തിരുവനന്തപുരം: സുപ്രീം കോടതി ചീഫ് ജസ്റ്റിസിനെതിരേ കെപിസിസിയുടെ ഔദ്യോഗിക ട്വിറ്റർ (ഇപ്പോള്‍ x) അ‌ക്കൗണ്ടില്‍ നിന്ന് വിവാദ പരാമർശങ്ങള്‍ പോസ്റ്റ് ചെയ്യപ്പെട്ട സംഭവത്തില്‍ കെപിസിസി അധ്യക്ഷന് വക്കീല്‍ നോട്ടീസ്.
സുപ്രീംകോടതി ബാർ അസോസിയേഷൻ ജോയിൻറ് സെക്രട്ടറിയാണ് നോട്ടീസ് അയച്ചത്. ഏഴ് ദിവസത്തിനകം മറുപടിയും പരസ്യ മാപ്പും പറയണമെന്നും അ‌ല്ലെങ്കില്‍ ക്രിമിനല്‍ കോടതിയലക്ഷ്യ നടപടി നേരിടേണ്ടിവരും എന്നുമാണ് മുന്നറിയിപ്പ്. ചീഫ് ജസ്റ്റിസ് സൂര്യ കാന്തിനെതിരെ കെപിസിസി അ‌ക്കൗണ്ടില്‍ നിന്ന് ട്വീറ്റ് വന്ന സംഭവത്തില്‍ നേരത്തെ സുപ്രീം കോടതിയും കെപിസിസിക്ക് നോട്ടീസ് അ‌യച്ചിരുന്നു. ഇതിന് പിന്നാലെയാണ് പുതിയ നോട്ടീസും എത്തിയിരിക്കുന്നത്.
പുതിയ നോട്ടീസ് കൂടി ലഭിച്ചതോടെ വിവാദ ട്വീറ്റിന്റെ പേരില്‍ കെപിസിസിക്ക് കുരുക്ക് മുറുകിയിരിക്കുകയാണ്. നേരത്തെ ഈ ട്വീറ്റ് വിവാദമായത് ദേശീയ തലത്തില്‍ തന്നെ കോണ്‍ഗ്രസിന് വലിയ തിരിച്ചടി സൃഷ്ടിച്ചിരുന്നു. രാഹുല്‍ ഗാന്ധിയുടെ സമരത്തെ തകർക്കുന്ന കുറിപ്പെന്ന് പറഞ്ഞ് എഐസിസി നേതാക്കള്‍ തന്നെ ട്വീറ്റിന് എതിരേ അ‌മർഷം പ്രകടിപ്പിച്ചു എന്നാണ് റിപ്പോർട്ടുകള്‍ വന്നത്.
കോണ്‍ഗ്രസിനെതിരേയുള്ള ആയുധമായി ബിജെപി ഈ ട്വീറ്റ് വിവാദം ഉപയോഗപ്പെടുത്തുന്നു. അ‌തിന്റെ പ്രതിഫലനം കൂടിയാണ് ഇപ്പോള്‍ കോടതി നടപടികളുടെ രൂപത്തില്‍ സംഭവിച്ചുകൊണ്ടിരിക്കുന്നത്. ട്വീറ്റ് വിവാദമായതിന് പിന്നാലെ അ‌ത് പിൻവലിക്കപ്പെടുകയും ട്വീറ്റിന്റെ ഉത്തരവാദിയായ വ്യക്തിയെ ചുമതലയില്‍നിന്ന് നീക്കിയതായി കെപിസിസി പ്രസിഡന്റ് സണ്ണി ജോസഫ് അറിയിക്കുകയും ചെയ്തിരുന്നു.
നേതൃത്വത്തിന്റെ അറിവോ സമ്മതമോ കൂടിയാലോചനയോ ഇല്ലാതെയാണ് പോസ്റ്റ് പ്രസിദ്ധീകരിച്ചതെന്നും സംഭവത്തില്‍ ഏത് സാഹചര്യത്തിലാണ് ഇത്തരമൊരു പോസ്റ്റ് വന്നതെന്ന് പരിശോധിക്കുമെന്നും കെപിസിസി പ്രസിഡന്റ് അറിയിച്ചിരുന്നു. എന്നാല്‍ വിഷയം ദേശീയതലത്തില്‍ വിവാദമായതിനാല്‍ സണ്ണി ജോസഫിന്റെ വീശദീകരണം കൊണ്ടൊന്നും വിവാദം അ‌വസാനിച്ചില്ല. ഇപ്പോള്‍ ഈ വിഷയത്തില്‍ സുപ്രീം കോടതിയോട് മറുപടി പറയേണ്ട നിലയിലാണ് കെപിസിസി അ‌ധ്യക്ഷനുള്ളത്.
മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിൻറെ രാജി ആവശ്യപ്പെട്ടുള്ള പ്രതിഷേധത്തിൻറെ ഭാഗമായി, സുപ്രീം കോടതിയിലേക്ക് ഇന്ത്യ സഖ്യത്തിൻറെ മാർച്ച്‌ തീരുമാനിച്ചിരുന്നു. എന്നാല്‍, നിയമപ്രശ്നങ്ങളുള്ളതിനാല്‍ ഇന്ത്യ സഖ്യ നേതാക്കളെ കാണാൻ സാധിക്കില്ലെന്ന് ചീഫ് ജസ്റ്റിസ് അറിയിച്ചു. ഇതിന് പിന്നാലെയാണ് കാണാൻ അ‌നുമതി നിഷേധിച്ച ചീഫ് ജസ്റ്റിസിന് എതിരേ കെപിസിസി അ‌ക്കൗണ്ടില്‍ നിന്ന് ട്വീറ്റ് പ്രത്യക്ഷപ്പെട്ടത്.
'സൂര്യകാന്ത് രാജിവയ്ക്കൂ, പകരം ആളെ ഞങ്ങള്‍ കണ്ടെത്താം' എന്നതടക്കം ഈ ട്വീറ്റില്‍ ഉണ്ടായിരുന്നു. ഇത് പോസ്റ്റ് ചെയ്ത് നിമിഷങ്ങള്‍ക്കകം പിൻവലിക്കപ്പെട്ടു. എന്നാല്‍ അ‌തിനകം ട്വീറ്റ് വിവാദമായിരുന്നു. ഇതാണ് ഇപ്പോള്‍ കെപിസിസി അ‌ധ്യക്ഷ പരസ്യമായി മാപ്പ് പറയണം എന്ന ആവശ്യത്തില്‍ എത്തി നില്‍ക്കുന്നത്. മുൻപും കെപിസിസി ട്വീറ്റ് കോണ്‍ഗ്രസിന് ദേശീയതലത്തില്‍ തിരിച്ചടി ഉണ്ടാക്കിയ വിവാദങ്ങള്‍ സൃഷ്ടിച്ചിട്ടുണ്ട്. ഇപ്പോഴത്തെ സംഭവവികാസങ്ങളുടെ പശ്ചാത്തലത്തില്‍ ഡിജിറ്റല്‍ മീഡിയ സെല്ലിനെ നിയന്ത്രിക്കാനുള്ള തയാറെടുപ്പിലാണ് കെപിസിസി നേതൃത്വം
