തലശ്ശേരി: ചൊക്ലിയിൽ നിന്ന് കാണാതായ ശിവസൂര്യയുടെ തിരോധാന കേസില്‍ ക്രൈംബ്രാഞ്ച് അന്വേഷണം ഊര്‍ജ്ജിതമാക്കി.
ക്രൈംബ്രാഞ്ച് എസ്.പി. കെ.വി. വേണുഗോപാല്‍, ഡി.വൈ.എസ്.പി. സനില്‍കുമാര്‍, സി.ഐ.മാരായ ശ്രീജിത്ത് കൊടേരി, രഞ്ജിത്ത് രവീന്ദ്രന്‍ എന്നിവരുടെ നേതൃത്വത്തിലുള്ള
പോലീസ് സംഘം ശിവസൂര്യയുടെ വീട്ടിലെത്തി പിതാവിന്റെയും ബന്ധുക്കളുടെയും മൊഴികള്‍ വിശദമായി രേഖപ്പെടുത്തി.
ഇതിനുപുറമേ വീടിന്റെ പരിസര പ്രദേശങ്ങളില്‍ തെളിവെടുപ്പ് നടത്തുകയും പ്രദേശത്തെ കൂടുതല്‍ സി.സി.ടി.വി. ദൃശ്യങ്ങള്‍ ക്രൈംബ്രാഞ്ച് ശേഖരിക്കുകയും ചെയ്തിട്ടുണ്ട്.
അന്വേഷണത്തിന്റെ ഭാഗമായി കുട്ടി ഉപയോഗിച്ചിരുന്ന മൊബൈല്‍ ഫോണ്‍ ക്രൈംബ്രാഞ്ച് സംഘം കസ്റ്റഡിയിലെടുത്തിട്ടുണ്ട്.
കുട്ടി 'ഫ്രീ ഫയര്‍' (Free Fire) ഓണ്‍ലൈന്‍ ഗെയിം സ്ഥിരമായി കളിച്ചിരുന്നതായും, ഈ ഗെയിമിനിടയില്‍
50,000 രൂപ നഷ്ടപ്പെട്ടതായും പോലീസ് അന്വേഷണത്തില്‍ കണ്ടെത്തിയിട്ടുണ്ട്.
ഗെയിമിനെ തുടര്‍ന്നുണ്ടായ സാമ്പത്തിക ബാധ്യതയും പ്രശ്‌നങ്ങളും കാരണം പിതാവ് മൊബൈല്‍ ഫോണ്‍ പിടിച്ചു വെച്ചിരുന്നു.
ഇതില്‍ മനംനൊന്താണ് പ്ലസ്ടു വിദ്യാര്‍ത്ഥിയായ ശിവസൂര്യയെ കഴിഞ്ഞ ഓഗസ്റ്റ് എട്ട് മുതല്‍ കാണാതായതെന്നാണ് പോലീസിന്റെ പ്രാഥമിക നിഗമനം.
എങ്കിലും വീടുവിട്ടിറങ്ങിയ കുട്ടി പിന്നീട് എങ്ങോട്ടാണ് പോയതെന്ന കാര്യത്തില്‍ ഇതുവരെ ലഭിച്ച സി.സി.ടി.വി. ദൃശ്യങ്ങള്‍ക്കും വ്യക്തമായ ഉത്തരം നല്‍കാന്‍ സാധിച്ചിരുന്നില്ല.
ലോക്കല്‍ പോലീസ് നടത്തിയ പ്രാഥമിക അന്വേഷണങ്ങള്‍ ഒന്നും വിജയിക്കാതെ വന്നതോടെ, സിറ്റി പോലീസ് കമ്മീഷണര്‍
പ്രത്യേക സ്‌ക്വാഡ് രൂപീകരിച്ച് രാജ്യത്തിന്റെ വിവിധ ഭാഗങ്ങളില്‍ വ്യാപകമായ തിരച്ചില്‍ നടത്തിയെങ്കിലും കുട്ടിയെ കണ്ടെത്താന്‍ കഴിഞ്ഞിരുന്നില്ല.
തുടര്‍ന്നാണ് കേസിന്റെ അന്വേഷണം ക്രൈംബ്രാഞ്ചിന് കൈമാറിയത്.
കസ്റ്റഡിയിലെടുത്ത മൊബൈല്‍ ഫോണ്‍ കേന്ദ്രീകരിച്ച് സൈബര്‍ വിദഗ്ധരുടെ സഹായത്തോടെ കൂടുതല്‍ പരിശോധനകള്‍ നടത്താനാണ് അന്വേഷണ സംഘത്തിന്റെ തീരുമാനം.
