കോഴിക്കോട്: പേരാമ്പ്ര ഹയർ സെക്കൻഡറി സ്കൂളിലെ തെരഞ്ഞെടുപ്പ് അട്ടിമറിച്ചതായി ആരോപിച്ച് പ്രതിഷേധത്തിന് ഒരുങ്ങി എസ്എഫ്ഐ. വോട്ട് ചെയ്യാനെത്തിയ വിദ്യാർഥികളെ അധ്യാപിക ഇടപെട്ട് സ്വാധീനിച്ചെന്നാണ് എസ്എഫ്ഐയുടെ ആരോപണം.
തെരഞ്ഞെടുപ്പ് ഫലപ്രഖ്യാപനം റദ്ദാക്കി വീണ്ടും തെരഞ്ഞെടുപ്പ് നടത്തണമെന്നാണ് എസ്എഫ്ഐയുടെ ആവശ്യം. ഇതുമായി ബന്ധപ്പെട്ട് സ്കൂള് അധികൃതരുമായി നടത്തിയ ചർച്ച പരാജയപ്പെട്ടു.
എസ്എഫ്ഐക്ക് വോട്ട് ചെയ്യാനെത്തിയ വിദ്യാർഥിയെ മറ്റ് സംഘടനകള്ക്ക് വോട്ട് ചെയ്യാൻ അധ്യാപിക ഭീഷണിപ്പെടുത്തിയെന്നാണ് ആരോപണം. ഇതിനെ തുടർന്ന് കഴിഞ്ഞ ദിവസം വിദ്യാർഥികള് പ്രതിഷേധിച്ചെങ്കിലും പൊലീസ് ഇടപെട്ട് പ്രതിഷേധം അവസാനിപ്പിച്ചു.
അതേസമയം, തെരഞ്ഞെടുപ്പ് ഫലം ഇതുവരെ ഔദ്യോഗികമായി പ്രഖ്യാപിച്ചിട്ടില്ല. ഫലപ്രഖ്യാപനം നടത്താതെ വീണ്ടും തെരഞ്ഞെടുപ്പ് നടത്തണമെന്നാണ് എസ്എഫ്ഐ ആവശ്യപ്പെടുന്നത്. എന്നാല് ഫലം ഔദ്യോഗികമായി നോട്ടീസ് ബോർഡില് പ്രസിദ്ധീകരിക്കണമെന്നാണ് വലതുപക്ഷ സംഘടനകളുടെ ആവശ്യം.
