തിരുവനന്തപുരം കോർപറേഷൻ കൗണ്‍സിലർ ആർ ശ്രീലേഖയുടെ രാജി പ്രഖ്യാപനത്തില്‍ വൻ ട്വിസ്റ്റ്.
കൗണ്‍സിലർ സ്ഥാനം രാജിവെയ്ക്കുന്നതായി പ്രഖ്യാപനം നടത്തിയ മുൻ ഡി ജി പി ആർ ശ്രീലേഖ രാജി സന്ദേശം വാട്സ്‌ആപ്പ് ഗ്രൂപ്പില്‍ നിന്നും പിൻവലിച്ചു.
ശാസ്തമംഗലം വാർഡ് ഗ്രൂപ്പില്‍ ഇട്ട സന്ദേശമാണ് പിൻവലിച്ചത്. പിന്മാറ്റം പാർട്ടി നേതൃത്വത്തിന്റെ അനുനയ നീക്കത്തിന് പിന്നാലെയാണെന്നാണ് സൂചന.
ബിജെപി നേതൃത്വത്തെ മുള്‍മുനയില്‍ നിർത്തിയായിരുന്നു ആർ ശ്രീലേഖയുടെ രാജി പ്രഖ്യാപനം. കോർപ്പറേഷൻ ഭരണത്തില്‍ തന്നെ നിർണായക ഇടപെടല്‍ നടത്താവുന്ന രാജി ഒടുവില്‍ ബിജെപി നേതാക്കള്‍ ഇടപെട്ട് പരിഹരിച്ചു. ആർ ശ്രീലേഖയുടെ സമ്മർദ്ദ തന്ത്രത്തിന് നേതാക്കള്‍ വഴങ്ങിയെന്നാണ് വിവരം. രാജിയില്‍ നിന്ന് ശ്രീലേഖ പിന്മാറിയതോടെ രാജിക്കത്ത് ലഭിച്ചു എന്ന് ഉറപ്പിച്ചു പറഞ്ഞ മേയർ വി വി രാജേഷ് ഇന്ന് മലക്കം മറിഞ്ഞു.
സംസ്ഥാന അധ്യക്ഷൻ രാജീവ് ചന്ദ്രശേഖറും ജനറല്‍ സെക്രട്ടറി എസ് സുരേഷും ആശുപത്രിയില്‍ ചികിത്സയില്‍ കഴിയുന്ന ശ്രീലേഖയുടെ ചിത്രം പങ്കുവച്ച്‌ ഫേസ്ബുക്കിലൂടെ പ്രതികരണവുമായി രംഗത്തെത്തി. ശാരീരികാസ്വസ്‌ഥത മൂലം കൗണ്‍സിലറുടെ ജോലി ശരിയായി നിർവഹിക്കാൻ കഴിയുന്നില്ല എന്ന ഉത്കണ്ഠയുണ്ട്. അത് ശ്രദ്ധയില്‍പ്പെടുത്തുക മാത്രമാണ് ശ്രീലേഖ ചെയ്തതെന്ന് എസ് സുരേഷ് വ്യക്തമാക്കി. എന്നാല്‍, ശ്രീലേഖയുടേത് രാഷ്ട്രീയ നാടകം എന്നായിരുന്നു കോണ്‍ഗ്രസ്, സിപിഐഎം നേതാക്കളുടെ പ്രതികരണം.
