സന്നിധാനം: ശബരിമല മണ്ഡലകാല തീർഥാടനം ആരംഭിച്ചതോടെ തീർഥാടകർക്ക് രുചികരമായ കേരളീയ സദ്യ നല്കി തുടങ്ങി. പ്രഭാതഭക്ഷണവും അത്താഴവും ഉള്പ്പെടെ മൂന്നുനേരവും അന്നദാന മണ്ഡപത്തില് അയ്യപ്പഭക്തർക്ക് ഭക്ഷണം ലഭിക്കും.
മുൻവർഷങ്ങളില് നിന്ന് വ്യത്യസ്തമായി പുതിയ മെനുവുവാണ് ഇത്തവണ അന്നദാനത്തിന് നല്കുന്നത്. ദേവസ്വംബോർഡ് പ്രസിഡൻ്റ് കെ ജയകുമാറിൻ്റെ സാന്നിധ്യത്തിലാണ് അന്നദാനത്തിന് തുടക്കമായത്.
അയ്യപ്പസ്വാമിയുടെ ചിത്രത്തിന് മുന്നില് നിലവിളക്ക് കൊളുത്തി വിഭവങ്ങള് പ്രത്യേകം നിവേദിച്ചുകൊണ്ടാണ് ഈ വർഷത്തെ അന്നദാനത്തിന് തുടക്കം കുറിച്ചത്.
പ്രഭാതഭക്ഷണമായി ഇഡ്ഡലിയോ, ദോശയോ ഉള്പ്പെടെയുള്ള വിഭവങ്ങളും, ഉച്ചയ്ക്ക് പായസമടങ്ങുന്ന കേരളീയ സദ്യയും, രാത്രിയില് കഞ്ഞിയും പയറും അച്ചാറും പപ്പടവുമാണ് ഇത്തവണത്തെ പ്രത്യേകത. എല്ലാ ദിവസവും ഏതെങ്കിലും ഒരു മധുരപലഹാരം നിർബന്ധമായും ഉള്പ്പെടുത്തിയിട്ടുണ്ട്.
ഇലയില് പായസം ഉള്പ്പടെയുള്ള കേരളീയ സദ്യ തീർഥാടനകാലം മുഴുവൻ വിളമ്പാനാണ് തീരുമാനമെന്ന് തിരുവിതാംകൂർ ദേവസ്വം പ്രസിഡൻ്റ് കെ ജയകുമാർ. ശരണഘോഷങ്ങളുടെ അകമ്പടിയില് ചൊവ്വാഴ്ച രാവിലെ മൂന്നു മണിക്ക് പുതിയ മേല്ശാന്തി അരീക്കര സുബ്രഹ്മണ്യൻ നമ്പൂതിരി നടതുറന്നു. ഇപ്പോഴും വലിയ തിരക്കാണ് സന്നിധാനത്ത് അനുഭവപ്പെടുന്നത്.
ഇന്ന് 60,000ല് അധികം തീർഥാടകർ വെർച്വല് ക്യൂ വഴി ബുക്ക് ചെയ്തിരുന്നു. നിലയ്ക്കലില്നിന്നും സ്പോട് ബുക്കിങ് വഴി വരുന്നവരും ഉണ്ട്. ഇക്കുറി പമ്പയില് സ്പോട് ബുക്കിങ് സംവിധാനം നിലവിലില്ല. അതേസമയം പരമ്പരാഗത കാനന പാത വഴിയുള്ള ഭക്തരും ഇന്നുമുതല് എത്തിത്തുടങ്ങും. പതിനെട്ടാം പടി വഴി മിനിറ്റില് 75-80 പേരെ കയറ്റിവിടാനാണ് പോലീസിനു ലഭിച്ച നിർദേശം.






