കോട്ടയം: പ്രിയപ്പെട്ട വി.പി. സജീന്ദ്രൻ, തുടങ്ങിക്കൊള്ളൂ എന്ന് സ്പീക്കർ തിരുവഞ്ചൂർ രാധാകൃഷ്ണൻ.
പിന്നീട് നിയമസഭ കണ്ടത് പിണറായി വിജയനെയും കൂട്ടരെയും എടുത്തിട്ട് കുടയുന്ന സജീന്ദ്രനെ.
കുറിക്കു കൊള്ളുന്ന പരിഹാസവുമായി വി.പി. സജീന്ദ്രൻ എം.എല്‍.എ നടത്തിയ പ്രസംഗം സോഷ്യല്‍ മീഡിയകളില്‍ വൈറല്‍. ഈ ഗവണ്‍മെന്റ് വന്നതിനുശേഷം സാമ്പത്തിക പ്രതിസന്ധി മറികടക്കാൻ ഒട്ടനവധി കാര്യങ്ങളാണ് ധനകാര്യമന്ത്രിയുടെ നേതൃത്വത്തില്‍ ചെയ്തത്.
ആദ്യം ചെയ്തത് ദൂർത്ത് ഒഴിവാക്കുക എന്നുള്ളതാണ്. കഴിഞ്ഞ ഗവണ്‍മെന്റിന്റെ കാലത്ത് നടത്തിക്കൊണ്ടിരുന്ന ദൂർത്തുകള്‍ എല്ലാം ഒഴിവാക്കി.
ദൂർത്ത് എന്ന് പറയുന്നത് 80 ലക്ഷം രൂപയ്ക്ക് പ്രതിമാസ വാടക, വാടകയ്ക്ക് പറക്കാത്ത ഹെലികോപ്റ്റർ എടുത്ത് പ്രതിവർഷം 10 കോടിയില്‍ പരം രൂപ ഖജനാവില്‍ നിന്നും അങ്ങനെ തന്നെ കൊടുത്തുകൊണ്ടിരുന്നു.
നേരത്തെയുള്ള മുഖ്യമന്ത്രിക്ക് 40-ലധികം വാഹനങ്ങള്‍ ആയിരുന്നു അകമ്പടി പോയ്ക്കൊണ്ടിരുന്നത്. ഇപ്പോഴത്തെ മുഖ്യമന്ത്രി രണ്ടോ മൂന്നോ വാഹനങ്ങളുടെ അകമ്പടിയോടു കൂടിയാണ്.
ഇങ്ങനെ ഒട്ടനവധി കാര്യങ്ങള്‍ നമ്മുടെ ഈ ഗവണ്‍മെന്റ് വന്നതിനു ശേഷം ചെലവ് ചുരുക്കലുമായി ബന്ധപ്പെട്ട് ചെയ്തതുകൊണ്ട് ഖജനാവില്‍ ഇപ്പോള്‍ പണം വന്നുകൊണ്ടിരിക്കുകയാണ്.
മൂന്ന് മാസം കൊണ്ട് 6,800 കോടിയുടെ അധിക നികുതി പിരിച്ചെടുത്തു. നാല് മാസം കൊണ്ട് ജി.എസ്.ടി. വരുമാനത്തില്‍ വൻ വർദ്ധനവുണ്ടായി. 19,583 കോടി രൂപയാണ് വരുമാനം ജി.എസ്.ടി.യിലൂടെ നമുക്ക് ലഭിച്ചത്.
ഒരു രൂപ പോലും നികുതി വർദ്ധിപ്പിക്കാത്തതായിരുന്നു ആദ്യ ബജറ്റ്. കാരണം ഇത്രയധികം സാമ്പത്തിക പ്രതിസന്ധി ഉണ്ടായ ഒരു സാഹചര്യത്തില്‍ ഒരു ബജറ്റ് അവതരിപ്പിക്കുമ്പോള്‍ സ്വാഭാവികമായും ജനങ്ങളുടെ മേലേക്ക് അധിക ഭാരം അടിച്ചേല്‍പ്പിക്കുന്നത് നമ്മള്‍ മുൻകാല ബജറ്റുകളിലൊക്കെ കണ്ടിട്ടുണ്ട്.
