കൊച്ചി: പെരുമ്പാവൂർ മേഖലയില്‍ അന്യസംസ്ഥാന തൊഴിലാളികളുടെ തുടർച്ചയായുള്ള ദുരൂഹമരണങ്ങള്‍ നാട്ടില്‍ വലിയ ആശങ്ക പരത്തുന്നു.
പെരുമ്പാവൂർ, കുറുപ്പംപടി, കോടനാട് പോലീസ് സ്റ്റേഷൻ പരിധികളിലായി കഴിഞ്ഞ ആറു മാസത്തിനിടയില്‍ ദുരൂഹസാഹചര്യത്തില്‍ 30-ഓളം അന്യസംസ്ഥാന തൊഴിലാളികളുടെ മൃതദേഹങ്ങളാണ് കണ്ടെത്തിയത്.
ഈ മരണങ്ങളില്‍ ഭൂരിഭാഗത്തിന്റെയും കാരണം അമിതമായ ലഹരി ഉപയോഗമാണ്. ആവശ്യത്തിന് ലഹരിവസ്തുക്കള്‍ ലഭിക്കാതെ വരുമ്പോള്‍ ഇവർ കടുത്ത നിരാശയിലാവുകയും, അത് ആത്മഹത്യയിലേക്ക് നയിക്കുകയും ചെയ്യുന്നു എന്നാണ് പോലീസ് പറയുന്നത്. പ്രദേശത്തെ ആളൊഴിഞ്ഞ സ്ഥലങ്ങളും പാലത്തിനടിയിലുള്ള ഒളിയിടങ്ങളുമാണ് ലഹരി ഉപയോഗത്തിന്റെ പ്രധാന കേന്ദ്രങ്ങള്‍. അമിത ലഹരി ഉപയോഗം മൂലം അവിടെവച്ച്‌ ബോധരഹിതരായി മരണം സംഭവിക്കുന്നുമുണ്ട്.
മൃതദേഹങ്ങളില്‍ നിന്നെല്ലാം ദുർഗന്ധം വമിക്കുമ്പോള്‍ മാത്രമാണ് നാട്ടുകാർ വിവരമറിയുന്നത്. ഓപ്പറേഷൻ തൂഫാൻ ഫലപ്രദമല്ലെന്നും പ്രദേശത്ത് പോലീസ് പരിശോധന കാര്യക്ഷമമല്ലെന്നും പ്രദേശവാസികള്‍ ചൂണ്ടിക്കാട്ടുന്നു. ലഹരിയുടെ ഉപയോഗം കൂടുന്നത് ഗൗരവമായി പരിശോധിക്കണമെന്നാണ് നാട്ടുകാരുടെ ആവശ്യം
