അടൂര്‍: സമൂഹമാധ്യമത്തില്‍ ഫോട്ടോ പോസ്റ്റ് ചെയ്തതുമായി ബന്ധപ്പെട്ട തര്‍ക്കത്തെ തുടര്‍ന്ന് അടൂര്‍ ഗവ. ഗേള്‍സ് ഹയര്‍ സെക്കന്‍ഡറി സ്‌കൂളില്‍ പ്ലസ് വണ്‍ വിദ്യാര്‍ഥികള്‍ക്ക് സീനിയര്‍ വിദ്യാര്‍ത്ഥികളുടെ ക്രൂരമര്‍ദനം.
റാഗിങ് ആരോപിച്ച്‌ വിദ്യാര്‍ഥിയുടെ രക്ഷിതാക്കള്‍ പൊലീസില്‍ പരാതി നല്‍കിയതിനെത്തുടര്‍ന്ന് അഞ്ച് പ്ലസ്ടു വിദ്യാര്‍ഥികളെ 15 ദിവസത്തേക്ക് സ്‌കൂള്‍ അധികൃതര്‍ സസ്‌പെന്‍ഡ് ചെയ്തു.
കഴിഞ്ഞ നാലാം തീയതി ഉച്ചയ്ക്കായിരുന്നു സംഭവം. ഫോട്ടോ പ്രചരിപ്പിച്ചതുമായി ബന്ധപ്പെട്ട് സമൂഹമാധ്യമ ഗ്രൂപ്പില്‍ പ്ലസ് വണ്‍, പ്ലസ്ടു വിദ്യാര്‍ഥികള്‍ തമ്മില്‍ പരസ്പരം അസഭ്യം പറയുകയും തര്‍ക്കമുണ്ടാവുകയും ചെയ്തിരുന്നു.
ഇതിന്റെ തുടര്‍ച്ചയെന്നോണം മൂന്ന് പ്ലസ് വണ്‍ വിദ്യാര്‍ഥികളെ പ്ലസ്ടു വിദ്യാര്‍ഥികള്‍ ക്ലാസില്‍ നിന്ന് വിളിച്ചിറക്കി സ്‌കൂള്‍ ഓഡിറ്റോറിയത്തിന്റെ പിന്നിലെത്തിച്ചു.
തുടര്‍ന്ന് ഇതില്‍ ഒരു വിദ്യാര്‍ഥിയെ ശുചിമുറിയില്‍ പൂട്ടിയിടുകയും മറ്റൊരു വിദ്യാര്‍ഥിയെ പിടിച്ചുവെക്കുകയും ചെയ്തു.
ഇതിനുശേഷം മൂന്നാമത്തെയാളെ അഞ്ച് പ്ലസ്ടു വിദ്യാര്‍ഥികള്‍ ചേര്‍ന്ന് ഇടിവള ഉപയോഗിച്ച്‌ നെറ്റിയിലും മുഖത്തും ഇടിക്കുകയും പുറത്ത് മര്‍ദിക്കുകയും ചെയ്തുവെന്നാണ് പരാതിയില്‍ വ്യക്തമാക്കുന്നത്.
മര്‍ദനത്തില്‍ നെറ്റി ചതയുകയും ചുണ്ട് മുറിയുകയും ചെയ്ത വിദ്യാര്‍ഥി അടൂര്‍ ജനറല്‍ ആശുപത്രിയില്‍ ചികിത്സ തേടി. സ്‌കൂള്‍ അധികൃതരും പ്ലസ് വണ്‍ വിദ്യാര്‍ഥിയുടെ രക്ഷിതാക്കളും നല്‍കിയ പരാടിയുടെ അടിസ്ഥാനത്തില്‍ അഞ്ച് വിദ്യാര്‍ഥികള്‍ക്കെതിരെ അടൂര്‍ പൊലീസ് കേസെടുത്തിട്ടുണ്ട്.
ഇതിന്റെ പശ്ചാത്തലത്തില്‍ സ്‌കൂളില്‍ ചേര്‍ന്ന പിടിഎ യോഗത്തിലാണ് അഞ്ച് പ്ലസ്ടു വിദ്യാര്‍ഥികളെയും സസ്‌പെന്‍ഡ് ചെയ്യാന്‍ തീരുമാനമായത്.
