തിരുവനന്തപുരം: ശബരിമല മണ്ഡല-മകരവിളക്ക് തീര്ത്ഥാടന സീസണ് ആരംഭിക്കാന് നാളുകള് മാത്രം ബാക്കിനില്ക്കെ, സന്നിധാനത്തെയും പമ്പയിലെയും മുന്നൊരുക്കങ്ങള് അപ്പാടെ പാളിയെന്ന വിലയിരുത്തലില് തിരുവിതാംകൂര് ദേവസ്വം ബോര്ഡ് പ്രസിഡന്റ് കെ.
ജയകുമാര് രാജിവെക്കാന് സന്നദ്ധത അറിയിച്ചു. വിഷയത്തില് തിരുവിതാംകൂര് ദേവസ്വം ബോര്ഡില് ഭരണപരമായ നിര്ണ്ണായക നീക്കങ്ങളാണ് പുരോഗമിക്കുന്നത്. വിഷയം അതീവ ഗുരുതരമായി ഉയര്ന്നുവന്ന സാഹചര്യത്തില് രാവിലെ മുഖ്യമന്ത്രി വി.ഡി. സതീശനുമായി നടത്തുന്ന നിര്ണ്ണായക കൂടിക്കാഴ്ചയ്ക്ക് ശേഷം ജയകുമാറിനോട് രാജി ആവശ്യപ്പെടാനാണ് സാധ്യത.
തീര്ത്ഥാടന സീസണ് തൊട്ടുമുമ്പ് ശബരിമലയിലെ അടിസ്ഥാന സൗകര്യങ്ങളും പ്രസാദ വിതരണത്തിനുള്ള ക്രമീകരണങ്ങളും പൂര്ത്തിയായിട്ടില്ലെന്നത് യാഥാര്ത്ഥ്യമാണ്. ബോര്ഡ് ഭരണത്തില് വേണ്ടത്ര പിടിമുറുക്കുന്നതില് തിരുവിതാംകൂര് ദേവസ്വം പ്രസിഡന്റിന് വലിയ വീഴ്ച സംഭവിച്ചുവെന്ന കടുത്ത അമര്ഷത്തിലാണ് സര്ക്കാര്. മുന്നൊരുക്കങ്ങളിലെ അനാസ്ഥയെക്കുറിച്ച് ദേവസ്വം മന്ത്രി കെ. മുരളീധരന് തന്റെ കടുത്ത എതിര്പ്പും വിയോജിപ്പും മുഖ്യമന്ത്രി വി.ഡി. സതീശനെ നേരിട്ട് അറിയിച്ചു കഴിഞ്ഞു.
കെ. ജയകുമാറിനെ പ്രസിഡന്റ് സ്ഥാനത്തു മുന്പോട്ടു കൊണ്ടുപോയാല് വരും ദിവസങ്ങളില് സര്ക്കാരിന് വലിയ രീതിയിലുള്ള രാഷ്ട്രീയ തിരിച്ചടിയാകും ഉണ്ടാകുകയെന്ന് മന്ത്രി മുരളീധരന് മുഖ്യമന്ത്രിയെ ബോധ്യപ്പെടുത്തിയിട്ടുണ്ട്. ഒരുക്കങ്ങളൊന്നും പൂര്ത്തിയാകാത്ത പശ്ചാത്തലത്തില്, പ്രസിഡന്റിനെ മാറ്റിനിര്ത്തി അടിയന്തരമായി കാര്യങ്ങള് നിയന്ത്രണവിധേയമാക്കണമെന്നാണ് ദേവസ്വം വകുപ്പിന്റെ ശക്തമായ നിലപാട്. രാവിലെ കെ. ജയകുമാര് മുഖ്യമന്ത്രി വി.ഡി. സതീശനുമായി നടത്തുന്ന കൂടിക്കാഴ്ച ഈ വിഷയത്തില് തികച്ചും നിര്ണായകമാകും.
കൂടിക്കാഴ്ചയില് വച്ച് മുഖ്യമന്ത്രി നേരിട്ട് അദ്ദേഹത്തോട് രാജി ആവശ്യപ്പെടാനാണ് സാധ്യത. സര്ക്കാരിന്റെയും വകുപ്പിന്റെയും കടുത്ത അതൃപ്തി മനസ്സിലാക്കി രാജിവെക്കാന് കെ. ജയകുമാറും സന്നദ്ധത പ്രകടിപ്പിച്ചിട്ടുണ്ടെന്നാണ് വിവരങ്ങള് നല്കുന്ന സൂചന. ശബരിമലയില് അരവണ നിര്മ്മാണ പ്ലാന്റിന്റെ അറ്റകുറ്റപ്പണികളും കരാറുകളും വൈകിയതും, പുതിയ പ്ലാന്റ് സജ്ജീകരിക്കുന്നതിലുണ്ടായ കാലതാമസവുമാണ് പ്രധാന വീഴ്ചയായി ചൂണ്ടിക്കാണിക്കപ്പെടുന്നത്. സമയബന്ധിതമായി കരാര് നടപടികള് പൂര്ത്തിയാക്കാത്തതിനാല് തീര്ത്ഥാടന സമയത്ത് അരവണ ഉല്പ്പാദനത്തെയും വിതരണത്തെയും അത് സാരമായി ബാധിക്കുമെന്ന ആശങ്ക ഉയര്ന്നിട്ടുണ്ട്. അരവണയ്ക്ക് പുറമേ അപ്പം നിര്മ്മാണത്തിനുള്ള കരാറിലും വലിയ അവ്യക്തതയാണ് നിലനില്ക്കുന്നത്.