എന്നാല്‍ ഈ പ്രാവശ്യത്തെ ബജറ്റില്‍ നികുതി ജനങ്ങളുടെ മേല്‍ അടിച്ചേല്‍പ്പിക്കാതെ ഒരു ബജറ്റ് ധനകാര്യമന്ത്രിയുടെ നേതൃത്വത്തില്‍ ഇവിടെ അവതരിപ്പിച്ചു. കഴിഞ്ഞ ഓണക്കാലം തന്നെ ജനങ്ങളിലുണ്ടായ സന്തോഷം, അത് മാത്രം നോക്കിയാല്‍ മതി ഈ ഗവണ്‍മെന്റ് എത്രമാത്രം കാര്യങ്ങള്‍ ചെയ്തു എന്നുള്ളത്.
ഈ ഗവണ്‍മെന്റ് എന്ത് ചെയ്യുന്നു അല്ലെങ്കില്‍ എന്ത് ചെയ്തുകൊണ്ടിരിക്കുന്നു എന്നുള്ളതിന്റെ ഏറ്റവും വലിയ തെളിവായിട്ടാണ് നമ്മുടെ ആഭ്യന്തര വകുപ്പ് മന്ത്രി ഒരു വിഷയത്തില്‍ ഇടപെട്ട് ആ പ്രശ്നത്തിന് പരിഹാരമുണ്ടാക്കിയത്.
ഇങ്ങനെയൊക്കെ കാര്യങ്ങള്‍ ചെയ്തു പോകുന്ന ഒരു ഗവണ്‍മെന്റിനെ പ്രതിപക്ഷത്തുനിന്ന് ചില ആളുകള്‍, ഉദാഹരണത്തിന് മുൻ ടൂറിസം മന്ത്രി, അതുപോലെ ഡല്‍ഹിയില്‍ ഒരു എം.പി ഉണ്ട് അഖിലേന്ത്യാ പ്രസിഡന്റ്, അവരൊക്കെ ഇടയ്ക്കിടയ്ക്ക് പറയുന്നത് " മുഖ്യമന്ത്രി എല്ലാ ബുധനാഴ്ചയും വന്ന് നുണ പറഞ്ഞുകൊണ്ടിരിക്കുകയാണ്" എന്നാണ്.
ഇത് എഐയുടെ കാലഘട്ടമാണ്. സ്പീക്കറോ ഞാനോ മുഖ്യമന്ത്രിയോ ഇവിടെയിരിക്കുന്ന എം.എല്‍.എ.മാരോ ആരു നുണ പറഞ്ഞാലും ഇത് അര മണിക്കൂർ കൊണ്ട് തെളിയിക്കാൻ പറ്റുന്ന ഒന്നല്ലേ?. ഇപ്പോള്‍ അങ്ങനെ നുണ പറഞ്ഞ് ആർക്കെങ്കിലും ഒരു ഭരണാധികാരിക്ക് നില്‍ക്കാൻ കഴിയുമോ?. അപ്പോള്‍ ഒന്നും പറയാൻ ഇല്ലാത്തതുകൊണ്ടോ വാർത്ത വരാൻ വേണ്ടി എന്തെങ്കിലും വിളിച്ചു പറയുന്ന രീതിയാണ്.
എന്തായാലും നുണ പറഞ്ഞു എന്ന് മാത്രമേ പറഞ്ഞിട്ടുള്ളൂ. എന്തായാലും മുൻ മുഖ്യമന്ത്രിയെപ്പോലെ ഒരു ടിഷ്യൂ പേപ്പറില്‍ എഴുതിക്കൊടുക്കുമ്പോള്‍ അതില്‍ ഒപ്പിട്ടു കൊടുക്കുന്ന മുഖ്യമന്ത്രിയല്ല ഇപ്പോഴത്തെ മുഖ്യമന്ത്രി എന്ന് നമുക്കെല്ലാവർക്കും അറിയാമല്ലോ.
