പെരുമ്പാവൂർ: അല്ലപ്ര സെന്റ് മേരീസ് സ്കൂളില്‍ കുട്ടികള്‍ അവതരിപ്പിച്ച ആക്ഷൻ സോങ്ങിലൂടെ വംശീയ വിദ്വേഷം പ്രചരിപ്പിച്ച സംഭവത്തില്‍ ഫ്രറ്റേണിറ്റി മൂവ്മെന്റ് പൊലീസില്‍ പരാതി നല്‍കി.
ഉത്തരവാദികളായവർക്കെതിരെ നടപടിയെടുക്കണമെന്ന് ആവശ്യപ്പെട്ട് ഫ്രറ്റേണിറ്റി മൂവ്മെന്റ് എറണാകുളം ജില്ലാ ജനറല്‍ സെക്രട്ടറി ആഷിക് പാനായിക്കുളം പെരുമ്പാവൂർ പൊലീസിലാണ് പരാതി നല്‍കിയത്.
കുട്ടികളുടെ കലാപരിപാടികളില്‍ പോലും മുസ്‌ലിംവിരുദ്ധത പടർത്തി ഇസ്‌ലാമോഫോബിയ പടർത്തുന്നതിനുള്ള വേദിയാക്കി മാറ്റുന്നത് ഗൗരവകരമാണ്.
വിദ്യാഭ്യാസ സ്ഥാപനങ്ങള്‍ കുട്ടികളില്‍ വളർത്തേണ്ടത് വംശീയതയും വിഭാഗീയതയുമല്ല, മറിച്ച്‌ സാഹോദര്യബോധവും സഹിഷ്ണുതയും പരസ്പര ബഹുമാനവും മാനവികതതയുമാണ്.
വംശീയ വിദ്വേഷം ശക്തിപ്പെടുന്ന സമകാലിക സാഹചര്യത്തില്‍ ഇത്തരം പ്രവണതകള്‍ക്കെതിരെ ശക്തമായ നിലപാട് സ്വീകരിക്കണമെന്നും സംഭവത്തില്‍ സമഗ്രമായ അന്വേഷണം നടത്തി ഉത്തരവാദികള്‍ക്കെതിരെ ഉചിതമായ നടപടി സ്വീകരിക്കണമെന്നും പരാതിയില്‍ ആവശ്യപ്പെട്ടു.
