തിരുവനന്തപുരം: ആറ്റിങ്ങല്‍ അയിലത്ത് പത്താം ക്ലാസ് വിദ്യാർത്ഥിനിയെ വീടിനുള്ളില്‍ തൂങ്ങിമരിച്ച നിലയില്‍ കണ്ടെത്തി.
അയിലം ഗവണ്‍മെന്‍റ് ഹൈസ്കൂളിലെ പത്താം ക്ലാസ് വിദ്യാർത്ഥിനിയായ ഗൗരി പാർവതിയാണ് (15) മരിച്ചത്. പരീക്ഷയിലെ മാർക്ക് കുറഞ്ഞതുമായി ബന്ധപ്പെട്ട മനോവിഷമമാണ് ജീവനൊടുക്കാൻ കാരണമെന്നാണ് പ്രാഥമിക നിഗമനം. അയിലം ഹോമിയോ ആശുപത്രിക്ക് സമീപം വാടകയ്ക്ക് താമസിച്ചുവരികയായിരുന്നു ഗൗരി പാർവതിയും കുടുംബവും. ഇന്നലെ വൈകുന്നേരം ആറരയോടെയാണ് വീടിന്‍റെ കിടപ്പുമുറിയിലെ ഹൂക്കില്‍ കുട്ടി തൂങ്ങിനില്‍ക്കുന്നത് മാതാവ് കണ്ടത്.
ഉടൻതന്നെ അയല്‍വാസികളുടെ സഹായത്തോടെ വലിയകുന്ന് താലൂക്ക് ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല. അടുത്തിടെ നടന്ന പരീക്ഷയില്‍ മാർക്ക് കുറഞ്ഞതിനെ തുടർന്ന് ഗൗരി പാർവതി വിഷമത്തിലായിരുന്നെന്നാണ് വിവരം. സംഭവത്തില്‍ ആറ്റിങ്ങല്‍ പൊലീസ് മേല്‍നടപടികള്‍ സ്വീകരിച്ചിട്ടുണ്ട്. വിദേശത്തുള്ള ഷൈജുവിന്‍റെ ഷിമിയുടെയും ഏക മകളാണ്.