ഈ ടിഷ്യൂ പേപ്പർ എന്തിനാ കണ്ടുപിടിച്ചത്? വിമാനത്തില്‍ ഉപയോഗിക്കാൻ വേണ്ടിയാണ് ടിഷ്യൂ പേപ്പർ കണ്ടുപിടിച്ചത്. ചൈനക്കാരാണ് കണ്ടുപിടിച്ചതെന്നാണ് ഞാൻ മനസ്സിലാക്കിയിരിക്കുന്നത്.
എന്തായാലും ആ ടിഷ്യൂ പേപ്പർ ഈ ചൈനയിലെ പ്രസിഡന്റായ ഷി ജിങ്ങ് പിങ്ങിനോ നോർത്ത് കൊറിയൻ പ്രസിഡന്റ് കിം ജോങ് ഉന്നിനോ ഒപ്പിടാൻ പറ്റാത്ത കാര്യം നമ്മുടെ കേരളത്തിന്റെ മുൻ മുഖ്യമന്ത്രി ഒപ്പിട്ടു കാണിച്ചു തന്നു; അതിന്റെ പേറ്റന്റ് നമുക്ക് കിട്ടിയിരിക്കുകയാണ്.
സി.പി.എമ്മിന്റെ സമ്മേളനമൊക്കെ കഴിഞ്ഞു. വിശാല കമ്മിറ്റിയും കഴിഞ്ഞു. ആ വിശാല കമ്മിറ്റിയിലെ ഏറ്റവും വലിയ ചർച്ച പാർട്ടിയില്‍ തിരുത്തല്‍ ഉണ്ടാവും എന്നാണ്; നമുക്ക് വലിയ സന്തോഷമായി. കാരണം ഈ തുടർഭരണം കിട്ടിയിട്ട് പിന്നെ അവർക്ക് ബംഗാളിലും ത്രിപുരയിലുമൊന്നും വരാൻ പറ്റിയിട്ടില്ല.
അപ്പോ ഇവിടെ തിരുത്തി പോവുകയാണെങ്കില്‍ നിലവിലുള്ള പാർട്ടി ഓഫീസും മറ്റുള്ള പാർട്ടി കാര്യങ്ങളും കൊണ്ടുപോകാതെയെങ്കിലും ഇരിക്കുമല്ലോ എന്നുള്ള ആശ്വാസത്തില്‍ ഞാൻ എന്താണ് തിരുത്തല്‍ നടന്നത് എന്നതിനെക്കുറിച്ച്‌ ഇങ്ങനെ അന്വേഷിച്ചുകൊണ്ടിരുന്നു.
ഞാൻ ഈ തിരുവനന്തപുരത്തെ ഒരു മുതിർന്ന മാധ്യമപ്രവർത്തകനോട് ചോദിച്ചു: "സി.പി.എം. പാർട്ടി ഈ വിശാല കമ്മിറ്റി ഒക്കെ കഴിഞ്ഞപ്പോള്‍ തിരുത്തല്‍ തുടങ്ങി എന്ന് പറഞ്ഞു. അപ്പോ എന്താണ് അതിനെക്കുറിച്ച്‌ എന്തെങ്കിലും വിവരം കിട്ടിയോ?" എന്ന് ചോദിച്ചപ്പോള്‍ ആ മാധ്യമപ്രവർത്തകൻ പറഞ്ഞു: "അങ്ങനെ നിങ്ങളുടെ പാർട്ടിയിലെ പോലെ സി.പി.എമ്മില്‍ നിന്നൊന്നും ഒരു വിവരവും കിട്ടില്ല. അവരുടേത് വലിയ കേഡർ പാർട്ടിയാ" എന്ന് പറഞ്ഞു.
എന്നാലും ഞാൻ ഒന്നന്വേഷിച്ചു. ഞാൻ അന്വേഷിച്ചു കഴിഞ്ഞപ്പോള്‍ കിട്ടിയ വിവരമനുസരിച്ച്‌, ഇനി മുതല്‍ ഡോക്ടർ തോമസ് ഐസക്, ഐസക് തോമസ് എന്നും, സജീവ് ചെറിയാൻ, ചെറിയാൻ സജീവ് എന്നും, ബാലഗോപാലൻ, ഗോപാലബാലൻ എന്നും എ.കെ.ജി. സെന്ററിലെ രജിസ്റ്ററില്‍ തിരുത്തിയിട്ടുണ്ട്. ഇനി തിരുത്തല്‍ ഇങ്ങനെ തുടർന്നുകൊണ്ടേയിരിക്കും.
