തിരുവനന്തപുരം: 2023ലെ തിരുവിതാംകൂര്‍ ബോര്‍ഡ് സെക്രട്ടറി നിയമനത്തില്‍ ഉദ്യോഗസ്ഥയ്ക്കെതിരായ അച്ചടക്ക നടപടി ആവശ്യത്തില്‍ നിയമോപദേശം തേടി ബോര്‍ഡ്.
തിരുവാഭരണം കമ്മീഷണറായിരുന്ന ജി ബൈജുവിനെ സ്പെഷല്‍ റൂള്‍സിന് വിരുദ്ധമായി സ്ഥലം മാറ്റത്തിലൂടെ സെക്രട്ടറിയാക്കിയെന്ന പരാതിയിലാണ് ഉപദേശം തേടിയത്.
നിലവില്‍ ദേവസ്വം മന്ത്രിയുടെ പേഴ്സണല്‍ സ്റ്റാഫംഗമാണ് ബൈജു.
2023 ജൂണ്‍ 13ന് ജി ബൈജുവിനെ സെക്രട്ടറിയായി സ്ഥലം മാറ്റി ബോര്‍ഡ് ഇറക്കിയ ഉത്തരവ് 2022 ജൂണ്‍ 20ന് നിലവില്‍ വന്ന സ്പെഷല്‍ റൂള്‍സിന് വിരുദ്ധമെന്നാണ് പരാതി.
ഡെപ്യൂട്ടി കമ്മീഷണര്‍ തസ്തികയില്‍ ബിരുദമുള്ളവരെ സ്ഥാനക്കറ്റം വഴി നിയമിക്കണമെന്നാണ് സ്പെഷല്‍ റൂള്‍സിലെ നിര്‍ദേശം. വകുപ്പുതല പ്രൊമോഷൻ സമിതി അംഗീകരിച്ച പട്ടികയിലുള്ളവരെയാണ് സ്ഥാനക്കയറ്റത്തിന് പരിഗണിക്കേണ്ടത്.
ഇതിന് വിരുദ്ധമായി തിരുവാഭരണം കമ്മീഷണറായിരുന്ന ബൈജുവിനെ സ്ഥലം മാറ്റിയതെന്നാണ് വാദം.
