കോട്ടയം: ജനമനസ്സുകളില്‍ മായാത്ത പുഞ്ചിരിയുമായി ഇന്നും ജീവിക്കുന്ന ജനകീയനായകന്‍ ഉമ്മന്‍ ചാണ്ടിയുടെ 83-ാം ജന്മദിനമാണിന്ന്.
വിയോഗത്തിന്റെ വേദനയിലും, അദ്ദേഹം കാട്ടിയ കരുണയുടെയും സ്‌നേഹത്തിന്റെയും വഴികളിലൂടെ സഞ്ചരിച്ച്‌ പുതുപ്പള്ളി ഈ ദിനം അര്‍ത്ഥപൂര്‍ണ്ണമാക്കുകയാണ്. കേവലമൊരു അനുസ്മരണ ചടങ്ങിനപ്പുറം, സാധാരണക്കാരുടെ കണ്ണീരൊപ്പിയ ആ വലിയ മനുഷ്യന്റെ സ്മരണാര്‍ത്ഥം വിപുലമായ ജീവകാരുണ്യ പ്രവര്‍ത്തനങ്ങളാണ് ഉമ്മന്‍ചാണ്ടി ഫൗണ്ടേഷന്റെ നേതൃത്വത്തില്‍ പുതുപ്പള്ളി സെന്റ് ജോര്‍ജ് ഓര്‍ത്തഡോക്‌സ് വലിയ പള്ളിയുടെ തിരുമുറ്റത്ത് ഒരുക്കിയിരിക്കുന്നത്. 'കരുതലും വികസനവും' എന്ന സന്ദേശത്തിലൂന്നി അര്‍ഹരായവരെ സഹായിച്ചും വിവിധ മേഖലകളില്‍ മികവ് തെളിയിച്ചവരെ ആദരിച്ചുമാണ് ജന്മദിനാഘോഷം നടക്കുന്നത്. ആറ് കുടുംബങ്ങള്‍ക്ക് ഫൗണ്ടേഷന്‍ നിര്‍മ്മിച്ച വീടുകളുടെ താക്കോല്‍ കൈമാറുകയും, നൂറ് വിദ്യാര്‍ത്ഥികള്‍ക്ക് ഒരു വര്‍ഷം സൗജന്യ വിദ്യാഭ്യാസം ഉറപ്പാക്കുന്ന ഉമ്മന്‍ ചാണ്ടി വിദ്യാകിരണ്‍ പദ്ധതിക്ക് തുടക്കമിടുകയും ചെയ്യും. ആയിരം വിദ്യാര്‍ത്ഥികള്‍ക്ക് സ്‌കോളര്‍ഷിപ്പ് വിതരണം ചെയ്യുന്നതോടൊപ്പം അനാഥാലയങ്ങളില്‍ ഭക്ഷണവിതരണവും നടത്തും.
ഉമ്മന്‍ചാണ്ടിയുടെ മരണ ശേഷം രണ്ടുവര്‍ഷത്തിനിടെ ഭവനരഹിതര്‍ക്കായി 48 വീടുകളാണ് ഫൗണ്ടേഷന്‍ നിര്‍മ്മിച്ച്‌ നല്‍കിയത്. 25 വീടുകളുടെ നിര്‍മ്മാണം പാതി വഴിയിലാണ്. 1000 വിദ്യാര്‍ത്ഥികള്‍ക്ക് സ്‌കോളര്‍ഷിപ്പ് വിതരണം ചെയ്തതിനൊപ്പം, ചടങ്ങില്‍ വിവിധ മേഖലകളില്‍ ശ്രദ്ധേയ സംഭാവനകള്‍ നല്‍കിയ 18 പേര്‍ക്ക് പുരസ്‌കാരങ്ങളും നല്‍കും. പുതുപ്പള്ളി നിയോജകമണ്ഡലത്തിലെ എട്ട് പഞ്ചായത്തുകളില്‍നിന്നുള്ള എട്ട് കര്‍ഷകരെ കര്‍ഷകശ്രേഷ്ഠ പുരസ്‌കാരം നല്‍കി ആദരിക്കുകയും, ക്ഷീരകര്‍ഷക മറിയാമ്മ തോമസിന് ക്ഷീരശ്രേഷ്ഠ പുരസ്‌കാരവും യുവകര്‍ഷകന്‍ ശാലു കുര്യാക്കോസിന് യുവഹരിതശ്രേഷ്ഠ പുരസ്‌കാരവും സമ്മാനിക്കും. മൗറീഷ്യസ് മുന്‍ പ്രസിഡന്റ് പൃഥ്വിരാജ് സിംഗ് രൂപണ്‍ മുഖ്യാതിഥിയാകുന്ന ചടങ്ങില്‍ സ്പീക്കര്‍ തിരുവഞ്ചൂര്‍ രാധാകൃഷ്ണന്‍, മന്ത്രി പി.