തിരുവനന്തപുരം: ശ്രീകാര്യത്ത് നടന്ന അഭിരാമിന്റെ കൊലപാതക കേസില്‍ കൊലപാതകത്തെ കുറിച്ച്‌ മുഴുവന്‍ വിവരങ്ങളും പെണ്‍കുട്ടിക്ക് അറിയാമായിരുന്നുവെന്ന് റിപ്പോര്‍ട്ട്.
കേസില്‍ അറസ്റ്റിലായിരിക്കുന്ന 17 കാരന്‍ കൃത്യത്തിനു ശേഷം വിവരം പെണ്‍കുട്ടിയെ അറിയിച്ചിരുന്നു. അറസ്റ്റിലായ മൂന്ന് പേരില്‍ ഒരാള്‍ 18 കാരിയായ ശ്രീവരാഹം സ്വദേശിനിയുമായ അനന്തയാണ്. ഇവര്‍ക്ക് പുറമേ 17 കാരന്‍ പ്രതിയും സാഹയിയും കാപ്പകേസ് പ്രതി ഉമറുമാണ് പ്രതിപ്പട്ടികയില്‍.
അഭിറാമിനെ ഓടിച്ചിട്ട് കല്ലിന് തലയ്ക്കിടിച്ച്‌ വീഴ്ത്തി കഴുത്തുഞെരിച്ച്‌ കൊലപ്പെടുത്തുകയായിരുന്നു എന്നാണ് പ്രതിയുടെ മൊഴി. അതിന് ശേഷം കാപ്പ കേസ് പ്രതിയായ ഉമറിനെ ഇയാള്‍ വിളിച്ചുവരുത്തി. പെണ്‍കുട്ടിക്ക് ഇന്‍സ്റ്റഗ്രാം വഴി അഭിറാം നിരന്തരം സന്ദേശങ്ങള്‍ അയച്ച്‌ ശല്യപ്പെടുത്തിയിരുന്നുവെന്നും, ഈ വിവരം പെണ്‍കുട്ടി തന്റെ ആണ്‍സുഹൃത്തിനോട് പരാതിപ്പെട്ടതുമാണ് കൊലപാതകത്തിലേക്ക് നയിച്ചതെന്നായിരുന്നു പ്രതിയുടെ ആദ്യ മൊഴി. ഐടിഐ വിദ്യാര്‍ത്ഥിനിയാണ് അനന്ത. അഭിറാമിനെ വിളിച്ചുവരുത്തിയത് അനന്ദയുടെ ഇന്‍സ്റ്റഗ്രാം അക്കൗണ്ട് വഴിയെന്നാണ് കണ്ടെത്തല്‍.
ഞായറാഴ്ച ഉച്ചയ്ക്ക് അഭിരാമിന്റെ ഇന്‍സ്റ്റാഗ്രാമിലേക്ക് പെണ്‍കുട്ടിയുടെ ഇന്‍സ്റ്റാഗ്രാം ഐഡിയില്‍ നിന്നും അത്യാവശ്യമായി കാണണമെന്ന് സന്ദേശം ലഭിക്കുകയായിരുന്നു. ഇത് വിശ്വസിച്ച്‌ അഭിരാം വീട്ടില്‍ നിന്നും ഇറങ്ങുകയും ചെയ്തു. പാങ്ങപ്പാറ ബസ് സ്‌റ്റോപ്പില്‍ നിന്നും സുഹൃത്തും കൂട്ടാളികളും ചേര്‍ന്ന് പേരൂര്‍ അങ്കണവാടിയിലേക്ക് പോകുന്ന വഴിയിലെ ആളൊഴിഞ്ഞ വാഴത്തോട്ടത്തിലേക്ക് കൂട്ടിക്കൊണ്ടു പോകുകയായിരുന്നു. ഇവിടെവെച്ച്‌ നടന്ന വാഗ്വാദത്തിനൊടുവില്‍ ബെല്‍റ്റ് ഉപയോഗിച്ച്‌ അഭിരാമിന്റെ കഴുത്തു ഞെരിക്കുകയായിരുന്നു.
ശ്വാസംമുട്ടി വീണ് അഭിരാം ചലനമറ്റതോടെ മൃതദേഹം ചാക്കിലാക്കി തൊട്ടടുത്ത കാടുമൂടിയ പറമ്പിലെ താഴ്ചയിലേക്ക് തള്ളി കരിയിലകള്‍ വാരിയിട്ടു. അഭിരാമിനെ കാണാതായി വീട്ടുകാര്‍ പോലീസില്‍ പരാതി നല്‍കിയതോടെയാണ് വിവരം പുറത്തറിഞ്ഞത്. എന്നാല്‍ അഭിരാമിനെയല്ല, മറിച്ച്‌ മറ്റൊരാളെയായിരുന്നു പ്രതികള്‍ ലക്ഷ്യമിട്ടിരുന്നതെന്നും, അയാളെ ഇങ്ങോട്ട് വരുത്താന്‍ വേണ്ടി അഭിരാമിനെ കരുവാക്കുകയായിരുന്നുവെന്നുമാണ് പ്രതി പൊലീസിനോട് പറഞ്ഞിരിക്കുന്നത്.
അന്വേഷണത്തില്‍ പൊലീസിന്റെ ഭാഗത്തുനിന്ന് വലിയ വീഴ്ചയുണ്ടായതായി അഭിരാമിന്റെ കുടുംബം പറയുന്നു. ഒന്നാം പ്രതിയെന്ന് സംശയിക്കുന്നയാളെ പൊലീസ് ആദ്യം കസ്റ്റഡിയില്‍ എടുത്തെങ്കിലും പിന്നീട് വിട്ടയക്കുകയായിരുന്നു. തലേദിവസം തന്നെ ഇയാളെ വിശദമായി ചോദ്യം ചെയ്തിരുന്നെങ്കില്‍ ഈ അവസ്ഥ ഒഴിവാക്കാമായിരുന്നു എന്നാണ് കുടുംബം പറയുന്നത്.
കാര്യവട്ടം പാങ്ങപ്പാറ സംഗീത നഗര്‍ സ്വദേശിയായ അഭിറാമിനെ (17) ഞായറാഴ്ച വൈകുന്നേരം മുതല്‍ കാണാനില്ലായിരുന്നു. കുടുംബം ശ്രീകാര്യം പൊലീസില്‍ പരാതി നല്‍കുകയും, തുടർന്ന് നടത്തിയ തെരച്ചിലിനൊടുവില്‍ ചാക്കില്‍ കെട്ടി വഴിയോരത്ത് ഉപേക്ഷിച്ച നിലയില്‍ മൃതദേഹം കണ്ടെത്തുകയുമായിരുന്നു. അഭിരാമിന്റെ മാതാവ് വിദേശത്തുനിന്നും ഇന്ന് പുലര്‍ച്ചെ നാട്ടിലെത്തി. സഹോദരി കൂടി എത്തിയ ശേഷം നാളെയാണ് അഭിരാമിന്റെ സംസ്‌കാര ചടങ്ങുകള്‍ നടക്കുക.