ഈ സമ്മേളനത്തില്‍ നമ്മുടെ സെക്രട്ടറി ഗോവിന്ദൻ മാഷിനെ ശാസിച്ചു എന്ന് ഒരു വാർത്ത വന്നു. ആ പാവം എന്തുപിഴച്ചു? അദ്ദേഹം ഒന്നും ചെയ്തില്ല. അദ്ദേഹത്തെ ശാസിച്ചു എന്നുള്ളതാണ് വാർത്ത വന്നത്. അപ്പോ ഈ ഗോവിന്ദൻ മാഷിനെ ശാസിക്കാൻ മാത്രം അവിടെയൊന്നും നടന്നില്ല.
പക്ഷെ പത്രവാർത്ത ഗോവിന്ദൻ മാഷ് ഇലക്ഷൻ സമയത്ത് വേണ്ടത്ര ജാഗ്രത കാണിച്ചില്ല എന്നുള്ളതാണ്. എന്തായാലും ഗോവിന്ദൻ മാഷ് ജാഗ്രത കാണിച്ചില്ലെങ്കിലും കേരളത്തിലെ ജനങ്ങള്‍ കൃത്യമായി ജാഗ്രത കാണിച്ചല്ലോ, അപ്പോ അതുമതി.
ഞാൻ ഒക്കെ സ്കൂളില്‍ പഠിക്കുന്ന സമയത്ത് ഇ.എം.എസിനെ ശാസിച്ചു എന്നൊക്കെ ഒരു വാർത്ത വന്നിരുന്നു. അപ്പോ ഇ.എം.എസിനെ ശാസിക്കുക... നമുക്ക് സംശയമായി. കാരണം അദ്ദേഹം കോണ്‍ഗ്രസുകാരനായിരുന്നു, അപ്പോള്‍ നല്ലൊരു കോണ്‍ഗ്രസുകാരൻ, പിന്നീട് കമ്മ്യൂണിസ്റ്റുകാരനായി. വാക്കുകൊണ്ടോ പ്രവർത്തികൊണ്ടോ അദ്ദേഹത്തിന്റെ ഭാഗത്തുനിന്ന് ഒരു തെറ്റും വരാൻ... നമുക്കാർക്കും അങ്ങനെ ചിന്തിക്കാൻ കഴിയില്ല.
പക്ഷെ ഇ.എം.എസിനെയും ശാസിച്ചു എന്നൊരു വാർത്ത വന്നതുകൊണ്ട് കേരളത്തിലെ ബുദ്ധിമാന്മാരായ ചില സി.പി.എം. നേതാക്കള്‍ ഗസറ്റില്‍ കൊടുത്ത് പേര് അങ്ങ് മാറ്റി.
കാരണം മറ്റൊന്നും കൊണ്ടല്ല, അവർ ചിലർ 'ബാലൻ' എന്ന് പേരിട്ടു. ചിലർ 'ബേബി' എന്ന് പേരിട്ടു. കാരണം അച്ചടക്കസമിതി കേന്ദ്രകമ്മിറ്റിയില്‍ ചെല്ലുമ്പോള്‍ ബാലൻ എന്ന് കാണുമ്പോള്‍ "ഓ, സ്മോള്‍ ബോയ്, ലീവ് ഇറ്റ്". അതേപോലെതന്നെ ബേബി എന്ന് കാണുമ്പോള്‍ "ഓ, സ്മോള്‍ ബോയ്, ലീവ് ഇറ്റ്". അപ്പോ അങ്ങനെ ആ രീതിയില്‍ എല്ലാം രക്ഷപ്പെട്ടു പോവുകയാണ്.