കെ. കുഞ്ഞാലിക്കുട്ടി, മറ്റ് മന്ത്രിമാര്‍, എം.പിമാര്‍, എം.എല്‍.എമാര്‍, ജനപ്രതിനിധികള്‍ തുടങ്ങിയവര്‍ പങ്കെടുക്കും. 'ഉമ്മന്‍ ചാണ്ടിയുടെ ജന്മദിനം കേവലം അനുസ്മരണച്ചടങ്ങില്‍ ഒതുക്കാതെ, അദ്ദേഹം ജീവിതത്തിലുടനീളം ഉയര്‍ത്തിപ്പിടിച്ച 'കരുതലും കാരുണ്യവും ജനസേവനവും' പുതിയ തലമുറയിലേക്ക് പകരുന്ന ദിനമായി മാറ്റുകയാണ് ലക്ഷ്യം. അര്‍ഹരായവര്‍ക്ക് സഹായമെത്തിച്ചും വിദ്യാര്‍ത്ഥികള്‍ക്ക് അവസരങ്ങള്‍ ഒരുക്കിയും സമൂഹത്തിന്റെ വിവിധ മേഖലകളില്‍ പ്രവര്‍ത്തിക്കുന്നവരെ ആദരിച്ചും ഉമ്മന്‍ ചാണ്ടിയുടെ സേവനപാരമ്പര്യം മുന്നോട്ടുകൊണ്ടുപോകും' എന്ന് എം.എല്‍.എ ചാണ്ടി ഉമ്മന്‍ വ്യക്തമാക്കിയിട്ടുണ്ട്.
തന്റെ ജീവിതകാലത്ത്, 1984-ല്‍ ഇന്ദിരാഗാന്ധി കൊല്ലപ്പെട്ടതിനു ശേഷം ഒക്ടോബര്‍ 31-ന് ജന്മദിനാഘോഷങ്ങള്‍ പൂര്‍ണ്ണമായും ഒഴിവാക്കിക്കൊണ്ടിരുന്ന നേതാവായിരുന്നു ഉമ്മന്‍ ചാണ്ടി. അദ്ദേഹത്തിന്റെ വിയോഗത്തിനു ശേഷവും, ആ ജനനായകന്റെ ഓര്‍മ്മ പുതുക്കലുകള്‍ കേവലമൊരു ആഘോഷമാക്കി മാറ്റാതെ, ജനങ്ങളെ സഹായിക്കുന്ന കാരുണ്യ പദ്ധതികളായാണ് അദ്ദേഹത്തിന്റെ കുടുംബവും ഉമ്മന്‍ ചാണ്ടി ഫൗണ്ടേഷനും സംഘടിപ്പിച്ചുപോരുന്നത്. അധികാരത്തിന്റെ വാതിലുകള്‍ സാധാരണ മനുഷ്യര്‍ക്ക് മുന്നില്‍ എളുപ്പത്തില്‍ തുറക്കാറില്ലെങ്കിലും, ആ വാതിലിന് മുന്നില്‍ സ്വയം കാത്തു നിന്നൊരു മുഖ്യമന്ത്രിയെ കേരളം കണ്ടിട്ടുണ്ട്. അദ്ദേഹത്തിന് സെക്രട്ടറിയേറ്റിലെ ഒരു മുറി മാത്രമായിരുന്നില്ല ഓഫീസ്; ട്രെയിനും ബസ് സ്റ്റാന്റും ആശുപത്രി വരാന്തയും പൊതുവഴികളും വീട്ടുമുറ്റങ്ങളുമെല്ലാം ഫയല്‍തീര്‍പ്പാക്കാനുള്ള ഇടങ്ങളായിരുന്നു. കരുതലും കരുണയും ജനസമ്പര്‍ക്കവും കൊണ്ടാണ് ഉമ്മന്‍ചാണ്ടി ജനഹൃദയങ്ങളിലേക്കാഴത്തിലിറങ്ങിയത്. അതുകൊണ്ടാണ് ഉമ്മന്‍ചാണ്ടിയെപ്പറ്റി പറയുന്നവര്‍ വികസനപദ്ധതികളുടെ കണക്കുകള്‍ പറയാതെ സ്വന്തം ജീവിതത്തോട് ചേര്‍ന്നൊരനുഭവം ഓര്‍ത്തെടുക്കുന്നത്.
