കോട്ടയം: പ്രായപൂർത്തിയാകാത്തവരുടെ മരണപ്പാച്ചിലും യുവാക്കളുടെ ലഹരി നുണഞ്ഞുള്ള അമിതവേഗവും നിരത്തുകളെ ചോരക്കളമാക്കുന്നത് പതിവായതോടെ മോട്ടോർ വാഹനവകുപ്പ് ഉണരുന്നു.
കഴിഞ്ഞ മൂന്നാഴ്ചത്തെ ദാരുണ അപകടങ്ങളുടെ പശ്ചാത്തലത്തിലാണ് നിയമലംഘകരെ പൂട്ടാൻ പരിശോധന കടുപ്പിക്കുന്നത്.
തെങ്ങണയില്‍ നിരവധി വാഹനങ്ങള്‍ ഇടിച്ചുതെറിപ്പിച്ച്‌ പാഞ്ഞ 18കാരന്റെ കാർ നാട്ടുകാർ ജീവൻ പണയംവച്ച്‌ തടയേണ്ടി വന്ന സംഭവം നമ്മുടെ റോഡുകളിലെ ഭീതിയുടെ നേർച്ചിത്രമാണ്.
നെടുമ്പാശേരിയില്‍ മദ്യപിച്ചെത്തിയ കാറിടിച്ച്‌ മൂന്ന് ജീവനുകള്‍ പൊലിഞ്ഞതും, ചേരാനല്ലൂരില്‍ ലൈസൻസില്ലാത്ത കുട്ടിഡ്രൈവറുടെ വാഹനം തട്ടുകടക്കാരന്റെ ജീവനെടുത്തതും സമീപകാല സംഭവമാണ്.
തെങ്ങണയില്‍ ടയർ പൊട്ടി തീപ്പൊരി പറന്നിട്ടും ഇന്നോവയുമായി അമിതവേഗതയില്‍ കുതിക്കുകയായിരുന്നു 18 കാരൻ. പാമ്പാടിയില്‍ കുട്ടികളെ കാറിന്റെ ബോണറ്റിലിരുത്തിയും, ഈരാറ്റുപേട്ടയില്‍ വിവാഹാഘോഷത്തിന്റെ ഭാഗമായി അപകടകരമായ രീതിയില്‍ യാത്ര നടത്തിയതും അടുത്തിടെയാണ്.
ട്രാൻസ്‌പോർട്ട് കമ്മിഷണറുടെ നിർദ്ദേശപ്രകാരം സ്‌കൂളുകള്‍ കേന്ദ്രീകരിച്ചും കുട്ടികള്‍ ഒത്തുചേരുന്ന പ്രധാന കേന്ദ്രങ്ങളിലും എൻഫോഴ്‌സ്‌മെന്റ് സ്‌ക്വാഡുകള്‍ പരിശോധന ശക്തമാക്കും.
പ്രായപൂർത്തിയാകാത്തവർ വാഹനമോടിച്ചാല്‍ :
രക്ഷിതാവ് അല്ലെങ്കില്‍ വാഹന ഉടമയ്ക്കെതിരെ കർശന നടപടി.
ലൈസൻസില്ലാതെ വാഹനമോടിച്ചാല്‍ 10,000 രൂപ അധിക പിഴ
വാഹനത്തിന്റെ രജിസ്‌ട്രേഷൻ ഒരു വർഷത്തേക്ക് റദ്ദാക്കും
കുട്ടിക്കെതിരെ ജുവനൈല്‍ ജസ്റ്റിസ് നിയമപ്രകാരമുള്ള നടപടി
റീല്‍സ് ചിത്രീകരണത്തിനായി റോഡുകളില്‍ യുവാക്കള്‍ നടത്തുന്ന വാഹന അഭ്യാസ പ്രകടനം അതിര് കടക്കുന്നതും അപകടം വിളിച്ചോതുന്നു. നിരപരാധികളായ യാത്രക്കാരാണ് പലപ്പോഴും ഇതിന് ഇരയാകുന്നത്.
മത്സര ഓട്ടവും, സ സ്റ്റണ്ടിംഗും നടത്തി മൊബൈലില്‍ ചിത്രീകരിച്ച ശേഷം നവമാദ്ധ്യമങ്ങളില്‍ പോസ്റ്റ് ചെയ്യുന്നത് ഒരുകൂട്ടർക്ക് ലഹരിയാണ്. ഇതിനായി പ്രത്യേക വാട്‌സ് ആപ്പ് ഗ്രൂപ്പുകളുമുണ്ട്. ആധുനിക നിലവാരത്തില്‍ ടാറിംഗ് നടത്തിയ നിരത്തുകളാണ് ഇതിനായി ഇവർ തിരഞ്ഞെടുക്കുന്നത്. ജി.പി.എസ്, ബ്ലൂ ടൂത്ത്, ക്യാമറ തുടങ്ങിയവയും ഒപ്പമുണ്ടാകും.