പാവം ഗോവിന്ദൻ മാഷിന് ഇത് ആരും പറഞ്ഞു കൊടുത്തില്ല. ഗോവിന്ദൻ മാഷിന് ഇത് പറഞ്ഞുകൊടുക്കാത്തതുകൊണ്ട് അദ്ദേഹം ഇപ്പോഴും ശാസന വാങ്ങിച്ചുകൊണ്ട് നടക്കുകയാണ്.
അടുത്ത പാർലമെന്റ് തിരഞ്ഞെടുപ്പ് കഴിയുമ്പോഴും ഇതേപോലൊരു ശാസന വരും. ഇതേപോലൊരു ശാസന വരും. അപ്പോ അതില്‍ നിന്ന് രക്ഷപ്പെടാൻ ഗോവിന്ദൻ മാഷോട് ആകെ എനിക്ക് പറയുവാനുള്ളത് ഒന്നെങ്കില്‍ 'കുഞ്ഞുണ്ണി മാഷ്' എന്നോ അല്ലെങ്കില്‍ 'കൊച്ചുമോൻ മാഷ്' എന്നോ ഇനിയെങ്കിലും ഗസറ്റില്‍ പേര് മാറ്റിയാല്‍ അദ്ദേഹത്തിന് രക്ഷപ്പെടാനുള്ള ഒരു സാഹചര്യം ഉണ്ടാകും.
സ്പീക്കർ ഒരു വിഷയത്തില്‍ കൂടെ ഇടപെടണം എന്നുള്ളതാണ് എന്റെ അഭ്യർത്ഥന. ഞാൻ പരിശോധിച്ചു നോക്കിയപ്പോള്‍ മൂന്നോ നാലോ വകുപ്പൊഴിച്ചുള്ള എല്ലാ വകുപ്പുകളും അങ്ങ് ഈ സംസ്ഥാനത്ത് കൈകാര്യം ചെയ്തിട്ടുണ്ട്. ഇപ്പോ ഇതാ സ്പീക്കറൂടെയായി! അങ്ങയെക്കുറിച്ച്‌ ആർക്കും ഒരു പരാതിയും പറയാൻ പറ്റത്തില്ല, എല്ലാം നിഷ്പക്ഷമായി കൊണ്ടുനടക്കുകയാണ്.
ഞാൻ ഇവിടെ അന്വേഷിച്ചപ്പോള്‍ ആകെപ്പാടെ അങ്ങയെക്കുറിച്ച്‌ ഒരു പരാതി വന്നത്, ഇവിടെ പ്രതിപക്ഷം അടിയന്തരപ്രമേയം അവതരിപ്പിച്ച്‌ പുറത്തേക്കിറങ്ങാൻ നേരത്ത് "ബോയ്ക്കോട്ട്" എന്ന് പറഞ്ഞപ്പോള്‍ അങ്ങ് "ആയിക്കോട്ടെ" എന്ന് പറഞ്ഞു. അത് മാത്രമാണ് അങ്ങയെക്കുറിച്ച്‌ ഒരു പരാതിയുള്ളത്.
എനിക്ക് പറയാനുള്ളത് സ്പീക്കർ ഇടപെട്ട്, അങ്ങ് ഈ വകുപ്പുകളും ചട്ടങ്ങളും ഒക്കെ ഒന്ന് സൂക്ഷ്മമായി പരിശോധിക്കണം. അങ്ങയ്ക്ക് എല്ലാം അറിയാം, എങ്കില്‍പോലും ഒന്നുകൂടി ഒന്ന് പരിശോധിച്ചിട്ട് ഈ അപ്പുറത്തെ ഡെപ്യൂട്ടി ലീഡറുടെ വിഷയം ഒന്ന് പരിഹരിച്ചു കൊടുക്കണം. ആ സി.പി.ഐയുടെ രാജനെ അങ്ങ് അനൗണ്‍സ് ചെയ്യണം. അവിടുന്ന് എഴുതിത്തരുമെന്ന് പ്രതീക്ഷിക്കുന്നില്ല
അവരുടെ വേദന കണ്ടിട്ടാണ് പറയുന്നത്. ഈ സി.പി.ഐ.ക്കാർ പൊതുവേ പാവങ്ങളാണ്. അവരെ ഒരുമാതിരിപ്പെട്ട ആളുകളെല്ലാം പാവങ്ങളും മര്യാദക്കാരും അച്യുതമേനോന്റെയും പി.കെ.വി.യുടെയുമൊക്കെ അനുയായികളായിട്ടുള്ള ആളുകളാണ്.
