കൊച്ചി: നിയമം ദുർബലമല്ലെന്നും എത്ര ഉന്നത പദവിയിലിരിക്കുന്നവരായാലും വിവേചനമില്ലാതെ നിയമം നടപ്പാക്കപ്പെടുമെന്നും ഹൈക്കോടതി.
അനധികൃത സ്വത്ത് സമ്പാദനക്കേസില് കോട്ടയം വിജിലൻസ് കോടതി വിധിച്ച നാലുവർഷത്തെ തടവുശിക്ഷ ചോദ്യം ചെയ്ത് മുൻ ഡിജിപി ടോമിൻ ജെ. തച്ചങ്കരി നല്കിയ അപ്പീല് പരിഗണിക്കവെയാണ് ജസ്റ്റിസ് എ. ബദറുദ്ദീൻ വാക്കാല് ഇക്കാര്യം വ്യക്തമാക്കിയത്.
കോട്ടയം വിജിലൻസ് കോടതി വിധിച്ച നാലുവർഷത്തെ തടവും 30.84 ലക്ഷം രൂപ പിഴയും മരവിപ്പിച്ച് അപ്പീല് തീർപ്പാകുന്നതുവരെ ജാമ്യം അനുവദിക്കണമെന്നാണ് തച്ചങ്കരിയുടെ ആവശ്യം. ഹർജിയില് വിശദമായ മറുപടി സത്യവാങ്മൂലം സമർപ്പിക്കാൻ സംസ്ഥാന വിജിലൻസ് സമയം ആവശ്യപ്പെട്ടു. തുടർന്ന് സെപ്റ്റംബർ 24നകം മറുപടി നല്കാൻ സർക്കാരിന് കോടതി സമയം അനുവദിച്ചു.
സാധാരണ കേസല്ലാത്തതിനാല് തച്ചങ്കരിയുടെ ഹർജിയില് തടസവാദം ഉന്നയിക്കാൻ അവസരം വേണമെന്നായിരുന്നു വിജിലൻസിന്റെ നിലപാട്. എന്നാല് ക്രിമിനല് നടപടിക്രമത്തിലെ വകുപ്പ് 389 പ്രകാരം പത്ത് വർഷത്തില് താഴെ ശിക്ഷ ലഭിച്ച കേസുകളില് പ്രോസിക്യൂഷന് രേഖാമൂലം മറുപടി സത്യവാങ്മൂലം സമർപ്പിക്കാൻ പ്രത്യേക അവകാശമില്ലെന്ന് തച്ചങ്കരിയുടെ അഭിഭാഷകൻ വാദിച്ചു. ഇത്രയും പഴക്കമുള്ള കേസില് ഇത്തരത്തില് സമയം ആവശ്യപ്പെടുന്നത് ആദ്യമായാണെന്നും സമയം നീട്ടി നല്കരുതെന്നും അഭിഭാഷകൻ ആവശ്യപ്പെട്ടു.
നിയമത്തില് രേഖാമൂലമുള്ള തടസവാദം സമർപ്പിക്കുന്നതിന് വിലക്കില്ലെന്നും അസാധാരണ സാഹചര്യങ്ങളില് പ്രോസിക്യൂഷന് മറുപടി നല്കാൻ കോടതിക്ക് വിവേചനാധികാരം ഉപയോഗിച്ച് സമയം അനുവദിക്കാമെന്നും ജസ്റ്റിസ് ബദറുദ്ദീൻ വ്യക്തമാക്കി. "എല്ലാ ഡിജിപിമാർക്കും ചീഫ് സെക്രട്ടറിമാർക്കും എന്തിന് മുഖ്യമന്ത്രിമാർക്കും പ്രധാനമന്ത്രിമാർക്കും വരെയുള്ള സന്ദേശമാണിത്. നിയമവും നിയമപുസ്തകങ്ങളും അത്ര ദുർബലമല്ല; അതുകൊണ്ട് എത്ര ഉയർന്ന പദവിയിലുള്ളവരായാലും അവരുടെ പദവി നോക്കാതെ, യാതൊരു വിവേചനവുമില്ലാതെ നിയമം നടപ്പിലാക്കപ്പെടും" എന്നായിരുന്നു കോടതിയുടെ വാക്കുകള്.
തുടർന്ന് വിജിലൻസിന്റെ മറുപടി സത്യവാങ്മൂലം സമർപ്പിക്കുന്നതിനായി കേസ് സെപ്റ്റംബർ 24ലേക്ക് മാറ്റി. ശിക്ഷ മരവിപ്പിച്ച് ഇടക്കാല ജാമ്യം അനുവദിക്കണമെന്ന തച്ചങ്കരിയുടെ ആവശ്യത്തില് കോടതി ഈ ഘട്ടത്തില് ഇടക്കാല ഉത്തരവ് പുറപ്പെടുവിച്ചില്ല.
2003 മുതല് 2007 വരെയുള്ള കാലയളവില് ഔദ്യോഗിക പദവിയിലിരിക്കെ വരുമാനത്തില് കവിഞ്ഞ് സ്വത്ത് സമ്പാദിച്ചെന്ന കേസിലാണ് തച്ചങ്കരിയെ കോട്ടയം വിജിലൻസ് കോടതി കുറ്റക്കാരനെന്ന് കണ്ടെത്തി നാലുവർഷത്തെ തടവിനും 30.84 ലക്ഷം രൂപ പിഴയ്ക്കും ശിക്ഷിച്ചത്.
