മലപ്പുറം:സംസ്ഥാനത്തെ 39 റോഡ് വികസന പദ്ധതികൾക്കായി കേന്ദ്ര റോഡ് ഗതാഗത-ഹൈവേ മന്ത്രാലയത്തിൽ നിന്ന് 988.75 കോടി രൂപയുടെ അനുമതി ലഭിച്ചതായി പൊതുമരാമത്ത് വകുപ്പ് മന്ത്രി പി.കെ. ബഷീർ അറിയിച്ചു.
സെൻട്രൽ റോഡ് ആൻഡ് ഇൻഫ്രാസ്ട്രക്ചർ ഫണ്ട് പദ്ധതിയിലുൾപ്പെടുത്തിയാണ് തുക അനുവദിച്ചത്.
ഇതിലൂടെ സംസ്ഥാനത്തെ 486.33 കിലോമീറ്റർ റോഡുകൾ വികസിപ്പിക്കാനാകുമെന്നും മന്ത്രി പറഞ്ഞു.
കേന്ദ്രം അനുവദിച്ച തുകയിൽ 570 കോടി രൂപയും മലബാർ മേഖലയിലെ റോഡുകൾക്കാണ്.
കാസർകോട്, കണ്ണൂർ, വയനാട്, കോഴിക്കോട്, മലപ്പുറം ജില്ലകളിലായി 21 റോഡ് പദ്ധതികൾക്കാണ് അനുമതി ലഭിച്ചത്.
കേന്ദ്ര റോഡ് ഗതാഗത-ഹൈവേ മന്ത്രി നിതിൻ ഗഡ്കരിയുമായി മന്ത്രി പി.കെ ബഷീര്‍ നടത്തിയ ചർച്ചകളെ തുടർന്നാണ് പദ്ധതികൾക്ക് അനുകൂല തീരുമാനം ഉണ്ടായത്. മേജർ ഡിസ്ട്രിക്ട് റോഡുകൾ, ഓർഡിനറി ഡിസ്ട്രിക്ട് റോഡുകൾ, കോർപ്പറേഷൻ റോഡുകൾ എന്നിവയാണ് പദ്ധതിയിൽ ഉൾപ്പെടുന്നത്.
പദ്ധതികൾക്ക് സംസ്ഥാന സർക്കാർ ഭരണാനുമതി നൽകിയിട്ടുണ്ട്.
സാങ്കേതിക, സാമ്പത്തിക അനുമതികൾ ഉൾപ്പെടെയുള്ള തുടർനടപടികൾ സമയബന്ധിതമായി പൂർത്തിയാക്കി ഡിസംബറിൽ നിർമാണം ആരംഭിക്കു ദേശീയപാതാ മാനദണ്ഡങ്ങൾ പാലിച്ചായിരിക്കും നിർമാണം.
പദ്ധതികൾ പൂർത്തിയാകുന്നതോടെ ഗ്രാമീണ, നഗര റോഡുകളുടെ നിലവാരം ഉയർത്തുന്നതിനും ഗതാഗതബന്ധം കൂടുതൽ ശക്തിപ്പെടുത്തുന്നതിനും സാധിക്കുമെന്നും മന്ത്രി വ്യക്തമാക്കി.
