കരിപ്പൂർ: കോഴിക്കോട് വിമാനത്താവളത്തില്‍ ഒരുകോടി 10 ലക്ഷം രൂപയുടെ കടത്തുസ്വർണവുമായെത്തിയ യുവതിയെ തട്ടിക്കൊണ്ടുപോകാൻ ശ്രമം.
തടയാൻശ്രമിച്ച പോലീസിനുനേരേ ആക്രമണം. ഉദ്യോഗസ്ഥനു നേരേ കുതിച്ചുവന്ന അക്രമിസംഘത്തിന്റെ കാറിനുമുൻപില്‍നിന്ന് റോഡരികിലേക്ക് ചാടിമാറിയതിനാല്‍ അപായം സംഭവിച്ചില്ല. ഹോംഗാർഡിന്റെ ശരീരം കടിച്ചുപറിച്ചു.
കരിപ്പൂരില്‍ തിങ്കളാഴ്‌ച പുലർച്ചെ മൂന്നിനാണ് സംഭവം. യുവതിയുള്‍പ്പെടെ നാലുപേരെ കേസില്‍ പിടികൂടി. ബാക്കിയുള്ളവർ കടന്നുകളഞ്ഞു. സ്വർണവുമായി എത്തിയ ഇടുക്കി വണ്ടൻമേട് സ്വദേശിനി അഭിരാമി (27), സ്വീകരിക്കാൻ എത്തിയ എറണാകുളം സ്വദേശി ഹർഷല്‍ (40), സ്വർണം പൊട്ടിക്കലിനെത്തിയ സംഘത്തിലെ നാദാപുരം കല്ലാച്ചി സ്വദേശികളായ സായന്ത് (28), ബബിലേഷ് (40) എന്നിവരാണ് പിടിയിലായത്.
നേരത്തെതന്നെ വിമാനത്താവള ആഗമനമേഖലയില്‍ സംശയാസ്‌പദമായ രീതിയില്‍ ഒരുസംഘത്തെ പോലീസ് കണ്ടെത്തിയിരുന്നു. ഗേറ്റിനു പുറത്തേക്കുവന്ന യാത്രക്കാരിയെ സംഘം പിന്തുടരുന്നതുകണ്ട പോലീസ് പിന്നാലെക്കൂടി. സ്വീകരിക്കാനെത്തിയ ആളുടെകൂടെ പാർക്കിങ് ഏരിയയിലേക്കുപോയ യുവതിയെ ഈ സംഘം തടയുകയും അവരുടെ ട്രോളിബാഗില്‍ പിടിമുറുക്കുകയും ചെയ്തു. യുവതിയുടെ കൂടെയുള്ള യുവാവുമായി ബലപ്രയോഗത്തിലെത്തിയപ്പോള്‍ പോലീസ് അതിവേഗം ഇടപെട്ട് ഇവരെ കീഴ്‌പ്പെടുത്തി.
ഇതോടെ സംഘം പോലീസിനുനേരേ തിരിഞ്ഞു. ഹോം ഗാർഡ് മുരളീകൃഷ്ണയുടെ ശരീരം കടിച്ചുമുറിച്ചു. അക്രമിസംഘത്തിലെ കുറച്ചുപേർ അതിനിടെ കാറില്‍ രക്ഷപ്പെടാൻ ശ്രമിച്ചു. തടയാൻ ശ്രമിച്ച സ്‌പെഷ്യല്‍ സ്‌ക്വാഡിലെ പോലീസുകാരനെ കാറിടിപ്പിക്കാനായി പിന്നെ പ്രതികളുടെ ശ്രമം. റോഡരികിലേക്കു ചാടിമാറിയാണ് അദ്ദേഹം രക്ഷപ്പെട്ടത്.
അതേസമയം പിടിയിലായവരെ വിശദമായി ചോദ്യംചെയ്തതോടെയാണ് സ്വർണക്കടത്തും പൊട്ടിക്കല്‍ശ്രമവും പുറത്തായത്. അഭിരാമിയുടെ ബാഗേജില്‍ താമരശ്ശേരി സ്വദേശി സ്വാലിഹ് കൊടുത്തുവിട്ട സ്വർണമായിരുന്നൂവെന്ന് പോലീസിനു വിവരംകിട്ടി. അത് തട്ടിയെടുക്കാൻ രണ്ടു കാറുകളിലായി പത്തുപേരാണ് എത്തിയതെന്നും വ്യക്തമായി. അഭിരാമിയുടെ ബാഗേജിലെ എമർജൻസി ലാമ്പില്‍ ഒളിപ്പിച്ചനിലയില്‍ 817 ഗ്രാം വരുന്ന 14 ഗോള്‍ഡ് പ്ലേറ്റുകള്‍ കണ്ടെടുത്തു. സ്വർണത്തിന് ഒരുകോടി പത്തുലക്ഷം രൂപ വിലവരും. അഭിരാമിക്ക് പ്രതിഫലമായി നല്‍കാൻ സൂക്ഷിച്ച 67,000 രൂപയും ഹർഷല്‍ സഞ്ചരിച്ച കാറും തുടർനടപടിക്കായി കസ്റ്റംസിനു കൈമാറും.
