തിരുവനന്തപുരം : കൈക്കൂലി കേസില് സസ്പെന്ഷനിലായ കോട്ടയം എക്സൈസ് ഡെപ്യൂട്ടി കമ്മീഷണര് അശോക് കുമാറിനെതിരെ ഗുരുതര ആരോപണങ്ങള്. കേസില് കുടുക്കുമെന്ന് ഭീഷണിപ്പെടുത്തുക പതിവെന്നാണ് പരാതി. കൈക്കൂലി തന്നാല് കേസില് നിന്ന് ഒഴിവാക്കാമെന്ന് വാഗ്ദാനം നല്കുമെന്നും പരാതിയുണ്ട്.
മറ്റിടങ്ങളില് റിപ്പോര്ട്ട് ചെയ്യുന്ന കേസുകള് സ്വന്തം റേഞ്ചില് എത്തിച്ച് കേസെടുക്കുന്നത് പതിവ് സംഭവമാണെന്നും കണ്ടെത്തിയിട്ടുണ്ട്. ഇത്തരം കേസുകള് ഒത്തുതീര്പ്പാക്കാന് കൈക്കൂലിയും ആവശ്യപ്പെടും. കൈക്കൂലി തന്നില്ലെങ്കില് ബന്ധുക്കളെയും പ്രതികളാക്കും എന്ന് ഭീഷണിപ്പെടുത്തുമെന്ന് തുടങ്ങിയ ഗുരുതര ആരോപണങ്ങളാണ് ഉദ്യോഗസ്ഥനെതിരെ ഉള്ളത്.
ഡിപ്പാര്മെന്റിലുള്ള മറ്റ് ഉദ്യോഗസ്ഥരും സമാന ആരോപണങ്ങള് ഉന്നയിക്കുന്നുണ്ട്. ചെറിയ അളവില് ലഹരി വസ്തുക്കള് പിടികൂടിയാല് കേസെടുക്കും. അതേസമയം, വലിയ അളവില് ലഹരി വസ്തുക്കള് പിടിക്കൂടിയാല് കേസ് എടുക്കില്ലെന്നും വന് തുക കൈക്കൂലിയായി ആവശ്യപ്പെടുമെന്നും ആരോപണമുണ്ട്. കൈക്കൂലിക്ക് കൂട്ടുനില്ക്കാത്ത ഉദ്യോഗസ്ഥരെ പീഡിപ്പിക്കുമെന്നും റിപ്പോര്ട്ടുണ്ട്. ഹരിപ്പാട് നിന്ന് കൈക്കൂലി വാങ്ങി രണ്ട് ഫയലുകള് നീക്കം ചെയ്തെന്നും കണ്ടെത്തിയിരുന്നു.
2016 തിരുവല്ലയില് നിന്ന് ഉദ്യോഗസ്ഥന് 2.62 ലക്ഷം രൂപ കൈക്കൂലി വാങ്ങിയതായി കണ്ടെത്തിയിരുന്നു. ഇതില് അശോക് കുമാറിനെ സസ്പെന്ഡ് ചെയ്തിരുന്നു. ബാറുകളിലെ പരിശോധനയ്ക്കായി എക്സൈസ് കമ്മീഷണര് ജില്ലയിലെത്തിയപ്പോള് ഡെപ്യൂട്ടി കമ്മീഷ്ണറുടെ അനധികൃത ഇടപാടുകള് സംബന്ധിച്ച വിവരം ലഭിക്കുകയായിരുന്നു.
മിന്നല് പരിശോധനയ്ക്കിടയില് ചോദ്യം ചെയ്യുന്നതിനിടെ ബാര് മാനേജരുടെ ഫോണിലേക്ക് ഡെപ്യൂട്ടി കമ്മീഷണറുടെ കോള് വരികയായിരുന്നു. കമ്മീഷണര് ജില്ലയിലുണ്ടെന്നും ശ്രദ്ധിക്കണമെന്നും ഫോണ് കോളിലൂടെ ഡെപ്യൂട്ടി കമ്മീഷ്ണര് നിര്ദേശം നല്കിയതായാണ് റിപ്പോര്ട്ട് ലഭിച്ചത്. എക്സൈസ് കമ്മീഷണര് ഈ സംഭാഷണമടക്കം റെക്കോര്ഡ് ചെയ്തെടുത്തിരുന്നു. മാനേജരുടെ മൊഴി രേഖപ്പെടുത്തി ഈ തെളിവുകളുമായി അശോക് കുമാറിന്റെ വീട്ടില് പരിശോധന നടത്തിയിരുന്നു.
