കോട്ടയം: മുഖ്യമന്ത്രി വി ഡി സതീശൻ, ആഭ്യന്തരമന്ത്രി രമേശ് ചെന്നിത്തല എന്നിവർക്കെതിരെ സാമൂഹിക മാധ്യമങ്ങളിലൂടെ അധിക്ഷേപകരമായ പോസ്റ്റുകളും കമന്റുകളും പങ്കുവെച്ച സംഭവത്തില്‍ കോട്ടയത്ത് രണ്ട് പൊലീസുകാർക്ക് സസ്പെൻഷൻ.
മണർകാട് സ്റ്റേഷനിലെ എഎസ്‌ഐ സിബിമോൻ, കോട്ടയം എആർ ക്യാമ്പിലെ സിവില്‍ പൊലീസ് ഓഫീസർ ജിതേഷ് എന്നിവരെയാണ് ഗുരുതരമായ അച്ചടക്കലംഘനത്തെ തുടർന്ന് സർവീസില്‍ നിന്നും സസ്പെൻഡ് ചെയ്തത്.
പൊലീസ് ഉദ്യോഗസ്ഥരുടെ ഭാഗത്തുനിന്നുണ്ടായ നടപടി സേനയുടെ അച്ചടക്കത്തിനും ചട്ടങ്ങള്‍ക്കും നിരക്കാത്തതാണെന്ന് കണ്ടെത്തിയതിനെ തുടർന്നാണ് അധികൃതർ നടപടിയെടുത്തത്.
ജിതേഷ് കൊട്ടാരക്കര സ്റ്റേഷനിലുണ്ടായിരുന്ന സമയത്ത് കെ.എൻ.ബാലഗോപാലിനെ അനുകൂലിച്ചുകൊണ്ട് പോസ്റ്റിട്ടതിന് ട്രാൻസ്ഫറായി എആർ ക്യാമ്പിലേക്ക് എത്തിയതാണ്.
അതേ ഉദ്യോഗസ്ഥൻ തന്നെയാണ് ഇപ്പോള്‍ മുഖ്യമന്ത്രിക്കും ആഭ്യന്തരമന്ത്രിക്കുമെതിരെ പോസ്റ്റിട്ടതിന് സസ്പെൻഷനിലായിരിക്കുന്നത്.
