തൃശൂര് : തൃശൂർ കോടശേരിയില് സര്ക്കാര് സ്കൂള് കെട്ടിടത്തിന്റെ ഒരു ഭാഗം ഇടിഞ്ഞുവീണു. ചായ്പൻകുഴി സർക്കാർ യു പി സ്കൂളിലെ കെട്ടിടമാണ് തകർന്നു വീണത്. മലയോര ഹൈവേയുടെ നിര്മ്മാണത്തിനായി മതില് പൊളിച്ച് നീക്കിയതോടെയാണ് മതിലിനോട് ചേര്ന്ന് നിന്ന കെട്ടിടത്തിന്റെ ഭാഗം തകര്ന്നത്.
ഇന്ന് രാവിലെ 11 മണിയോടെയായിരുന്നു അപകടമുണ്ടായത്. ഹൈവേ നിര്മ്മാണത്തിന്റെ ഭാഗമായി മൂന്ന് മാസത്തില് അധികമായി സ്കൂള് മതില് പൊളിച്ചുപണിയാന് തുടങ്ങിയിട്ട്. ഇന്ന് ശ്രീകൃഷ്ണ ജയന്തി പ്രമാണിച്ച് സ്കൂളിന് അവധിയായതിനാല് വലിയ അപകടമാണ് ഒഴിവായത്.
സ്കൂൾ കെട്ടിടത്തിന്റെ ഒരു ഭാഗവും ഓപ്പൺ സ്റ്റേജും പൂർണ്ണമായി തകർന്നു വീണു. മലയോര ഹൈവേയുടെ നിർമ്മാണത്തിനായി റോഡ് പൊളിച്ചിട്ട ഭാഗത്തെ മതിലാണ് ആദ്യം ഇടിഞ്ഞു വീണത്. ഇതിന് പിന്നാലെ ക്ലാസുകൾ നടത്തുന്നതിനായി ഉപയോഗിച്ചിരുന്ന കെട്ടിടഭാഗവും തകർന്നു.