കേരളത്തിന്റെ രാഷ്ട്രീയ പശ്ചാത്തലമാകെ മാറി പത്ത് വര്‍ഷത്തെ ഇടത് ഭരണം അവസാനിച്ച്‌ ഉമ്മന്‍ചാണ്ടിയുടെ യു.ഡി.എഫ് അധികാരത്തിലെത്തുകയും ഉമ്മന്‍ചാണ്ടിക്ക് ശേഷമൊരു കോണ്‍ഗ്രസുകാരന്‍ സംസ്ഥാന മുഖ്യമന്ത്രിയാകുകയും ചെയ്‌തെങ്കിലും, മുഖ്യമന്ത്രി ചര്‍ച്ചകള്‍ മുതല്‍ ഇപ്പോഴത്തെ സംഭവവികാസങ്ങള്‍ വരെ കാണുമ്പോള്‍ സാധാരണ കോണ്‍ഗ്രസ് പ്രവര്‍ത്തകരുടെ സങ്കടം ഉമ്മന്‍ചാണ്ടി ഇല്ലാത്ത കാലത്തിന്റെ നോവാണ്. കെ.എസ്.യു യൂണിറ്റ് കമ്മിറ്റി ഭാരവാഹി മുതല്‍ മുതിര്‍ന്ന നേതാക്കളുടെ അഭിപ്രായങ്ങള്‍ വരെ എത്ര ചെറിയ വിഷയമായാലും കേള്‍ക്കുന്നതായിരുന്നു ഉമ്മന്‍ചാണ്ടിയുടെ രാഷ്ട്രീയ ശൈലി. സാമുദായിക സംഘടനകളെ കൈകാര്യം ചെയ്യുന്നതിലെ സോഷ്യല്‍ എഞ്ചിനീയറിങ്ങും ഉമ്മന്‍ചാണ്ടിയോളം മറ്റൊരാള്‍ക്കുണ്ടായിരുന്നില്ല. ആ നടത്തവും പുഞ്ചിരിയും ചേര്‍ത്തുപിടിക്കലും കേരളത്തിന് ഒരിക്കലും മറക്കാനാവില്ല.
