ഡൽഹി: രാജ്യത്തിന് അഭിമാനമായി മാറിയ ഫ്ലൈദുബായ് പൈലറ്റ് ക്യാപ്റ്റൻ സ്മിത്ത് മച്ചാറിന് ധീരതയ്ക്കുള്ള ദേശീയ പുരസ്കാരം നല്‍കണമെന്ന ആവശ്യവുമായി ഇന്ത്യയിലെ പൈലറ്റുമാരുടെ സംഘടനയായ ദ ഫെഡറേഷൻ ഓഫ് ഇന്ത്യൻ പൈലറ്റ്സ് (എഫ്‌ഐപി).
ആവശ്യം ഉന്നയിച്ച്‌ എഫ്‌ഐപി, പ്രധാനമന്ത്രി നരേന്ദ്ര മോദിക്ക് കത്തയച്ചു. സ്മിത്ത് മച്ചാറിൻ്റെ അസാമാന്യ ധീരത അടക്കം ചൂണ്ടിക്കാട്ടിയാണ് എഫ്‌ഐപിയുടെ ആവശ്യം.
നേരത്തെ സമാന ആവശ്യം ഉന്നയിച്ച്‌ മിലിന്ദ് ദിയോറ എംപിയും രംഗത്തെത്തിയിരുന്നു. പ്രധാനമന്ത്രിക്കെഴുതിയ കത്തില്‍, സ്മിത്ത് മച്ചാറിനെ അശോക ചക്ര പുരസ്കാരത്തിന് പരിഗണിക്കണമെന്ന് മിലിന്ദ് ദിയോറ ആവശ്യപ്പെട്ടിരുന്നു.
പരിക്കേറ്റിട്ടും സ്മിത്ത് മച്ചാർ പൈലറ്റ്-ഇൻ-കമാൻഡ് എന്ന നിലയിലുള്ള തന്റെ ഉത്തരവാദിത്തങ്ങള്‍ നിർവ്വഹിക്കുന്നത് തുടരുകയും വിമാനത്തിന്റെ നിയന്ത്രണം നിലനിർത്തുകയും ചെയ്തുവെന്ന് എഫ്‌ഐപി കത്തില്‍ ചൂണ്ടിക്കാട്ടി.
ഇതുപോലെയുള്ള അസാമാന്യ ധീരതയ്ക്കുള്ള അംഗീകാരങ്ങള്‍ ഉന്നതതലത്തില്‍ തന്നെ നല്‍കപ്പെടേണ്ടതാണ്. അതിനാല്‍, ക്യാപ്റ്റൻ സ്മിത്തിന് അനുയോജ്യമായ ധീരതയ്ക്കുള്ള ദേശീയ പുരസ്കാരം നല്‍കുന്നത് പരിഗണിക്കാൻ അഭ്യർത്ഥിക്കുന്നു.
ഗുരുതരമായ അപകടവും കടുത്ത പരിക്കുകളും അഭിമുഖീകരിക്കേണ്ടി വരുമ്പോഴും ഒരു യഥാർത്ഥ പ്രൊഫഷണല്‍ പൈലറ്റിന്റെ ഉത്തരവാദിത്തം തങ്ങളെ വിശ്വസിച്ച്‌ ഏല്‍പ്പിച്ച ആളുകളുടെ സുരക്ഷയില്‍ മാത്രമായിരിക്കുമെന്ന് ക്യാപ്റ്റൻ സ്മിത്തിന്റെ പ്രവർത്തനങ്ങള്‍ തെളിയിക്കുന്നുവെന്ന് എഫ്‌ഐപി വ്യക്തമാക്കി.