അപ്പോ അവരുടെ വിഷയം അങ്ങ് പരിഹരിച്ച്‌ സാറങ്ങ് അനൗണ്‍സ് ചെയ്ത് അങ്ങ് കൊടുക്കണം. അപ്പുറത്തുനിന്ന് എന്തായാലും പേര് കിട്ടില്ല. ഇനി അപ്പുറത്തുനിന്ന് ഒരാളെ വെച്ചതിന്റെ പേരില്‍ ഇപ്പുറത്ത് ബാലൻസ് ചെയ്യറ്റൂ എന്ന് വല്ലതും തോന്നിയാല്‍ സാറ് വേണമെങ്കില്‍ ഇപ്പുറത്തുനിന്ന് എന്നെത്തന്നെ അങ്ങ് വെച്ചോ, ഞാൻ ഒരു പരാതിയും പറയാൻ വരത്തില്ല! അപ്പോ അപ്പോ ആ വിഷയം അങ്ങ് പരിഹരിക്കണം എന്നുള്ളതാണ് എന്റെയൊരു അഭ്യർത്ഥന.
ഈ ഈ ഡെപ്യൂട്ടി ലീഡർ വിഷയം വിവാദമായി നിന്നപ്പോള്‍ സി.പി.ഐ.ക്കാർക്ക് കപ്പാസിറ്റി ഉണ്ടോ എന്ന് ചോദിച്ചു കഴിഞ്ഞപ്പോള്‍ സത്യം പറഞ്ഞാല്‍ സി.പി.ഐ.ക്കാർ വളരെ മര്യാദക്കാരായതുകൊണ്ട് അതില്‍ വലിയ കേറി പിടിച്ചില്ല.
അപ്പോ ഈ സി.പി.ഐയിലെ ബുദ്ധിജീവികളായ കുറെ ആളുകളുണ്ട്. അവര് സ്ഥാനമാനങ്ങള്‍ക്ക് വരില്ല, തിരഞ്ഞെടുപ്പില്‍ മത്സരിക്കാൻ വരില്ല. അവരുടെ സങ്കടം ഇപ്പോ പ്രവീണ്‍ കുമാർ നമ്മുടെ എം.എല്‍.എ. മുദ്രാവാക്യം വിളിച്ചതുപോലെ, "ഉള്ളില്‍ സങ്കടമുണ്ടോട്ടോ, നമ്മള്‍ നാളെയും കാണണ്ടേ, നാണമില്ലേ ഇങ്ങനെ പറയാൻ" എന്ന് അവർ വീട്ടില്‍ കതകടച്ചിരുന്ന് ഭാര്യയും മക്കളും കേള്‍ക്കാതെ മുദ്രാവാക്യം വിളിച്ച്‌ പ്രതിഷേധിച്ചു.
അവര് ജനയുഗവും പത്രത്തില്‍ കൊടുത്തില്ല, ഫെയ്സ്ബുക്കില്‍ എഴുതിയില്ല, പത്രമാധ്യമങ്ങളില്‍ ഒന്നിലും കൊടുത്തില്ല. പാവങ്ങള്‍ അങ്ങനെ പ്രതിഷേധിക്കുന്നവരാണ്. അപ്പോ അതുകൊണ്ടാണ് സ്പീക്കർ ഇതില്‍ ഇടപെടണം എന്ന് പറയുന്നത്.
