എരുമേലി: ശബരിമല മണ്ഡല-മകരവിളക്ക് തീർത്ഥാടന കാലത്തിന് നാളെ തുടക്കമാകുന്നതോടെ എരുമേലി പട്ടണം ഇനി പൂർണ്ണമായും ഭക്തിയുടെയും തിരക്കിന്റെയും ലഹരിയിലേക്ക്.
രാവും പകലും ഇടതടവില്ലാതെ മുഴങ്ങുന്ന 'സ്വാമിയേ ശരണമയ്യപ്പ' വിളികളാല്‍ മുഖരിതമാകുന്ന എരുമേലിയില്‍, തീർത്ഥാടകരുടെ സുരക്ഷ ഉറപ്പാക്കാൻ പഴുതടച്ച സംവിധാനങ്ങളാണ് പോലീസ് ഒരുക്കിയിരിക്കുന്നത്. 50 ഹൈടെക് നിരീക്ഷണ ക്യാമറകളും 530 പോലീസുകാരുമാണ് തീർത്ഥാടകർക്ക് കാവലായി എരുമേലിയിലുണ്ടാകുക.
2019-ല്‍ 1.65 കോടി രൂപ ചെലവഴിച്ച്‌ പോലീസ് സ്ഥാപിച്ച 36 സ്ഥിരം ഹൈടെക് ക്യാമറകളുടെ അറ്റകുറ്റപ്പണികള്‍ പൂർത്തിയാക്കി പ്രവർത്തനസജ്ജമാക്കിയിട്ടുണ്ട്. കേരളത്തിലെ അപൂർവ്വം പോലീസ് സ്റ്റേഷനുകളില്‍ മാത്രം കാണുന്ന ഈ ഹൈടെക് നിരീക്ഷണ സെല്ലിന് പുറമെ പഞ്ചായത്തിന്റെ 14 ക്യാമറകളും കൂടി സജ്ജമായതോടെ ആകെ 50 ക്യാമറകളാണ് പട്ടണത്തെ നിരീക്ഷിക്കുന്നത്.
ഓട്ടോമാറ്റിക്കായി കറങ്ങിയും വിവിധ ദിശകളിലേക്ക് തിരിഞ്ഞും ഹൈ-റെസലൂഷനില്‍ ദൃശ്യങ്ങള്‍ പകർത്താൻ ഇവയ്ക്ക് സാധിക്കും. പ്രവേശന വഴികള്‍, ആരാധനാലയങ്ങള്‍, പാർക്കിംഗ് ഗ്രൗണ്ടുകള്‍, ടൗണ്‍ പരിസരങ്ങള്‍ എന്നിവയെല്ലാം 24 മണിക്കൂറും പോലീസിന്റെ നിരീക്ഷണ വലയത്തിലായിരിക്കും.
നാളെ മണ്ഡലകാലം ആരംഭിക്കുന്നതോടെ എരുമേലിയില്‍ പോലീസ് കണ്‍ട്രോള്‍ റൂം പ്രവർത്തനം തുടങ്ങും. ഇതിന് പുറമെ ജില്ലാ പോലീസ് മേധാവിയുടെ ഓഫീസിലും തത്സമയ നിരീക്ഷണ സംവിധാനം പ്രവർത്തിക്കും.
ജനുവരി 20 വരെ ആറ് ഘട്ടങ്ങളിലായാണ് പോലീസ് സേനയെ വിന്യസിക്കുന്നത്. മകരവിളക്ക്, ചന്ദനക്കുടം, പേട്ടതുള്ളല്‍ ദിവസങ്ങളില്‍ സേനാംഗങ്ങളുടെ എണ്ണം ഇരട്ടിയാക്കും. പ്രാദേശിക യുവാക്കളെ ഉള്‍പ്പെടുത്തി നൂറിലധികം സ്പെഷ്യല്‍ പോലീസിനെക്കൂടി നിയമിക്കുന്നതോടെ ആകെ അംഗബലം 600 കവിയും.
ജില്ലാ പോലീസ് മേധാവി സാബു മാത്യുവിന്റെ നേരിട്ടുള്ള നിയന്ത്രണത്തിലാണ് സുരക്ഷാ ക്രമീകരണങ്ങള്‍. കാഞ്ഞിരപ്പള്ളി ഡിവൈഎസ്പിക്കാണ് പ്രധാന മേല്‍നോട്ടം. നിരീക്ഷണ വിഭാഗത്തിന് നേതൃത്വം നല്‍കാൻ മറ്റൊരു ഡിവൈഎസ്പിയും ഉണ്ടാകും.
3 സർക്കിള്‍ ഇൻസ്പെക്ടർമാർ, 55 എസ്.ഐ/എ.എസ്.ഐമാർ, വനിതാ ഉദ്യോഗസ്ഥരടക്കം 302 സീനിയർ സിവില്‍ പോലീസ് ഓഫീസർമാർ, 168 സി.പി.ഒമാർ എന്നിവർ മൂന്ന് ഷിഫ്റ്റുകളിലായി രാവും പകലും ഡ്യൂട്ടിയിലുണ്ടാകും.
