തിരുവനന്തപുരം : കോണ്‍ഗ്രസ് നേതാക്കളുടെ വിവാദ പ്രസ്താവനകള്‍ക്കെതിരെ രൂക്ഷ വിമർശനവുമായി കെ.പി.സി.സി അദ്ധ്യക്ഷനും മന്ത്രിയുമായ സണ്ണി ജോസഫ്.
മാസപ്പടിക്കേസില്‍ സർക്കാരിനും മുഖ്യമന്ത്രിക്കുമെതിരെയുള്ള പരസ്യ പ്രസ്താവനകളിലും അടൂർ പ്രകാശിന്റെ മുഖ്യമന്ത്രിക്കെതിരെയുള്ള വിമർശനങ്ങളിലുമാണ് കെ.പി.സി.സി അദ്ധ്യക്ഷൻ മുന്നറിയിപ്പ് നല്‍കിയത്. അഭിപ്രായങ്ങള്‍ പാർട്ടി വേദികളില്‍ പറയാമെന്നും പാർട്ടിക്ക് തലവേദനയുണ്ടാക്കുന്ന പ്രസ്താവനകള്‍ ആരും നടത്തരുതെന്നും സണ്ണി ജോസഫ് പറഞ്ഞു.
പാർട്ടിക്ക് അവമതിപ്പുണ്ടാക്കുന്ന പ്രസ്താവനകള്‍ ആരും നടത്തരുത്. വിവാദമുണ്ടാക്കാനുള്ള അവകാശം ആർക്കുമില്ല. പാർട്ടിയും സർക്കാരും എടുക്കുന്ന തീരുമാനങ്ങള്‍ അംഗീകരിക്കാൻ എല്ലാ നേതാക്കളും അംഗങ്ങളും ബാദ്ധ്യസ്ഥരാണ്. പാർട്ടി അച്ചടക്കം പാലിക്കണം. വിവാദ പ്രസ്താവനകളില്‍ നിന്ന് എല്ലാവരും മാറിനില്‍ക്കണം. അല്ലാത്ത പക്ഷം ദേശീയ നേതൃത്വത്തെ അറിയിക്കേണ്ടിവരുമെന്നും സണ്ണി ജോസഫ് വാർത്താ സമ്മേളനത്തില്‍ പറഞ്ഞു. തുടർച്ചയായ പ്രസ്താവനകള്‍ പരിധി വിട്ടതുകൊണ്ടാണ് ഇപ്പോള്‍ ഇത്തരം നിർദ്ദേശം നല്‍കുന്നതെന്നും അദ്ദേഹം വ്യക്തമാക്കി. അടൂർ പ്രകാശിന് മറുപടിയില്ലെന്നും സണ്ണി ജോസഫ് കൂട്ടിച്ചേർത്തു.
മാസപ്പടിക്കേസില്‍ പിണറായി വിജയനെതിരെ നടപടി വൈകിയതിനെതിരെ കോണ്‍ഗ്രസ് നേതാക്കള്‍ പരസ്യമായി രംഗത്തെത്തിയിരുന്നു. മാത്യു കുഴല്‍ നാടൻ എം.എല്‍.എയും സി.ആർ. മഹേഷ് എം.എല്‍.എയും സർക്കാരിനെതിരെ വിമർശനമുന്നയിച്ചിരുന്നു. കഴിഞ്ഞ ദിവസം മുതിർന്ന നേതാവ് കെ. സുധാകരനും സർക്കാരിനെതിരെ രംഗത്തെത്തി. ആണുങ്ങളുടെ സർക്കാരാണെങ്കില്‍ പിണറായി വിജയനെതിരെ നടപടിയുണ്ടാകുമെന്നാണ് അദ്ദേഹം പറഞ്ഞത്.
