കോട്ടയം: ശബരിമല തീര്‍ത്ഥാടകര്‍ എത്തുന്ന പ്രധാന പാതയോരങ്ങള്‍ കൈയ്യേറി അനധികൃത കച്ചവടക്കാര്‍ സജീവമാകുന്നു.
പഞ്ചായത്തില്‍ ഉള്‍പ്പെടെ പരാതി നല്‍കിയിട്ടും ഒഴിപ്പിക്കാന്‍ അധികൃതര്‍ക്ക് ഭയമെന്ന് ആക്ഷേപം. ശബരിമല തീര്‍ത്ഥാടനകാലത്ത് സുരക്ഷയും സജ്ജീകരണങ്ങളും ഒരുക്കുന്നതിനായി വിവിധ വകുപ്പുകള്‍ സജീവമായി പ്രവര്‍ത്തിക്കുമ്പോഴാണ് ഇത്തരത്തില്‍ അനധികൃത കൈയ്യേറ്റങ്ങള്‍ കണ്ടില്ലായെന്ന് നടിക്കുന്നത്.
തീര്‍ത്ഥാടനകാലത്തിന് ഇനിയും ദിവസങ്ങള്‍ മാത്രമാണുള്ളത്.
എരുമേലി ടൗണിനു സമീപം വെയ്റ്റിങ് ഷെഡ് വരെ കൈയ്യേറിയിട്ടും അധികൃതര്‍ യാതൊരു നടപടിയും സ്വീകരിക്കാത്തതില്‍ വ്യാപക പ്രതിഷേധം ഉയരുന്നു.
എരുമേലി -കാഞ്ഞിരപ്പള്ളി റോഡിലാണ് കൈയ്യേറ്റം കൂടുതലായി നടക്കുന്നത്. ഇതിനാല്‍ വാഹനങ്ങള്‍ വഴിയരികില്‍ പാര്‍ക്ക് ചെയ്യുന്നതിന് പോലും സാധിക്കുന്നില്ല. ടൗണ്‍ കഴിഞ്ഞുള്ള സ്റ്റോപ്പില്‍ സ്ഥാപിച്ചിരിക്കുന്ന വെയ്റ്റിങ് ഷെഡും കൈയ്യേറിയതായി പരാതി ഉയര്‍ന്നു. ഇത് മൂലം ബസ് കാത്ത് നില്‍ക്കുന്നവര്‍ക്ക് ബുദ്ധിമുട്ട് സൃഷ്ടിക്കുന്നു.
പാതയോരത്ത് കടകള്‍ സ്ഥാപിച്ചിരിക്കുകയാണ്. സെക്കന്റ് ഹാന്റ് സ്‌കൂട്ടറുകളുടെ ഷോറും വരെ ഇവിടെ പ്രവര്‍ത്തിക്കുന്നുണ്ട്. മറ്റ് പല പഞ്ചായത്തുകളിലും ഇത്തരത്തില്‍ പുറമ്പോക്ക് കൈയേറിയവര്‍ക്കെതിരെ നടപടികള്‍ ആരംഭിച്ചു കഴിഞ്ഞു.
കൈയ്യേറ്റം ഒഴിവാക്കാന്‍ എത്തുമ്പോള്‍ തര്‍ക്കവും സംഘര്‍ഷവും പതിവാണ്. കൈയ്യേറിയ വസ്തു യാതൊരു രേഖയില്ലെങ്കിലും തങ്ങളുടെതെന്ന് കൈയ്യേറ്റക്കാര്‍ അവകാശപ്പെടുന്നു. ഇത് തര്‍ക്കത്തിന് കാരണമാകും. മറ്റ് വ്യാപാരസ്ഥാപനങ്ങള്‍ ലൈസന്‍സും ഫീസും അടച്ച്‌ വ്യാപാരം നടത്തുമ്പോള്‍ ചിലര്‍ യാതൊരു മാനദണ്ഡങ്ങളും പാലിക്കാതെ സര്‍ക്കാര്‍ ഭൂമി കൈയ്യേറുകയാണ്.
ഈ സാഹചര്യത്തിലാണ് എരുമേലി -പഞ്ചായത്തിന്റെ പ്രവേശന കവാടമായ കൊരട്ടി മുതല്‍ ടൗണ്‍ വരെ പാതയോരത്ത് വ്യാപക കൈയ്യേറ്റങ്ങള്‍ നടക്കുന്നത്. ഇവിടെയുള്ള പാതയോരം സംരക്ഷിച്ച്‌ വിശ്രമ കേന്ദ്രങ്ങള്‍ ഒരുക്കുന്നതിന് പഞ്ചായത്ത് ശ്രമങ്ങള്‍ ആരംഭിച്ചെങ്കിലും നടപടികള്‍ വൈകുന്നു.
തീര്‍ത്ഥാടകര്‍ക്ക് ഉള്‍പ്പെടെ പാതയോരങ്ങളില്‍ വിശ്രമ സ്ഥലങ്ങള്‍ ഒരുക്കി സൗകര്യം ചെയ്ത് നല്‍കണമെന്നാണ് ആവശ്യം ഉയരുന്നത്.