കാരോട്ട് വള്ളക്കാലില്‍ കെ.ഒ. ചാണ്ടിയുടെയും ബേബി ചാണ്ടിയുടെയും മകനായി കോട്ടയം ജില്ലയിലെ കുമരകത്ത് 1943 ഒക്ടോബര്‍ 31നായിരുന്നു ഉമ്മന്‍ ചാണ്ടിയുടെ ജനനം. കെ.എസ്.യു. യൂണിറ്റ് പ്രസിഡന്റായി രാഷ്ട്രീയ ജീവിതം തുടങ്ങിയ ഉമ്മന്‍ ചാണ്ടി, പിന്നീട് കെ.എസ്.യു.വിന്റെയും യൂത്ത് കോണ്‍ഗ്രസിന്റെയും സംസ്ഥാന അധ്യക്ഷനായി. യുവജന നേതാവ് എന്ന നിലയില്‍ ശ്രദ്ധേയനായ അദ്ദേഹം 1970കളുടെ തുടക്കത്തില്‍ കോണ്‍ഗ്രസിന്റെ മുന്‍നിര നേതാവായി മാറി. പിന്നീടുള്ള അര നൂറ്റാണ്ട് കാലം കോണ്‍ഗ്രസിന്റെ ഏറ്റവും ജനകീയതയുള്ള നേതാക്കളിലൊരാളായി ഉമ്മന്‍ ചാണ്ടി കേരള രാഷ്ട്രീയത്തില്‍ നിറഞ്ഞു നിന്നു. പുതുപ്പള്ളി മണ്ഡലത്തില്‍ നിന്നും ഇരുപത്തിയേഴാമത്തെ വയസ്സില്‍ നിയമസഭയിലേക്ക് തിരഞ്ഞെടുക്കപ്പെട്ട അദ്ദേഹം തുടര്‍ച്ചയായി 12 തവണയാണ് പുതുപ്പള്ളിയില്‍ നിന്നും എം.എല്‍.എ.യായി തെരഞ്ഞെടുക്കപ്പെട്ടത്. 2020ലാണ് പുതുപ്പള്ളിയില്‍ നിന്നുള്ള നിയമസഭാ സാമാജികത്വത്തിന്റെ 50 വര്‍ഷം ഉമ്മന്‍ ചാണ്ടി പൂര്‍ത്തീകരിച്ചത്. 1977ല്‍ കെ. കരുണാകരന്‍ മന്ത്രിസഭയില്‍ തൊഴില്‍ വകുപ്പ് മന്ത്രിയായി സത്യപ്രതിജ്ഞ ചെയ്യുമ്പോള്‍ അദ്ദേഹത്തിന് 34 വയസ് മാത്രമാണുണ്ടായിരുന്നത്. തുടര്‍ന്ന് 1978ല്‍ എ.കെ. ആന്റണി മന്ത്രിസഭയിലും തൊഴില്‍ വകുപ്പ് മന്ത്രിയായിരുന്നു. കെ. കരുണാകരന്റെ മന്ത്രിസഭകളില്‍ ആഭ്യന്തരമന്ത്രിയായും ധനകാര്യമന്ത്രിയായും പ്രവര്‍ത്തിച്ച അദ്ദേഹം, രണ്ട് തവണയായി ഏഴു വര്‍ഷം കേരള മുഖ്യമന്ത്രിയായും സേവനമനുഷ്ഠിച്ചു. കൂടാതെ കോണ്‍ഗ്രസ് പ്രവര്‍ത്തക സമിതി അംഗം, പ്രതിപക്ഷ നേതാവ്, ഐക്യജനാധിപത്യ മുന്നണി കണ്‍വീനര്‍ എന്നീ ഉന്നത ചുമതലകളും അദ്ദേഹം വഹിച്ചു.
പുതുപ്പള്ളിക്കാര്‍ക്ക് അദ്ദേഹം എക്കാലവും 'കുഞ്ഞൂഞ്ഞ്' ആയിരുന്നു. അഞ്ച് പതിറ്റാണ്ടുകാലം കുഞ്ഞൂഞ്ഞിനെ മാത്രം തിരഞ്ഞെടുത്ത് നിയമസഭയിലേക്കയച്ച്‌ പുതുപ്പള്ളിക്കാര്‍ അവരുടെ വാല്‍സല്യം പ്രകടമാക്കി. തിരുവനന്തപുരത്ത് ജഗതിയിലുള്ള തന്റെ വീടിന്റെ പേര് 'പുതുപ്പള്ളി ഹൗസ്' എന്നിട്ടുകൊണ്ട് ഉമ്മന്‍ ചാണ്ടി തന്റെ മണ്ണിനെ അകലത്തിരുന്നും സ്‌നേഹിച്ചു. ലോകത്ത് എവിടെയാണെങ്കിലും ഞായറാഴ്ച ദിവസം അദ്ദേഹം മുടങ്ങാതെ പുതുപ്പള്ളിയിലെത്തും. മണ്ഡലത്തിലെത്തിയാല്‍ ആദ്യം പള്ളിയില്‍ പോയി പ്രാര്‍ത്ഥന, പിന്നെ പതിവു പോലെ മണ്ഡലത്തിലെ എല്ലാവരേയും കഴിയുന്നത്ര കാണാനുള്ള തിരക്ക്, അതിനുശേഷം തിരുവനന്തപുരത്തേക്കോ കാസര്‍കോട്ടേക്കോ ചിലപ്പോള്‍ ദില്ലിയിലേക്കോ ഉള്ള ഓട്ടപ്പാച്ചില്‍. സാവധാനത്തില്‍ നടക്കുന്ന ശീലം പോലും ഉമ്മന്‍ ചാണ്ടിക്കുണ്ടായിരുന്നില്ല; 'അതിവേഗം ബഹുദൂരം' എന്നത് ജീവിതത്തില്‍ പാലിക്കുകയും പ്രാവര്‍ത്തികമാക്കുകയും ചെയ്ത നേതാവായിരുന്നു അദ്ദേഹം.
