തിരുവനന്തപുരം: പരീക്ഷാ ഹാളിലെയും മൂല്യനിർണയ ക്യാമ്പിലെയും ദൃശ്യങ്ങള്‍ പകർത്തി സോഷ്യല്‍ മീഡിയയില്‍ റീല്‍സുകളായി പങ്കുവെച്ച രണ്ട് എൻജിനീയറിങ് അധ്യാപികമാർക്കെതിരെ സാങ്കേതിക സർവകലാശാല (KTU) നടപടിയാരംഭിച്ചു.
സംഭവത്തില്‍ നേരിട്ട് ഹാജരായി വിശദീകരണം നല്‍കാൻ അധ്യാപികമാർക്ക് സർവകലാശാല നോട്ടീസ് നല്‍കി.
പരീക്ഷാ സ്റ്റാൻഡിങ് കമ്മിറ്റിക്ക് മുമ്പാകെ അധ്യാപികമാർ ഹാജരായി മൊഴി നല്‍കണം. ഇരുവരുടെയും വിശദീകരണം പരിശോധിച്ച ശേഷം സർവകലാശാല സിൻഡിക്കേറ്റ് യോഗം തുടർനടപടികള്‍ സ്വീകരിക്കും.
പരീക്ഷാ ഹാളിലെ പ്രവർത്തനങ്ങളും മൂല്യനിർണയ ക്യാമ്പിലെ അതീവ രഹസ്യസ്വഭാവമുള്ള ജോലികളും ചിത്രീകരിച്ച്‌ റീല്‍സാക്കി മാറ്റിയതിനെതിരെ വ്യാപകമായ പ്രതിഷേധം ഉയർന്നിരുന്നു. വിഷയം വിവാദമായതിനെ തുടർന്ന് ഇവർ സമൂഹമാധ്യമങ്ങളില്‍ നിന്ന് റീല്‍സുകള്‍ നീക്കം ചെയ്തു.
അതേസമയം, ബി.ടെക് പരീക്ഷകളുടെ ആദ്യ മൂല്യനിർണയത്തിലെയും പുനർമൂല്യനിർണയത്തിലെയും മാർക്കുകളില്‍ വലിയ വ്യത്യാസം കണ്ടെത്തിയ സംഭവത്തില്‍ വിശദമായ റിപ്പോർട്ട് സമർപ്പിക്കാനും സിൻഡിക്കേറ്റ് നിർദേശം നല്‍കിയിട്ടുണ്ട്.
