കോട്ടയം: സിഐഎസ് എം എഡ്യുക്കേഷൻ ആൻഡ് ചാരിറ്റബിൾ ട്രസ്റ്റ് നൽകുന്ന സുരക്ഷാ ഭാരതി പുരസ്കാരത്തിന് തേർഡ് ഐ ന്യൂസ് ചീഫ് എഡിറ്റർ ഏ.കെ.ശ്രീകുമാർ അർഹനായി. എക്സലൻസ് ഇൻ ഓൺലൈൻ മീഡിയ സർവീസിനാണ് അവാർഡ്.
ഇന്ന് രാവിലെ കോട്ടയം ജോയ്സ് റെസിഡൻസി ക്യൂൻസ് ചേംബറിൽ നടന്ന ചടങ്ങിൽ കേരള നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ അവാർഡ് സമ്മാനിച്ചു.
സിഐഎസ്എം ചെയർമാൻ അജിത്കുമാർ പത്തനംതിട്ട ചടങ്ങിൽ അധ്യക്ഷത വഹിച്ചു. റബർ ബോർഡ് ചെയർമാൻ എൻ.ഹരി, അരുൺ വേലായുധൻ, സോമൻ പുതിയാത്ത് തുടങ്ങിയവർ പ്രസംഗിച്ചു. സമൂഹത്തിൽ വ്യത്യസ്ത മേഖലകളിൽ കഴിവും പ്രതിബദ്ധതയും തെളിയിച്ചവർക്കാണ് അവാർഡ് നൽകിയത്. മലയാളം ഓൺലൈൻ മീഡിയ അസോസിയേഷൻ സംസ്ഥാന പ്രസിഡണ്ട് കൂടിയാണ് എ കെ ശ്രീകുമാർ .
കോട്ടയം നഗരത്തിൽ പണി പൂർത്തിയാകാതെ കിടക്കുന്ന ആകാശപാതയ്ക്ക് വേണ്ടി ശ്രീകുമാർ ഹൈക്കോടതിയിൽ നടത്തിയ നിയമ പോരാട്ടം സംസ്ഥാനമൊട്ടാകെ ശ്രദ്ധേയമായ വിഷയമാണ്. നിർമാണം മുടങ്ങി കിടക്കുന്ന ആകാശപാത പൊളിച്ച് മാറ്റുകയോ പണി പൂർത്തികരിക്കുകയോ വേണമെന്ന ആവശ്യമുന്നയിച്ചാണ് അദ്ദേഹം ഹൈക്കോടതിയെ സമീപിച്ചത്. ഇതോടെ ആരും ശ്രദ്ധിക്കപ്പെടാതെ കിടന്ന ആകാശപാത ചർച്ചാ വിഷയമായി.
പൊളിക്കണമെന്ന് ഒരു വിഭാഗവും പൊളിക്കേണ്ടെന്ന് മറ്റൊരു വിഭാഗവും നിലപാടെടുത്തു. ശ്രീകുമാറിന്റെ നിയമ പോരാട്ടത്തോടെ രാഷ്ട്രീയക്കാർ രണ്ടു ചേരിയായി നിലയുറപ്പിച്ചു. ഇപ്പോഴിതാ പുതിയ സർക്കാർ ആകാശപാത നിർമാണം പുനരാരംഭിക്കാൻ തീരുമാനമെടുത്തതായി ഹൈക്കോടതിയെ അറിയിച്ചു. ഫണ്ടും അനുവദിച്ചു . ഇത്തരത്തിൽ വിവിധ സാമൂഹ്യ വിഷയങ്ങളിൽ നിർണായക ഇടപെടലുകൾ നടത്തിയിട്ടുണ്ട് ശ്രീകുമാർ
