കോട്ടയം: വർദ്ധിച്ചു വരുന്ന റോഡ് അപകടങ്ങൾ കുറയ്ക്കുന്നതിനായി റോഡ് ആക്സിഡന്റ് ആക്ഷൻ ഫോറം (റാഫ്) കോട്ടയം ജില്ലാ കമ്മിറ്റിയുടെ നേതൃത്വത്തിൽ ജില്ലാ കളക്ടർക്കും ജില്ലാ പോലീസ് മേധാവിക്കും നിവേദനം സമർപ്പിച്ചു.
കോട്ടയം ജില്ലാ കളക്ടർ ചേതൻ കുമാർ മീണ ഐ.എ.എസ്., കോട്ടയം ജില്ലാ പോലീസ് മേധാവി കെ.എം. സാബു മാത്യു ഐ.പി.എസ്. എന്നിവർക്കാണ് നിവേദനം നൽകിയത്.
വർദ്ധിച്ചുവരുന്ന റോഡ് അപകടങ്ങൾ കുറയ്ക്കുന്നതിനുള്ള നിർദ്ദേശങ്ങൾ, നിയമലംഘനം നടത്തുന്ന വാഹനങ്ങൾക്കെതിരെ കർശന നടപടി സ്വീകരിക്കൽ, ജനങ്ങളുടെ സുരക്ഷിതയാത്രയ്ക്കായി നടപ്പിലാക്കേണ്ട കാര്യങ്ങൾ എന്നിവ അടങ്ങിയ നിവേദനവും, റോഡ് സുരക്ഷ സംബന്ധിച്ച് ആർ.എ.എഫ്. സംസ്ഥാന കമ്മിറ്റി തയ്യാറാക്കിയ ലഘുലേഖയുമാണ് കൈമാറിയത്.
റോഡ് സുരക്ഷയ്ക്കായി റാഫ് നടത്തുന്ന പ്രവർത്തനങ്ങളെ അധികാരികൾ അഭിനന്ദിച്ചു. ഒപ്പം വേണ്ട കർശന നടപടികൾ കൈക്കൊള്ളാമെന്ന് ഭാരവാഹികളെ അറിയിച്ചു.
ചടങ്ങിൽ ജില്ലാ പ്രസിഡന്റ് ഷാനവാസ് എസ്.എസ്., ജനറൽ സെക്രട്ടറി കോശി കെ.എം., ജില്ലാ ട്രഷറർ അൻസൽ റഹ്‌മാൻ എന്നിവർ പങ്കെടുത്തു.