ഞാൻ അടുത്തകാലത്ത് ഒരു സി.പി.എം. നേതാവിനെ കണ്ടപ്പോള്‍ ഞാൻ പറഞ്ഞു "നിങ്ങള്‍ ഈ സി.പി.ഐ.ക്കാരെ അങ്ങനെ കൈകാര്യം ചെയ്തത് ശരിയായില്ല. 5000 വോട്ടില്‍ കപ്പാസിറ്റി ഇല്ല എന്ന് പറയുന്നത് ശരിയല്ല" എന്ന് പറഞ്ഞു. അപ്പോ അവര് ചോദിക്കുകയാ: "നിങ്ങള്‍ ആരെക്കുറിച്ചാ പറയുന്നേ?" ഞാൻ പറഞ്ഞു: "സി.പി.ഐയെ ഇപ്പോള്‍ നിങ്ങളും മാധ്യമങ്ങളും മാത്രമാണ് അവരെ സി.പി.ഐ. എന്ന് വിളിക്കുന്നത്.
ഞങ്ങള്‍ അവരെ എ.പി.ഐ. എന്നാണ് വിളിക്കുന്നത് " ഞാൻ ചോദിച്ചു: "എന്താ എ.പി.ഐ.?" "ആന്റണി പെരുമ്പാവൂർ പാർട്ടി ഓഫ് ഇന്ത്യ!" അതായത് മുതലാളി പണിയെടുക്കുമ്പോള്‍ നോക്കിയിരിക്കുന്ന തൊഴിലാളി ഒരാളെയുള്ളൂ, അത് പെരുമ്പാവൂർ ക്കാരൻ ആന്റണി ആണെങ്കില്‍ ഞങ്ങള്‍ പണിയെടുക്കും, അവര് നോക്കിയിരിക്കും. ഞങ്ങള്‍ പണിയെടുക്കും, അവര് നോക്കിയിരിക്കും. എല്ലാ സൗകര്യങ്ങളും ഉപയോഗിക്കും. ഇതാണ്.
അപ്പോ ഞാൻ പറഞ്ഞു: "അങ്ങനെ പറയരുത്. അവര് അഖിലേന്ത്യാ പാർട്ടിയാണ്. അവരെ ഡല്‍ഹിയിലൊക്കെ അവർക്ക് ആളുണ്ട്, ഡി. രാജയുണ്ട്, ആനി രാജയുണ്ട്, ഇപ്പോള്‍ ഒരു ശക്തയായ നേതാവ് അവരുടെ മകള്‍ അപരാജിതയുണ്ട്, അങ്ങനെ വലിയ എല്ലായിടത്തും ഉള്ള ആളുകളാണ്.
അപ്പോ ആ സി.പി.എം. നേതാവ് പറയുകയാണ്: "ഇപ്പോഴത്തെ ബി.എസ്.എൻ.എലിന്റെ സ്ഥിതിയാണ് അവരുടെ പാർട്ടിക്ക്. കാരണം ടവർ എല്ലായിടത്തും കാണും, പക്ഷെ റേഞ്ച് ഒരിടത്തും കാണില്ല!".
ഇങ്ങനെയൊക്കെയാണെങ്കിലും ഞാൻ എന്റേതായ ഒരു അന്വേഷണം നടത്തി. എന്തുകൊണ്ടാണ് ഇപ്പോള്‍ ഇടതുപക്ഷ ഐക്യം... നമുക്കെതിരെ സമരം ചെയ്യണമല്ലോ. നമുക്കെതിരെ സമരം ചെയ്യണമല്ലോ. കാരണം സമരം പിറ്റേദിവസം തുടങ്ങി. അപ്പോ ഇനി ആണെങ്കിലും കേരള കോണ്‍ഗ്രസിനെ കൂട്ടാൻ പറ്റില്ല.
കാരണം അവര് ഭരണം പോയപ്പോള്‍ തന്നെ അപ്പുറത്തോട്ട് കയറിപ്പോയി, ഇനി എന്നാണ് തിരിച്ചു വരുന്നതെന്ന് അറിയാൻ പറ്റത്തില്ല. അപ്പോ ആകെ സി.പി.ഐക്കാരുള്ളൂ, അത്യാവശ്യം അണികളൊക്കെ ഉണ്ട് അവർക്ക്. റേഞ്ച് അധികമില്ലെങ്കിലും ഇവിടെ ഇച്ചിരി റേഞ്ചുണ്ട്. അപ്പോ അങ്ങനെ ഒരു യോജിപ്പിന്റെ ഒരു ഇത് വേണമല്ലോ.
