തിരുവനന്തപുരം: തലസ്ഥാന നഗര ഭരണത്തില്‍ ബി ജെ പിക്ക് വലിയ ആശ്വാസം.
പാർട്ടിയോട് കലഹിച്ച്‌ കൗണ്‍സിലർ സ്ഥാനം രാജിവയ്ക്കുന്നതായി പ്രഖ്യാപനം നടത്തിയ മുൻ ഡി ജി പി ആർ ശ്രീലേഖ രാജി സന്ദേശം പിൻവലിച്ചു.
ശാസ്തമംഗലം വാർഡിന്‍റെ വാട്സ് ആപ് ഗ്രൂപ്പിലിട്ട സന്ദേശം ശ്രീലേഖ പിൻവലിച്ചതോടെ ശക്തമായ അനുനയ നീക്കങ്ങള്‍ ഫലം കണ്ടിരിക്കുകയാണെന്നാണ് വ്യക്തമാകുന്നത്.
ശ്രീലേഖ കൗണ്‍സിലർ സ്ഥാനം രാജിവെക്കില്ലെന്ന് ബി ജെ പി നേതൃത്വം നേരത്തെ തന്നെ വ്യക്തമാക്കിയിരുന്നെങ്കിലും അവർ പ്രതികരിച്ചിരുന്നില്ല. രാജി പിൻവലിക്കുന്നതിലും നിലവിലെ സംഭവവികാസങ്ങളിലും ശ്രീലേഖ ഇതുവരെ നേരിട്ട് പരസ്യമായ വിശദീകരണമൊന്നും നല്‍കിയിട്ടില്ല.
പാർട്ടിയോടുള്ള അതൃപ്തിയല്ല ശാരീരിക അസ്വസ്ഥതയായിരുന്നു ശ്രീലേഖയുടെ പ്രശ്നമെന്നാണ് നേതാക്കളുടെ വിശദീകരണം. ഭീഷണി ഒഴിവായെങ്കിലും രാജിനാടകത്തില്‍ ശ്രീലേഖക്കും ബി ജെ പിക്കുമുണ്ടായത് വലിയ നാണക്കേടാണ്.
