പത്തനംതിട്ട: ശ്രീനാദേവി കുഞ്ഞമ്മക്കെതിരെയുള്ള ഹർജി വിചാരണകോടതി തള്ളി. ശ്രീനയുടെ ജില്ലാപഞ്ചായത്ത് അംഗത്വം ചോദ്യം ചെയ്തുകൊണ്ടുള്ള ഹർജിയാണ് തള്ളിയത്.
പത്തനംതിട്ട അഡീഷണല്‍ ജില്ലാ കോടതിയാണ് ഹർജി തള്ളിയത്. തിരഞ്ഞെടുപ്പ് സത്യവാങ്മൂലത്തില്‍ ശ്രീനയുടെ വാസസ്ഥലം നല്‍കിയത് ശരിയല്ലെന്നായിരുന്നു ഹർജിക്കാരൻ്റെ വാദം. സിപിഐ നേതാവായിരുന്ന മുരുകേഷ് നല്‍കിയ ഹർജിയാണ് വിചാരണക്കെടുക്കാതെ കോടതി തള്ളിയത്.അഡീഷണല്‍ ജില്ലാ കോടതി-നാല് ജഡ്ജി ഡോണി തോമസ് വര്‍ഗീസാണ് വിധി പ്രസ്താവിച്ചത്.
ശ്രീനാദേവിക്കെതിരെ ഉന്നയിച്ചിട്ടുള്ള ആരോപണങ്ങള്‍ ഒരു തെരഞ്ഞെടുപ്പ് ഹര്‍ജിയിലൂടെ ചോദ്യം ചെയ്യാവുന്നതല്ല എന്ന മുതിര്‍ന്ന അഭിഭാഷകന്‍ അഡ്വ. വി.ആര്‍. സോജിയുടെ വാദം അംഗീകരിച്ചാണ് കോടതിവിധി. ഹര്‍ജിയിലെ സാങ്കേതിക പിഴവുകളും ശ്രീനാദേവിയുടെ അഭിഭാഷകന്‍ ചൂണ്ടിക്കാട്ടി. പള്ളിക്കല്‍ ജനശക്തി വാര്‍ഡിലെ കൊല്ലശ്ശേരില്‍ വീട്ടില്‍ സാധാരണ താമസക്കാരി അല്ല എന്ന വാദമാണ് ഹര്‍ജിക്കാരന്‍ ഉന്നയിച്ചത്.
എന്നാല്‍ സാധാരണ വാസസ്ഥലം തെരഞ്ഞെടുപ്പ് തര്‍ക്കമല്ലെന്നായിരുന്നു അഡ്വ. വി.ആര്‍. സോജിയുടെ വാദം. വോട്ടര്‍പട്ടിക പ്രസിദ്ധീകരിച്ചപ്പോള്‍ ഹര്‍ജിക്കാരന്റെ പാര്‍ട്ടിയായ സിപിഐ ഉന്നയിച്ചിരുന്നു. എന്നാല്‍, ഇലക്ടറല്‍ രജിസ്ട്രേഷന്‍ ഓഫീസര്‍ ശ്രീനാദേവിയുടെ വോട്ടര്‍പട്ടികയിലെ അംഗത്വം ശരി വയ്ക്കുകയാണ് ചെയ്തത്. അതിനെതിരെ നല്‍കിയ അപ്പീല്‍ പഞ്ചായത്ത് ജോയിന്റ് ഡയറക്ടര്‍ തള്ളി. ചട്ടപ്രകാരം എല്ലാം ജോയിന്റ് രജിസ്ട്രാറുടെ വോട്ടര്‍ പട്ടിക സംബന്ധിച്ച്‌ തീരുമാനം അന്തിമമാണെന്നും അഭിഭാഷകന്‍ ബോധിപ്പിച്ചു.
