പത്തനംതിട്ട: ശബരിമല തീർഥാടനകാലത്തിന് മുന്നോടിയായുള്ള ഒരുക്കങ്ങളിലെ വിവിധ വീഴ്ചകളും അതുമൂലം ഉണ്ടാകുന്ന വലിയ ആശങ്കകളും ചൂണ്ടിക്കാട്ടി ഭരണാനുകൂല സംഘടനയായ തിരുവിതാംകൂർ ദേവസ്വം എംപ്ലോയീസ് ഫ്രണ്ട് മുഖ്യമന്ത്രിക്കും ദേവസ്വം വകുപ്പ് മന്ത്രിക്കും പരാതി നല്‍കി.
ബോർഡിന്‍റെ നിലവിലെ പല തീരുമാനങ്ങളും 'വിത്തെടുത്ത് കുത്തുന്നതിന്' തുല്യമാണെന്നും, വരുമാന സ്രോതസുകള്‍ അടച്ചുകളയുന്ന ഇത്തരം നടപടികള്‍ സർക്കാരിന്‍റെ പ്രതിച്ഛായ തകർക്കാനുള്ള ചില സ്ഥാപിത താത്പര്യക്കാരുടെ ആസൂത്രിത ശ്രമമാണോ എന്ന് സംശയിക്കേണ്ടിയിരിക്കുന്നുവെന്നും യൂണിയൻ വ്യക്തമാക്കുന്നു.
കരാറുകാർ പമ്പയില്‍ സാധനങ്ങള്‍ എത്തിച്ചാല്‍ മതിയെന്നും പരിശോധനയ്ക്ക് ശേഷം ബോർഡ് സ്വന്തം ചെലവില്‍ സന്നിധാനത്ത് എത്തിക്കുമെന്നുള്ള ഈ വർഷത്തെ തീരുമാനം അരവണ നിർമ്മാണത്തിനാവശ്യമായ ശർക്കര ഉള്‍പ്പെടെയുള്ള എല്ലാ വസ്തുക്കളുടെയും നീക്കത്തെയും സംഭരണത്തെയും സാരമായി ബാധിക്കുമെന്ന് യൂണിയൻ ചൂണ്ടിക്കാണിക്കുന്നു.
ട്രാക്ടറുകളുടെ ലഭ്യതക്കുറവ്, അധികച്ചെലവ്, വാഹനങ്ങളുടെ കാത്തിരിപ്പ്, തൊഴിലാളികളുടെ കുറവ് എന്നിവ ഗുരുതരമായ പ്രതിസന്ധി സൃഷ്ടിക്കും.
ഇതിനുപുറമേ, 2025ലെ ലേലങ്ങളില്‍ നിന്നും 28ഓളം ഇനങ്ങള്‍ നിസാര കാരണങ്ങളുടെ പേരില്‍ ഇത്തവണ ഒഴിവാക്കിയിട്ടുണ്ട്. ഇതിലൂടെ മാത്രം ബോർഡിന് പത്ത് കോടി രൂപയ്ക്കുമേല്‍ നഷ്ടം ഉണ്ടാകും.
ഉയർന്ന ലേലത്തുക ലഭിച്ചിരുന്ന ശൗചാലയ സമുച്ചയങ്ങള്‍ സൗജന്യമാക്കുന്നതിന്‍റെ സാമ്പത്തിക പ്രത്യാഘാതങ്ങള്‍ വിലയിരുത്താതെ, വെർച്വല്‍ ക്യൂ ഫീസ് 10 രൂപയായി ഉയർത്താനുള്ള നീക്കം തീർഥാടകരുടെ മേല്‍ അധിക ബാധ്യത ഉണ്ടാക്കുമെന്ന് സംഘടന കുറ്റപ്പെടുത്തുന്നു.
ടോയ്‌ലറ്റ് ലേലത്തിലൂടെ മാത്രം മൂന്നു കോടിയിലധികം വരുമാനം ലഭിക്കുമ്പോള്‍, ഫീസ് വർദ്ധിപ്പിച്ചാല്‍ ഈ തുകയുടെ അടുത്ത് പോലും എത്തില്ല. എരുമേലിയിലെ ലേലനടപടികളിലെ കാലതാമസവും പരിശോധിക്കപ്പെടേണ്ടതുണ്ട്.
ആറു വർഷത്തോളം സർവീസ് ബാക്കിയുള്ള നിലവിലെ ദേവസ്വം എക്സിക്യൂട്ടീവ് ഓഫീസർ സമർപ്പിച്ച സ്വമേധയാ വിരമിക്കല്‍ അപേക്ഷയും പിന്നീട് അത് പിൻവലിച്ചതുമായ സാഹചര്യങ്ങളും ദുരൂഹമാണ്.
