ചെന്നൈ : തമിഴ്നാട്ടിൽ സി ജോസഫ് വിജയ്യുടെ നേതൃത്വത്തിലുള്ള ടിവികെ സർക്കാർ 100 ദിവസം പൂർത്തിയാക്കിയതിനിടെ നിയമസഭയിൽ രൂക്ഷ വിമർശനവുമായി പ്രതിപക്ഷ നേതാവ് ഉദയനിധി സ്റ്റാലിൻ. സംസ്ഥാനത്തെ ക്രമസമാധാന നില തകർന്നെന്നും സമീപകാലത്തുണ്ടായ പല അക്രമസംഭവങ്ങൾക്കും പിന്നിൽ ലഹരിമാഫിയയാണെന്നും സ്റ്റാലിൻ ആരോപിച്ചു.
കോയമ്പത്തൂരിൽ 19 വയസ്സുകാരനായ അമുദൻ കൊല്ലപ്പെട്ട സംഭവം അദ്ദേഹം സഭയിൽ ഉന്നയിച്ചു. ഇതൊരു ഗുണ്ടാസംഘങ്ങൾ തമ്മിലുള്ള ഏറ്റുമുട്ടലായി കാണരുതെന്നും അതൊരു കൊലപാതകമാണെന്നും സ്റ്റാലിൻ പറഞ്ഞു. ‘അമുദൻ ഒരു പട്ടികജാതി വിഭാഗത്തിൽപ്പെട്ടയാളാണ്,’ അദ്ദേഹം കൂട്ടിച്ചേർത്തു. ലഹരി ഇടപാടുകളെക്കുറിച്ച് വിവരം നൽകിയതിനാണ് അമുദനെ കൊലപ്പെടുത്തിയതെന്ന് സ്റ്റാലിൻ ആരോപിച്ചു. അമുദന്റെ മാതാപിതാക്കളും ഇതേ ആരോപണം തന്നോട് ഉന്നയിച്ചതായി അദ്ദേഹം പറഞ്ഞു.
പാർട്ടി നേതാവിന്റെ നിർദേശപ്രകാരം കള്ളക്കുറിച്ചി ജില്ലാ യൂണിറ്റ് ഈ കേസിൽ നീതി ആവശ്യപ്പെട്ട് വലിയൊരു പ്രതിഷേധം സംഘടിപ്പിച്ചിരുന്നുവെന്നും സ്റ്റാലിൻ പറഞ്ഞു. ‘ഇതൊരു സാധാരണ കൊലപാതകമായി തള്ളിക്കളയാനാവില്ല. കുറ്റക്കാരെ നിയമത്തിന് മുന്നിൽ കൊണ്ടുവരണം,’ എന്നും അദ്ദേഹം ആവശ്യപ്പെട്ടു.
കൊലപാതകങ്ങൾ മാത്രമല്ല, നിരവധി ലൈംഗികാതിക്രമ സംഭവങ്ങളും സംസ്ഥാനത്ത് നടന്നിട്ടുണ്ട്. ഇതെല്ലാം സർക്കാരിന്റെ ശ്രദ്ധയിൽപ്പെടുത്തുകയാണ്. സ്കൂളുകളിൽ കൗൺസിലിംഗ് ക്ലാസുകൾ ഏർപ്പെടുത്തണമെന്നും ലഹരിമരുന്നിനെതിരെ കർശന നടപടി സ്വീകരിക്കണമെന്നും സ്റ്റാലിൻ സർക്കാരിനോട് ആവശ്യപ്പെട്ടു.
വിജയ് സർക്കാർ 100 ദിവസം പൂർത്തിയാക്കിയതിന്റെ നേട്ടങ്ങൾ എണ്ണിപ്പറയുമ്പോഴാണ് സ്റ്റാലിന്റെ ഈ വിമർശനം. ‘തലമുറകൾക്കായുള്ള സർക്കാർ - 100 ദിന ഭരണം’ എന്ന പേരിൽ സ്ത്രീ സുരക്ഷ, കർഷക ക്ഷേമം, യുവജനങ്ങളുടെ നൈപുണ്യ വികസനം, സുതാര്യമായ ഭരണം എന്നിവയിലൂന്നിയുള്ള പദ്ധതികളാണ് സർക്കാർ ഉയർത്തിക്കാട്ടുന്നത്. എന്നാൽ, ഈ നേട്ടങ്ങൾക്കിടയിലും സംസ്ഥാനത്തെ ക്രമസമാധാന നില എത്രത്തോളം മോശമാണെന്ന് ഈ സംഭവങ്ങൾ തെളിയിക്കുന്നുവെന്ന് സ്റ്റാലിൻ പറഞ്ഞു.
