കല്‍പ്പറ്റ: എസ്‌എഫ്‌ഐ വയനാട് ജില്ലാ കമ്മിറ്റിയില്‍ കൂട്ടയടി. ജില്ലാ ജോയിന്റ് സെക്രട്ടറി സായന്തിനെ ജില്ലാ സെക്രട്ടറി ആദര്‍ശ് കേന്ദ്ര കമ്മിറ്റി അംഗമായ സാന്ദ്രയുടെ നേതൃത്വത്തില്‍ സംഘം ചേര്‍ന്ന് മര്‍ദിച്ചെന്നാണ് ആരോപണം.
ജില്ലയിലെ കോളജ് യൂണിയന്‍ തെരഞ്ഞെടുപ്പിനിടെയാണ് സംഭവം. പുല്‍പ്പള്ളി പാര്‍ട്ടി ഓഫീസിനുള്ളില്‍ വെച്ച്‌ മൈക് സ്റ്റാന്‍ഡും സ്റ്റീല്‍ റോഡും ഉപയോഗിച്ച്‌ സായന്തിനെ മർദിച്ചുവെന്ന് മുന്‍ ഭാരവാഹി ഫേസ്ബുക്ക് പോസ്റ്റിലൂടെ ആരോപിച്ചു.
കൂടെ പ്രവര്‍ത്തിക്കുന്നവന്റെ തലയിടിച്ച്‌ പൊട്ടിക്കാനുള്ള മനോവൈകൃതമുള്ള ആളുകള്‍ പ്രവര്‍ത്തിക്കുന്ന നേതൃത്വമാണോ എസ്‌എഫ്‌ഐക്കുള്ളതെന്നും പോസ്റ്റില്‍ ചോദിക്കുന്നുണ്ട്. സംഭവം നടന്ന് ഒരാഴ്ച പിന്നിട്ടിട്ടും ഇതുവരെ ഒരു നടപടിയും ഉണ്ടായിട്ടില്ല. സായന്തിന്റെ ഭാഗത്തുനിന്ന് തെറ്റായി എന്തെങ്കിലും സംഭവിച്ചിട്ടുണ്ടെങ്കില്‍ നേതൃത്വം ചര്‍ച്ച ചെയ്ത് പരിശോധിച്ച്‌ നടപടിയെടുക്കുകയാണ് വേണ്ടത്.
അല്ലാതെ ഒരാളെ സംഘം ചേര്‍ന്ന് ആക്രമിക്കുകയല്ല ചെയ്യേണ്ടതെന്നും പോസ്റ്റില്‍ പറയുന്നു. ഇത്തരത്തില്‍ തെമ്മാടിത്തരം കാണിക്കുന്ന വ്യക്തികളെ ഒറ്റപ്പെടുത്തണം. അപാരമായ ധൈര്യമാണോ അതോ ദാര്‍ഷ്ട്യമാണോ ഇത്തരം പ്രവണതകള്‍ എസ്‌എഫ്‌ഐ നേതൃത്വത്തിന്റെ ഭാഗത്ത് നിന്നുണ്ടായതിന്റെ പിന്‍ബലം എന്നുള്ളതാണ് പരിശോധിക്കേണ്ടത്. വിഷയത്തില്‍ നടപടി ഉണ്ടാകണമെന്നും പോസ്റ്റില്‍ ആവശ്യപ്പെടുന്നുണ്ട്.
