കോട്ടയം: യാക്കോബായ സഭാ പരമാധ്യക്ഷൻ പാത്രിയർക്കീസ് ബാവയുടെ മണർകാട് പള്ളി സന്ദർശനത്തിനെതിരെ രൂക്ഷ വിമർശനവുമായി ഓർത്തഡോക്സ് സഭ.
സന്ദർശനത്തോടെ സഭകള്‍ക്കിടയിലെ സമാധാന നീക്കങ്ങള്‍ക്ക് വിള്ളല്‍ വീണെന്ന് ഓർത്തഡോക്സ് സഭ ആരോപിച്ചു. സർക്കാർ സ്പോണ്‍സർ ചെയ്ത നിയമലംഘനമാണ് നടന്നതെന്നും തർക്കത്തിലുള്ള പള്ളിയിലേക്ക് യാക്കോബായ സഭാ പരമാധ്യക്ഷനെ കൊണ്ടുവന്നത് ശരിയായില്ലെന്നും ഡോ. യൂഹാനോൻ മാർ ദീയസ്കോറോസ് മെത്രാപ്പോലീത്ത വിമർശിച്ചു.
സമാധാനത്തെക്കുറിച്ച്‌ പ്രസംഗിക്കുന്നവർ തന്നെ സമാധാനത്തിനുള്ള വഴികള്‍ക്ക് തടസം സൃഷ്ടിക്കുന്ന നടപടികളാണ് സ്വീകരിക്കുന്നതെന്ന് അദ്ദേഹം കുറ്റപ്പെടുത്തി.
സമാധാനദൂതൻമാരെന്ന മുഖംമൂടി അണിയുന്ന ചിലരുടെ യഥാർഥ മുഖം പുറത്തുവരുന്ന കാഴ്ചയാണ് ഇതിലൂടെ ഉണ്ടായതെന്നും ശാശ്വത സമാധാനമെന്ന പ്രതീക്ഷയ്ക്ക് വീണ്ടും വിള്ളല്‍ വീണെന്നും അദ്ദേഹം പറഞ്ഞു.
സഭാതർക്കം പരിഹരിക്കപ്പെടാതെ തുടരുന്നതിനിടെയാണ് പാത്രിയർക്കീസ് ബാവയുടെ മണർകാട് പള്ളി സന്ദർശനം. 2017ലെയും 1995ലെയും സുപ്രീംകോടതി വിധികളുടെ ലംഘനമാണ് സന്ദർശനമെന്നാണ് ഓർത്തഡോക്സ് സഭയുടെ നിലപാട്.
സന്ദർശക വിസയിലെത്തിയ പാത്രിയർക്കീസ് ബാവ തർക്കത്തിലുള്ള പള്ളിയില്‍ ആരാധനാക്രമങ്ങളില്‍ പങ്കെടുത്തത് ചട്ടലംഘനമാണെന്ന് ചൂണ്ടിക്കാട്ടി സഭ ഹൈക്കോടതിയെ സമീപിച്ചിരുന്നു.
നിയമലംഘനം ഉണ്ടാകരുതെന്ന് കോടതി നിർദേശിച്ചിരുന്നെങ്കിലും സർക്കാരിന്റെ നിയമോപദേശത്തിന്റെ അടിസ്ഥാനത്തിലാണ് ബാവയ്ക്ക് സന്ദർശനാനുമതി ലഭിച്ചതെന്നാണ് റിപ്പോർട്ടുകള്‍. നിയമോപദേശത്തിന് പിന്നില്‍ ദുരൂഹതയുണ്ടെന്നും സമാധാനാന്തരീക്ഷം തകർക്കുന്ന രീതിയിലാണ് സർക്കാർ ഇടപെടലുണ്ടായതെന്നും ഓർത്തഡോക്സ് സഭ ആരോപിച്ചു.