ദേശീയ തലത്തിലേക്ക് വരെ കോണ്‍ഗ്രസിന് പ്രയോജനപ്പെടുത്താന്‍ തക്ക സംഘടനാ വൈദഗ്ധ്യവും പ്രവര്‍ത്തന മികവും ഉണ്ടായിരുന്ന നേതാവായിരുന്നു ഉമ്മന്‍ചാണ്ടി. എന്നാല്‍ 1970-ല്‍ ഇരുപത്തിയേഴാം വയസ്സില്‍ ആദ്യമായി എം.എല്‍.എ.യായി തിരഞ്ഞെടുക്കപ്പെട്ടതിന് ശേഷം അന്ന് മുതല്‍ ഇന്നുവരെ പുതുപ്പള്ളിക്കാരെ വിട്ടുകൊണ്ടുള്ള ഒരു രാഷ്ട്രീയ നീക്കത്തിനും അദ്ദേഹം തയ്യാറായില്ല; അല്ലെങ്കില്‍ പുതുപ്പള്ളിക്കാര്‍ അദ്ദേഹത്തെ അതിനനുവദിച്ചില്ലെന്നും പറയാം. 2021 ലെ നിയമസഭാ തിരഞ്ഞെടുപ്പില്‍ അദ്ദേഹം മത്സരിച്ചേക്കില്ലെന്ന തരത്തില്‍ ചില അഭ്യൂഹങ്ങള്‍ പുറത്തുവന്നപ്പോള്‍ പുതുപ്പള്ളിയിലെ വീടിന് മുന്നില്‍ തടിച്ചുകൂടിയ ജനക്കൂട്ടം, ഉമ്മന്‍ചാണ്ടിയെന്ന വ്യക്തി പുതുപ്പള്ളിക്ക് എന്താണെന്ന് ഒരിക്കല്‍ കൂടി തെളിയിക്കുന്നതായിരുന്നു. കേരള രാഷ്ട്രീയ ചരിത്രത്തില്‍ ഒരുപക്ഷേ ഇനി മറ്റാര്‍ക്കും തകര്‍ക്കാന്‍ കഴിയാത്ത നേട്ടങ്ങള്‍ സ്വന്തം പേരില്‍ കുറിച്ചുകൊണ്ടാണ് ഉമ്മന്‍ചാണ്ടി കടന്നുപോയത്. കേരളത്തില്‍ ഏറ്റവും കൂടുതല്‍ കാലം എം.എല്‍.എ.യായ വ്യക്തിയായ അദ്ദേഹം, കേരള കോണ്‍ഗ്രസ് എം. നേതാവ് കെ.എം. മാണിയെ മറികടന്ന് 2022 ഓഗസ്റ്റ് 2 നാണ് ഈ ചരിത്രനേട്ടം സ്വന്തമാക്കിയത്. 18,728 ദിവസം (51 വര്‍ഷം മൂന്നേകാല്‍ മാസം) എന്ന റെക്കോര്‍ഡാണ് അദ്ദേഹം പിന്നിട്ടത്. ഇതുവരെയുള്ള 970 എം.എല്‍.എമാരില്‍ ഉമ്മന്‍ ചാണ്ടിയും കെ.എം. മാണിയും മാത്രമാണ് നിയമസഭയില്‍ 50 വര്‍ഷം പൂര്‍ത്തിയാക്കിയ രണ്ടുപേര്‍. പുതുപ്പള്ളി നിയോജകമണ്ഡലത്തില്‍ നിന്ന് മാത്രം 1970 മുതല്‍ 2021 വരെ തുടര്‍ച്ചയായി 12 തവണ വിജയിച്ച ഉമ്മന്‍ചാണ്ടി, രണ്ടു തവണ കേരളത്തിന്റെ മുഖ്യമന്ത്രിയായും (2004-2006, 2011-2016), ഒരു തവണ പ്രതിപക്ഷ നേതാവായും (2006-2011) പ്രവര്‍ത്തിച്ചു. ഒന്നാം കരുണാകരന്‍ മന്ത്രിസഭയിലും (1977) ഒന്നാം ആന്റണി മന്ത്രിസഭയിലും (1977-1978) തൊഴില്‍ വകുപ്പിന്റെ ചുമതല വഹിച്ച അദ്ദേഹം, രണ്ടാം കരുണാകരന്‍ മന്ത്രിസഭയില്‍ (1981-1982) ആഭ്യന്തര മന്ത്രിയായും നാലാം കരുണാകരന്‍ മന്ത്രിസഭയില്‍ ധനകാര്യ മന്ത്രിയായും സേവനം അനുഷ്ഠിച്ചു.
