കോട്ടയം: തെങ്ങണയില്‍ എട്ടു കിലോമീറ്റർ ദൂരം അപകടകരമായി വാഹനമോടിച്ച യുവാവ് മദ്യപിച്ചിരുന്നതായി പോലീസ്.
യുവാവിനെതിരെ ശക്തമായ നടപടി സ്വീകരിക്കും.
ലൈസൻസ് ഉള്‍പ്പെടെ റദ്ദാക്കുമെന്നും പോലീസ് അറിയിച്ചു.
തിരുവല്ലയില്‍ നിന്ന് വാടകയ്ക്കെടുത്ത കാറില്‍ എത്തിയ 18 വയസ്സുകാരൻ എട്ടു കിലോമീറ്ററോളം അമിതവേഗത്തില്‍ പാഞ്ഞ് ഒരു ഡസനിലേറെ വാഹനങ്ങളില്‍ ഇടിച്ചുതെറിപ്പിക്കുകയായിരുന്നു. സംഭവത്തില്‍ തിരുവല്ല റെയില്‍വേ സ്റ്റേഷനു സമീപം താമസിക്കുന്ന ഗോകുല്‍ (18)-നെ ആണ് തൃക്കൊടിത്താനം പോലീസ് അറസ്റ്റ് ചെയ്തത്.
യുവാവിനെ വൈദ്യപരിശോധനയ്ക്ക് വിധേയനാക്കിയിരുന്നു. പരിശോധനാഫലം വന്നപ്പോള്‍ മദ്യപിച്ചതായി തെളിഞ്ഞിട്ടുണ്ട്. നിയമനടപടികള്‍ക്കൊപ്പം യുവാവിന്റെ ലൈസൻസ് ഉള്‍പ്പെടെ റദ്ദാക്കുമെന്നും പോലീസ് പറഞ്ഞു.
കഴിഞ്ഞ ദിവസം വൈകീട്ടായിരുന്നു അപകടപരമ്പര. തിരുവല്ലയില്‍ നിന്ന് ചങ്ങനാശ്ശേരി ഭാഗത്തേക്ക് വരികയായിരുന്ന ഗോകുല്‍ ഓടിച്ചിരുന്ന ഇന്നോവ ആദ്യം പായിപ്പാട് മുണ്ടുകോട്ട ഭാഗത്തുവച്ച്‌ സ്കൂട്ടറില്‍ സഞ്ചരിച്ചിരുന്ന നന്ദിതയെ (21) ഇടിച്ചുവീഴ്ത്തി.
തിരുവല്ലയിലെ സ്വകാര്യ ആശുപത്രിയില്‍ ജോലിക്ക് സ്കൂട്ടറില്‍ പോവുകയായിരുന്നു നന്ദിത. അപകടത്തില്‍ കൈയ്ക്കും കാലിനും ഗുരുതരമായി പരുക്കേറ്റ യുവതി തിരുവല്ലയിലെ സ്വകാര്യ ആശുപത്രിയില്‍ ചികിത്സയിലാണ്.
ഇതിനുശേഷവും കാർ നിർത്താതെ അമിതവേഗത്തില്‍ പാഞ്ഞു. തൃക്കൊടിത്താനം വഴി തെങ്ങണയിലെത്തിയ കാർ കണ്ണോട്ടയില്‍വച്ച്‌ ആറു വാഹനങ്ങളില്‍ക്കൂടി ഇടിച്ചതായി പോലീസ് പറഞ്ഞു.
