കൊച്ചി: സംസ്ഥാന സർക്കാരിന്റെ റോഡ് സുരക്ഷാ പദ്ധതിയായ 'ജീവ-സുയാത്ര'യ്ക്ക് കൊച്ചിയില്‍ തുടക്കമായി.
മെഗാസ്റ്റാർ മമ്മൂട്ടിയുടെ സാന്നിധ്യത്തില്‍ നടന്ന ചടങ്ങില്‍ മുഖ്യമന്ത്രിയാണ് പദ്ധതിക്ക് തുടക്കം കുറിച്ചത്. പദ്ധതിയുടെ ബ്രാൻഡ് അംബാസഡർ കൂടിയാണ് മമ്മൂട്ടി.
പരിചയമില്ലാത്ത ആളുകള്‍ പോലും ഇന്ന് റോഡില്‍ പരസ്പരം മത്സരിക്കുകയാണെന്ന് മമ്മൂട്ടി പറഞ്ഞു. വാഹനങ്ങളുടെ എണ്ണം വർധിക്കുന്നതിനനുസരിച്ച്‌ റോഡുകളിലെ തിരക്കും അപകടസാധ്യതയും കൂടുകയാണ്.
റോഡുകള്‍ എത്ര മെച്ചപ്പെടുത്തിയാലും വാഹനപ്പെരുപ്പം നിയന്ത്രിക്കാനായില്ലെങ്കില്‍ തിരക്ക് കുറയില്ലെന്നും മമ്മൂട്ടി ചൂണ്ടിക്കാട്ടി.
വാഹനപ്രേമിയായിരുന്നിട്ടും റോഡുകളിലെ തിരക്കും വാഹനബാഹുല്യവും കാരണം ഇപ്പോള്‍ വാഹനം ഓടിക്കാറില്ലെന്നും അദ്ദേഹം പറഞ്ഞു.
റോഡ് നിയമങ്ങള്‍ പാലിക്കുന്ന കാര്യത്തില്‍ വിട്ടുവീഴ്ചയുണ്ടാകില്ലെന്ന് മുഖ്യമന്ത്രി വ്യക്തമാക്കി. നിയമലംഘനം നടത്തുന്നവർക്കെതിരെ കർശന നടപടി സ്വീകരിക്കണം.
നടപടികളെടുക്കുമ്പോള്‍ രാഷ്ട്രീയക്കാരുടെ ശുപാർശകളെ ഉദ്യോഗസ്ഥർ ഭയപ്പെടേണ്ടതില്ലെന്നും മുഖ്യമന്ത്രി പറഞ്ഞു. നിയമലംഘകർക്കെതിരെ നടപടിയെടുക്കുന്ന ഉദ്യോഗസ്ഥരെ സംരക്ഷിക്കുമെന്നും ജനപ്രതിനിധികളുടെ ശുപാർശകള്‍ക്ക് വഴങ്ങേണ്ടതില്ലെന്നും അദ്ദേഹം ഉറപ്പുനല്‍കി.