സ്‌കൂള്‍ വിദ്യാഭ്യാസ കാലത്ത് കെ.എസ്.യു.വിലൂടെ പൊതുപ്രവര്‍ത്തന രംഗത്തേക്ക് ഇറങ്ങിയ ഉമ്മന്‍ചാണ്ടി തുടക്കകാലത്ത് തന്നെ മികച്ച സംഘാടകനെന്ന നിലയില്‍ പേരെടുത്തു. പുതുപ്പള്ളി സെന്റ് ജോര്‍ജ് ഹൈസ്‌കൂളിലെ കെ.എസ്.യു. യൂണിറ്റ് പ്രസിഡന്റ് പദവിയായിരുന്നു അദ്ദേഹത്തെ തേടിയെത്തിയ ആദ്യ സംഘടന പദവി. പിന്നീട് കെ.എസ്.യു., യൂത്ത് കോണ്‍ഗ്രസ് സംഘടനകളുടെ സംസ്ഥാന പ്രസിഡന്റായും കെ.പി.സി.സി., എ.ഐ.സി.സി. ഭാരവാഹിയായും ഉയര്‍ന്നു. യൂത്ത് കോണ്‍ഗ്രസ് നേതാവായിരിക്കെയാണ് 1970 ലെ തിരഞ്ഞെടുപ്പില്‍ പുതുപ്പള്ളിയില്‍ നിന്നും ഉമ്മന്‍ചാണ്ടിയെ മത്സരിപ്പിക്കാന്‍ പാര്‍ട്ടി തീരുമാനിക്കുന്നത്. 1957, 1960 തിരഞ്ഞെടുപ്പുകളില്‍ കോണ്‍ഗ്രസ് വിജയിച്ച മണ്ഡലമായിരുന്നെങ്കിലും 1967 ലെ തിരഞ്ഞെടുപ്പില്‍ ഇ.എം. ജോര്‍ജിലൂടെ മണ്ഡലം സി.പി.എം. പിടിച്ചെടുത്തിരുന്നു. 70 ലെ തിരഞ്ഞെടുപ്പില്‍ ഉമ്മന്‍ചാണ്ടി എതിരാളിയായി വന്നപ്പോഴും ഇ.എം. ജോര്‍ജ് വിജയം പ്രതീക്ഷിച്ചെങ്കിലും, വോട്ട് എണ്ണിയപ്പോള്‍ ഏഴായിരത്തില്‍ പരം വോട്ടിന് പരാജയപ്പെടുത്തി ഉമ്മന്‍ചാണ്ടി ആദ്യമായി നിയമസഭയിലേക്ക് പ്രവേശിച്ചു. പിന്നീട് 2021 വരെ ആ പതിവ് പുതുപ്പള്ളിക്കാരും ഉമ്മന്‍ചാണ്ടിയും ആവര്‍ത്തിച്ചു. 2021 ല്‍ ജെയ്ക് സി. തോമസിനോട് 9,044 വോട്ടിനായിരുന്നു ഉമ്മന്‍ചാണ്ടിയുടെ വിജയം എങ്കിലും, അത് മണ്ഡലത്തിലെ അദ്ദേഹത്തിന്റെ ഏറ്റവും കുറഞ്ഞ ഭൂരിപക്ഷവുമായിരുന്നു.
