കോട്ടയം: ലോഡ്ജിലെ സെപ്റ്റിക് ടാങ്ക് മാലിന്യം ഓടയിലേക്ക് ഒഴുക്കിവിടുന്ന പണി മാത്രമല്ല കണ്ടത്തിൽ ഗ്രൂപ്പിനുള്ളത്. കണ്ടത്തിൽ ഗ്രൂപ്പിൻ്റെ ഉടമസ്ഥതയിൽ കളക്ട്രേറ്റിന് എതിർവശത്തുള്ള കണ്ടത്തിൽ ബിൽഡിംഗിൽ നടക്കുന്നത് കോടികളുടെ നികുതി വെട്ടിപ്പാണ്.
ഇവിടെ അൻപതിനായിരത്തോളം സ്ക്വയർ ഫീറ്റ് വലിപ്പത്തിൽ മൂന്ന് കെട്ടിടങ്ങളാണ് ചേർത്ത് പണിതിരിക്കുന്നത്. കെട്ടിടത്തിൽ ഇരുനൂറിലേറെ മുറികളുണ്ട്. എന്നാൽ നഗരസഭയുടെ രേഖകളിലുള്ളതാകട്ടെ 84 മുറികൾ മാത്രമാണ്.
മൂന്ന് കെട്ടിടങ്ങളുടേയും ചേർത്തുള്ള വലിപ്പം നഗരസഭാ രേഖകളിൽ 22404 സക്വയർ ഫീറ്റ് മാത്രമാണ്. കോട്ടയത്തിൻ്റെ ഭരണസിരാകേന്ദ്രമായ കളക്ട്രേറ്റിന് മുൻപിൽ നടക്കുന്നത് കോടികളുടെ നികുതി വെട്ടിപ്പാണ്. ജിഎസ്ടി വകുപ്പിനേയും നഗരസഭയേയും വെട്ടിക്കുന്നത് കോടികളാണ്.
2007 ൽ ആദ്യ അസ്സസ്മെൻ്റ് നടത്തിയ കെട്ടിടത്തിന് നികുതിയായി ലക്ഷക്കണക്കിന് രൂപയാണ് നഗരസഭയിൽ അടയ്ക്കേണ്ടത്. എന്നാൽ ആകെയുള്ളതിൻ്റെ മൂന്നിലൊരു ഭാഗം കെട്ടിടത്തിന് മാത്രമാണ് കെട്ടിട ഉടമ നഗരസഭയിൽ നികുതി അടയ്ക്കുന്നത്. അതായത് 19 വർഷമായി നഗരസഭയിൽ നികുതിവെട്ടിപ്പ് നടത്തുകയാണ്.
നികുതി വെട്ടിപ്പ് ചൂണ്ടിക്കാണിച്ച് തേർഡ് ഐ ന്യൂസ് വിജിലൻസ് ഡയറക്ടർക്ക് പരാതി നൽകി. ഇതോടെ 19 വർഷത്തെ നികുതിയും, മൂന്നിരട്ടി ഫൈനുമടക്കം കോടികളാണ് കെട്ടിട ഉടമ സർക്കാരിലേക്ക് അടയ്ക്കേണ്ടി വരിക. മാത്രമല്ല നഗരത്തിലെ ഏറ്റവും തിരക്കേറിയ ഭാഗത്തുള്ള കെട്ടിടത്തിൻ്റെ പാർക്കിംഗ് ഏരിയ കെട്ടിയടച്ച് അനധികൃതമായി നിർമിച്ച മുഴുവൻ മുറികളും പൊളിച്ച് മാറ്റേണ്ടിയും വരും.
ഇതിനിടെ സെപ്റ്റിക് ടാങ്ക് മാലിന്യം ഓടയിലേക്ക് ഒഴുക്കിയതുമായി ബന്ധപ്പെട്ട് തേർഡ് ഐ ന്യൂസ് ചീഫ് എഡിറ്റർ എ കെ ശ്രീകുമാർ നൽകിയ പരാതിയിൻമേൽ അന്വേഷണം നടത്തിയ നഗരസഭാ ആരോഗ്യവിഭാഗo സീവേജ് ട്രീറ്റ്മെൻ്റ് പ്ലാൻ്റ് ഇല്ലാതെ അനധികൃതമായി പ്രവർത്തിക്കുന്ന കണ്ടത്തിൽ ഗ്രൂപ്പിൻ്റെ നാല് ലോഡ്ജുകൾക്കും നോട്ടീസ് നൽകി.