നിര്മ്മാണ കരാറുകള് നല്കുന്നതില് ദേവസ്വം ബോര്ഡിന്റെ ഭാഗത്തുനിന്നുണ്ടായ ഈ അനാസ്ഥയും സുതാര്യതയില്ലായ്മയും ഭക്തര്ക്ക് കൃത്യസമയത്ത് പ്രസാദം ലഭ്യമാക്കുന്നതിന് വലിയ തടസ്സം സൃഷ്ടിക്കും. പ്രസാദ നിര്മ്മാണത്തിന് അത്യന്താപേക്ഷിതമായ ഏലക്ക, മുന്തിരി തുടങ്ങിയ അവശ്യ സാധനങ്ങളുടെ കരാറുകളും ഇതുവരെ പൂര്ത്തിയാക്കാന് ദേവസ്വം ബോര്ഡിന് സാധിച്ചിട്ടില്ല. ഈ സാധനങ്ങള് മുന്കൂട്ടി എത്തിച്ച് സ്റ്റോക്ക് ചെയ്താല് മാത്രമേ തീര്ത്ഥാടന കാലത്ത് തടസ്സമില്ലാതെ പ്രസാദ നിര്മ്മാണം നടക്കുകയുള്ളൂ.
സീസണ് തൊട്ടടുത്തെത്തിനില്ക്കെ ഇനി കരാറുകള് നല്കി, സാധനങ്ങള് എത്തിച്ച് സ്റ്റോക്ക് അടിക്കുക എന്നത് പ്രായോഗികമായി വലിയ പ്രതിസന്ധിയാണ് ഉണ്ടാക്കുന്നത്. ഇത്രയും സങ്കീര്ണ്ണമായ വീഴ്ചകള് സംഭവിച്ചിട്ടും മുന്കൂട്ടി കൃത്യമായ ആസൂത്രണം നടത്തുന്നതില് ദേവസ്വം ബോര്ഡ് പ്രസിഡന്റിന്റെ ഭാഗത്തുനിന്ന് ഗുരുതര വീഴ്ചയുണ്ടായി എന്നാണ് ഭരണപക്ഷ വിലയിരുത്തല്.
ശബരിമല തീര്ത്ഥാടനം ആരംഭിക്കാന് ദിവസങ്ങള് മാത്രം ശേഷിക്കെ ഭരണതലത്തിലുണ്ടായ ഈ അനാസ്ഥ സര്ക്കാരിന്റെ പ്രതിച്ഛായയെ ബാധിക്കുമെന്നതിനാലാണ് മുഖ്യമന്ത്രി നേരിട്ട് വിഷയത്തില് ഇടപെടുന്നത്. കെ. ജയകുമാറിന്റെ രാജിയിലൂടെ ബോര്ഡിന്റെ പ്രവര്ത്തനം അടിയന്തരമായി പുനഃസംഘടിപ്പിച്ച് മുന്നൊരുക്കങ്ങള് യുദ്ധകാലാടിസ്ഥാനത്തില് പൂര്ത്തിയാക്കാനാണ് സര്ക്കാര് ലക്ഷ്യമിടുന്നത്. ഇന്ന് രാവിലെ മുഖ്യമന്ത്രിയുമായുള്ള കൂടിക്കാഴ്ചയ്ക്ക് ശേഷം കെ. ജയകുമാര് രാജി പ്രഖ്യാപിച്ചേക്കുമെന്നാണ് ദേവസ്വം വൃത്തങ്ങളില് നിന്നുള്ള വിവരം.
വരും മണിക്കൂറുകളില് പുതിയ ദേവസ്വം ബോര്ഡ് പ്രസിഡന്റിനെ സംബന്ധിച്ച പ്രഖ്യാപനവും, ശബരിമലയിലെ മുന്നൊരുക്കങ്ങള് വിലയിരുത്തുന്നതിനുള്ള അടിയന്തര ഉന്നതതല യോഗങ്ങളും നടക്കുമെന്നാണ് പ്രതീക്ഷിക്കുന്നത്.
