ന്യൂ ചണ്ഡീഗഢ്: സയ്യദ് മുഷ്താഖ് അലി ട്വന്റി - 20 ടൂർണമെന്റിൽ കേരളം കരുത്തരായ മഹാരാഷ്ട്രയെ 94 റൺസിന് കീഴടക്കി.
ആദ്യം ബാറ്റ് ചെയ്ത കേരളം 20 ഓവറിൽ എട്ട് വിക്കറ്റ് നഷ്ടത്തിൽ 211 റൺസെടുത്തു.
മറുപടിക്കിറങ്ങിയ മഹാരാഷ്ട്ര 16 ഓവറിൽ 117 റൺസിന് ഓൾഔട്ടാവുകയായിരുന്നു.
ക്യാപ്ടൻ സഞ്ജു സാംസൺന്റെയും (16 പന്തിൽ 47), രോഹൻ കുന്നുമ്മലിന്റെയും (47 പന്തിൽ 75) തകർപ്പൻ ബാറ്റിംഗും പേസർ എം.ഡി. നിധീഷിന്റെ അഞ്ച് വിക്കറ്റ് നേട്ടവുമാണ് കേരളത്തിന് ഉജ്ജ്വല വിജയം സമ്മാനിച്ചത്.
എം ഡി നിധീഷാണ് പ്ലെയർ ഓഫ് ദി മാച്ച്ടോസ് നേടി ബാറ്റിംഗ് തിരഞ്ഞെടുത്ത കേരളത്തിന് മുഹമ്മദ് അസ്ഹറുദ്ദീന്റെ (1) വിക്കറ്റ് തുടക്കത്തിൽ തന്നെ നഷ്ടമായെങ്കിലും തകർപ്പൻ ഫോമിലായിരുന്ന രോഹൻ കുന്നുമ്മലിന്റെ ഇന്നിംഗ്സ് തുണയായി.
രോഹനും അഹ്മദ് ഇമ്രാനും (13) ചേർന്ന് രണ്ടാം വിക്കറ്റിൽ 47 റൺസ് കൂട്ടിച്ചേർത്തു. അഹ്മദ് ഇമ്രാൻ വിക്കി ഓസ്വാളിന്റെ പന്തിൽ പുറത്തായി.
തുടർന്ന് ഒത്തുചേർന്ന സഞ്ജുവും രോഹനും മൂന്നാം വിക്കറ്റിൽ 26 പന്തുകളിൽ 66 റൺസാണ് കൂട്ടിച്ചേർത്തത്.
ആദ്യ പന്തിൽ തന്നെ പ്രശാന്ത് സോളങ്കിയെ ബൗണ്ടറി കടത്തിയാണ് സഞ്ജു തുടങ്ങിയത്.
സോളങ്കിയുടെ അടുത്ത ഓവറിൽ തുടരെ രണ്ട് സിക്സും ഒരു ബൗണ്ടറിയും നേടിയ സഞ്ജു, തനയ് സാംഘ്വിയുടെ ഓവറിൽ തുടരെ മൂന്ന് സിക്സുകൾ നേടി. വിക്കി ഓസ്വാളിന്റെ പന്തിലാണ് സഞ്ജു പുറത്തായത്.
രോഹൻ 47 പന്തുകളിൽ ഒൻപത് ഫോറും മൂന്ന് സിക്സുമടക്കമാണ് 75 റൺസ് നേടിയത്.
അവസാന ഓവറുകളിൽ സൽമാൻ നിസാറിന്റെ (പുറത്താകാതെ 13 പന്തിൽ 29) വെടിക്കെട്ട് ഷോട്ടുകൾ കൂടി ചേർന്നതോടെയാണ് കേരളത്തിന്റെ സ്കോർ 211ൽ എത്തിയത്.
മഹാരാഷ്ട്രയ്ക്ക് വേണ്ടി മുകേഷ് ചൗധരി മൂന്നും വിക്കി ഓസ്വാൾ രണ്ടും വിക്കറ്റുകൾ വീഴ്ത്തി.
മറുപടി ബാറ്റിംഗിന് ഇറങ്ങിയ മഹാരാഷ്ട്രയുടെ ബാറ്റിംഗ് നിര നിധീഷിന്റെ ഉജ്ജ്വല ബൗളിംഗിന് മുന്നിൽ തകർന്നടിയുകയായിരുന്നു.
ഇന്നിംഗ്സിലെ ആദ്യ പന്ത് തന്നെ സിക്സർ പറത്തിയാണ് മഹാരാഷ്ട്ര ക്യാപ്ടൻ പൃഥ്വി ഷാ തുടക്കമിട്ടത്.
എന്നാൽ ഓവറിലെ മൂന്നാം പന്തിൽ പൃഥ്വിയെ (6) നിധീഷ്, ഗോവിന്ദ് ദേവ് പൈയുടെ കൈകളിലെത്തിച്ചു.
ആർഷിൻ കുൽക്കർണ്ണി (5) കെ.എം. ആസിഫിന്റെ പന്തിൽ പുറത്തായി.
തൊട്ടടുത്ത ഓവറിൽ തുടരെയുള്ള പന്തുകളിൽ രാഹുൽ ത്രിപാഠിയെയും കിരൺ ചോർമാലെയെയും പുറത്താക്കി നിധീഷ് ആഞ്ഞടിച്ചതോടെ കളിയുടെ നിയന്ത്രണം കേരളത്തിന്റെ കൈകളിലായി.
നിധീഷിന് പുറമെ മൂന്ന് വിക്കറ്റ് വീഴ്ത്തിയ ബിജു നാരായണനും കേരള ബൗളിംഗ് നിരയിൽ തിളങ്ങി.