എന്നും എ.കെ. ആന്റണിയുടെ അടുത്ത അനുയായിരുന്ന ഉമ്മന്‍ചാണ്ടി, രണ്ടു വര്‍ഷത്തോളം ആന്റണിക്കൊപ്പം ഔദ്യോഗിക കോണ്‍ഗ്രസ് നേതൃത്വം നല്‍കിയിരുന്ന മുന്നണി വിട്ടു പ്രവര്‍ത്തിച്ചു. പിന്നീട് 1982-ല്‍ ഇടതു മുന്നണി വിട്ട് എ.കെ. ആന്റണിക്കൊപ്പം കോണ്‍ഗ്രസില്‍ മടങ്ങി എത്തിയ അദ്ദേഹം നിയമസഭാ കക്ഷി ഉപനേതാവായി. ഇക്കാലയളവില്‍ തന്നെയാണ് 1982 മുതല്‍ 86 വരെ യു.ഡി.എഫ്. കണ്‍വീനറായും അദ്ദേഹം പ്രവര്‍ത്തിച്ചത്. കരുണാകരന്‍-ആന്റണി ഗ്രൂപ്പ് പോര് ശക്തമായ സമയത്ത് എം.എ. കുട്ടപ്പന് രാജ്യസഭാ സീറ്റ് നിഷേധിച്ചതില്‍ പ്രതിഷേധിച്ച്‌ ഉമ്മന്‍ചാണ്ടി കരുണാകരന്‍ മന്ത്രിസഭയില്‍ നിന്ന് രാജിവെക്കുകയും ചെയ്തിരുന്നു. ആദ്യമായി മുഖ്യമന്ത്രി പദം തേടിയെത്തിയത് 2004 ലെ ലോക്സഭ തിരഞ്ഞെടുപ്പ് പരാജയത്തിന് പിന്നാലെ എ.കെ. ആന്റണി മുഖ്യമന്ത്രി പദം രാജിവെച്ചപ്പോഴാണ്. പിന്നീട് 2011 ല്‍ മുന്നണിക്ക് ഭൂരിപക്ഷം ലഭിച്ചപ്പോഴും ഉമ്മന്‍ചാണ്ടിയല്ലാതെ മറ്റൊരു പേര് ഉയര്‍ന്ന് വന്നിരുന്നില്ല. പാര്‍ട്ടിയില്‍ എന്നും ഒരു വിഭാഗം ഉമ്മന്‍ചാണ്ടിക്ക് എതിരാളികളായി ഉണ്ടായിരുന്നെങ്കിലും ഘടകക്ഷികളായിരുന്നു എന്നും അദ്ദേഹത്തോടൊപ്പം അടിയുറച്ച്‌ നിന്നത്. രണ്ട് എം.എല്‍.എമാരുടെ മാത്രം പിന്തുണയോടെ അധികാരത്തിലേറിയ അദ്ദേഹം 2016-ല്‍ അഞ്ച് വര്‍ഷം കാലാവധി പൂര്‍ത്തിയാക്കിയത് ഘടകക്ഷികളോട് അദ്ദേഹത്തിനും അദ്ദേഹത്തില്‍ ഘടകക്ഷികള്‍ക്കുമുള്ള വിശ്വാസത്തിന്റെ കൂടി ബലത്തിലായിരുന്നു. വല്ലാര്‍പാടം കണ്ടെയ്നര്‍ ടെര്‍മിനല്‍, വിഴിഞ്ഞം തുറമുഖം, കൊച്ചി മെട്രോ തുടങ്ങിയ കേരളത്തിന്റെ വികസന ചരിത്രത്തിലെ നാഴികക്കല്ലായ ഒട്ടനവധി വികസന പദ്ധതികള്‍ക്ക് പിന്നില്‍ അദ്ദേഹത്തിന്റെ കഠിനാധ്വാനവും പ്രയത്നവും ഉള്‍പ്പെട്ടിട്ടുണ്ട്.
