ്രധാന താരങ്ങള്‍. ദേശീയ ചലച്ചിത്ര പുരസ്കാരങ്ങളില്‍ ഛായാഗ്രഹണത്തിന് കെ വി ആനന്ദിനും പ്രൊഡക്ഷൻ ഡിസൈനിന് സാബു സിറിളിനും അംഗീകാരം ലഭിച്ച ചിത്രം അഞ്ച് കേരള സംസ്ഥാന ചലച്ചിത്ര പുരസ്കാരങ്ങളും സ്വന്തമാക്കിയിരുന്നു.
രചന, സംവിധാനം പ്രിയദർശൻ, നിർമ്മാതാവ് എൻ ഗോപാലകൃഷ്ണൻ, ബാനർ പ്രസിദ്ധി ക്രിയേഷൻസ്, സൂര്യ സിനി ആർട്സ്, ഛായാഗ്രഹണം കെ വി ആനന്ദ്, സംഗീതം ബേണി- ഇഗ്നേഷ്യസ്, പശ്ചാത്തല സംഗീതം എസ് പി.വെങ്കടേഷ്, എഡിറ്റിംഗ് എൻ ഗോപാലകൃഷ്ണൻ, ഗാനരചന ഗിരീഷ് പുത്തഞ്ചേരി, സംഘട്ടനം ത്യാഗരാജൻ, പ്രൊഡക്ഷൻ ഡിസൈൻ സാബു സിറില്‍, ഡിജിറ്റല്‍ മാർക്കറ്റിംഗ് ഉണ്ണി രാജേന്ദ്രൻ, പിആർഒ ഐശ്വര്യ രാജ്.
