അടൂർ: 2024 ലെ തെരഞ്ഞടുപ്പിൽ തെരഞ്ഞെടുപ്പ് കമ്മീഷന്റെ സഹായത്തോടെ ജനഹിതത്തെ അട്ടിമറിച്ച് അധികാരത്തിലെത്തിയ നിയമവിരുദ്ധമായ സർക്കാർ ആണ് ഇന്ന് ഇന്ത്യ ഭരിക്കുന്നതെന്ന് എ ഐ സി സി സംഘടനാ കാര്യ ചുമതലയുള്ള ജനറൽ സെക്രട്ടറി കെ. സി. വേണുഗോപാൽ.
രാജീവ് ഗാന്ധി പഞ്ചായത്തി രാജ് സംഘട്ടൻ (RGPRS) സംസ്ഥാന ഘടകത്തിന്റെ നേതൃത്വത്തിൽ സംഘടിപ്പിക്കുന്ന സംസ്ഥാനത്തെ ആദ്യത്തെ ‘സർവ്വോദയ് സങ്കൽപ് ശിവിർ’ ദ്വിദിന റസിഡൻഷ്യൽ പഠന ക്യാമ്പ് അടൂർ ബോധിഗ്രാമിൽ ഉത്‌ഘാടനം ചെയ്തു സംസാരിക്കുകയായിരുന്നു അദ്ദേഹം.
ആർജിപിആർഎസ് സംസ്ഥാന അധ്യക്ഷൻ അർജ്ജുൻ രാധാകൃഷ്ണൻ, ആന്റോ ആന്റണി എംപി, എംഎൽഎമാരായ ശാന്തകുമാർ, പഴകുളം മധു, പത്തനംതിട്ട ഡിസിസി പ്രസിഡന്റ് സതീഷ് കൊച്ചുപറമ്പിൽ, ജെ.എസ്. അടൂർ എന്നിവർ പ്രസംഗിച്ചു.
ക്യാമ്പിൽ ഗാന്ധിജിയുടെ ‘ഗ്രാമസ്വരാജ്’ എന്ന ആശയം, സ്വാതന്ത്ര്യസമര കാലഘട്ടത്തിലും തുടർന്ന് രാജ്യം കൈവരിച്ച സമഗ്ര പുരോഗതിയിലും ഇന്ത്യൻ നാഷണൽ കോൺഗ്രസ് വഹിച്ച പങ്ക്, തദ്ദേശ സ്വയംഭരണ സംവിധാനങ്ങളുടെ വികാസം, ജനപങ്കാളിത്ത ഭരണം തുടങ്ങിയ വിവിധ വിഷയങ്ങളിൽ വിപുലമായ സെഷനുകളും ചർച്ചകളും നടക്കും. രാഷ്ട്രീയ-സാമൂഹിക രംഗങ്ങളിലെ പ്രമുഖരും വിഷയവിദഗ്ധരും ക്ലാസുകൾ നയിക്കുകയും അനുഭവങ്ങൾ പങ്കുവെക്കുകയും ചെയ്യും.
ക്യാമ്പിന്റെ രണ്ടാം ദിനമായ ഇന്ന് രാവിലെ ‘ശ്രമദാൻ’ എന്ന പേരിൽ പ്രത്യേക സേവന പ്രവർത്തനവും ക്രമീകരിച്ചിട്ടുണ്ട്. സംസ്ഥാനത്തെ വിവിധ ഭാഗങ്ങളിൽ നിന്നുള്ള പ്രതിനിധികൾ ക്യാമ്പിൽ പങ്കെടുക്കുന്നുണ്ട്.
